Aw Ka Ɲiningaliw Jaabiliw

◼ N’an sigilen be kafo dɔ ka kiin kɔnɔ, nafa juman b’a la ka kɛ o kafoden ye?

Kafo bolo fɛ, an be jagwɛlɛya sɔrɔ. O ‘b’an jija kanuya ni kɛwale ɲumanw kɛli la’ (Heb. 10:24, 25). Kafo sababu fɛ, an be tiɲɛn lɔnniya kɛ, ani an be labɛn k’an ka cii dafa: o min ye ka mɔgɔw kɛ kalandenw ye (Mat. 28:19, 20). An fana be barika sɔrɔ ka kɔrɔbɔliw muɲu ni kantigiya ye. An be kɔrɔsibagaw sɔrɔ, kanuya be minw na. U b’an dɛmɛ ka degunw ni haminankow kɛlɛ, minw be cayara ka taga. Siga t’a la, ni kafo tɛ, an tɛ se ka sii sɔrɔ hakilimaya ta fan fɛ. Nka, n’an sigilen be kafo dɔ ka kiin kɔnɔ, yala nafa b’a la ka kɛ o kafoden ye?

Bɛɛ ka cogoya tɛ kelen ye. Ani, koo dɔw be se k’an bila ka tugu kafo dɔ la, i n’a fɔ: baarako, furuɲɔgɔnma min tɛ Seere ye, wala bolifɛn koo. O bɛɛ n’a ta, hakilimaya ta faan fɛ ani faan wɛrɛ fɛ, siga t’a la, nafa b’a la ka tugu kafo dɔ la n’an sigilen be o kafo ka kiin kɔnɔ. Kɔrɔtɔ koo dɔ mana se, diinan mɔgɔkɔrɔw be se ka taga kafodenw fɛ teliya la. Aw ka ɲiningaliw jaabiliw barokun dɔw kɔnɔ, u tun ye nafa wɛrɛw yira ka gwɛ.—Saan 1991 mɛkalo, ani saan 1976 marisikalo labilanenw be Watchtower Library—1999 Edition CD-ROM kɔnɔ.

Tuma caaman na a ka fisa ka taga lajɛnw na sigida la. O b’an dɛmɛ ka kɔn ka se joona walisa ka baro kɛ ni mɔgɔ wɛrɛw ye, ka koo nafaman dɔw ɲɛnabɔ, ani ka kɛ datigɛli dɔnkili ni delili la. Ni makodon mɔgɔ kuraw be an sigida la, a ka nɔgɔ an fɛ k’u kunbɛn, ka bibulukalan kɛ n’u ye, ani k’u ɲɛsin lajɛnw kɛyɔrɔ ma, min ka surun u la.

An lanen b’a la ko gwatigiw bena miiri o koo kan delili kɔnɔ, ani u bena jateminɛ kɛ sɔbɛ la. O kɔ, min ka fisa u denbaya ma (hakilimaya ni farikolo ta fan fɛ), u bena u janto o la ka koow latigɛ.—1 Tim. 5:8.