Kafo ka kitabukalan labɛn b’an dɛmɛ cogo min na
1 An ka lɔgɔkun kɔnɔ lajɛn looru bɛɛ kelen-kelen kɛcogo n’a laɲinita tɛ kelen ye. Nka nafa be u bɛɛ kelen-kelen na k’an dɛmɛ “an ka an janto ɲɔgɔn na walisa ka ɲɔgɔn jija kanuya ni kɛwale ɲumanw kɛli la” (Heb. 10:24, 25). Cogoya nafaman jumanw be sɔrɔ kafo ka kitabukalan labɛn na minw tɛ sɔrɔ lajɛn tɔɔw la?
2 Dɛmɛ, walisa ka taga ɲɛ Alako ta fan fɛ: Tuma caaman na, kitabukalan jɛnkuludenw hakɛ ka dɔgɔ kosɔbɛ ka tɛmɛ kafo ka lajɛn tɔɔw ta kan. O lo b’a to o lajɛn kɔnɔ, a ka nɔgɔ ka teriya sigi, teriya min be se k’an dɛmɛ Alako ta fan fɛ (Ntal. 18:24). Yala i y’i jija ka aw ka jɛnkuludenw bɛɛ kelen-kelen lɔn, n’a sɔrɔ i kɛtɔ k’a ɲini u kelen-kelen fɛ u k’i bila sira cidenya baara la wa? Kitabukalan labɛn fana b’a to jɛnkulu kɔrɔsibaga be bɛɛ kelen-kelen ka cogoyaw lɔn ani a b’u jaa gwɛlɛya dan na dan na (Ntal. 27:23).
3 Yala i y’i ka Bibulu kalandenw weele u ka na kitabukalan kɛ n’i ye wa? Makodon mɔgɔ minw be sigasiga ka taga kafo ka lajɛnw na, mɔgɔw ka ca minw kɔnɔ, n’a sɔrɔ u tɛna siran kojugu ka taga lajɛn fitininman dɔ la, sanko n’o kalan be kɛ mɔgɔ dɔ ka soo kɔnɔ. Jɛnɲɔgɔnya teriman min be ye o jɛnkulu fitinin kɔnɔ, o b’a to lakalita kɛli be nɔgɔya denmisɛnw ni mɔgɔ kuraw fɛ. Ani, komi jɛnkulu fitinin lo, an be cogoya caaman sɔrɔ ka jaabili di ani ka Jehova tando.—Zab. 111:1.
4 Tuma caaman na, kitabu-kalan be kɛ yɔrɔ bɛnnenw na kafo ka kiinw kɔnɔ. Hali n’u tɛ se ka bɛɛ bila jɛnkulu dɔ kɔnɔ min ka surun u la kosɔbɛ, an ka kitabukalan kɛyɔrɔ kɔni be se ka surunya an na ka tɛmɛ kafo ka lajɛn wɛrɛw kɛyɔrɔ kan. Kitabukalan kɛyɔrɔ fana be se ka kɛ yɔrɔ bɛnnen ye waajuli baara lajɛn kama.
5 Dɛmɛ, cidenya baara kama: Kitabukalan kɔrɔsibaga b’a mako don ka bɛɛ kelen-kelen dɛmɛ ka cidenya baara kɛ tuma o tuma, ka kisɛya ani ka ninsɔndiya sɔrɔ o la. O kama a b’a jija ka baara kɛ ni bɛɛ kelen-kelen ye jɛnkulu kɔnɔ walisa k’a tigi dɛmɛ cidenya baara faan dɔ la. Ni cidenya baara faan dɔ ka gwɛlɛ i ma, i n’a fɔ viziti kuraw, i k’a ɲɛfɔ i ka kitabukalan kɔrɔsibaga ye. N’a sɔrɔ, a be se ka labɛn kɛ walisa i ka baara kɛ ni weleweledala kolɔnbaga dɔ ye jɛnkulu kɔnɔ. I ka bibulukalanw kɛcogo bena fisaya n’i b’i janto kosɔbɛ kitabukalan kɔrɔsibaga ka kalan kɛcogo ɲumanw na tuma min na a be kitabukalan ɲɛminɛna (1 Kɔr. 4:17).
6 Kafo ka kitabukalan ye dugaw sababu ye dɛ! Jehova ka labɛn lo a ye min kɛ ni kanuya ye. O b’an dɛmɛ an kana ben Alako ta fan fɛ wagati gwɛlɛ ninw na.—Zab. 26:12.
[Study Questions]
1. An ka lɔgɔkun kɔnɔ lajɛn looru b’an dɛmɛ cogo di?
2. Nafa jumanw b’a la ka lajɛn jɛnkulu fitininw kɔnɔ kitabukalan na?
3. Cogo di kitabukalan labɛn be mɔgɔ jija ka jaabili di ani a be Bibulu kalandenw jaa gwɛlɛya fana u ka na o lajɛn na?
4. Kitabukalan be se ka kɛ labɛn ɲuman ye cogo di?
5. Kitabukalan kɔrɔsibaga be se k’an dɛmɛ cogo di cidenya baara ta fan fɛ?
6. Mun na an ka ɲi k’a ɲini ka nafa bɛrɛbɛrɛ sɔrɔ kitabukalan labɛn na?