Rahab lara Jehova la

An k’a kɛ komi an be Zeriko dugu kɔnɔ, Kanaan jamana na. O yɔrɔ mɔgɔw lanin tɛ Jehova la. Muso dɔ be o dugu kɔnɔ, a tɔgɔ ko Rahab.

Tuma min na Rahab tun ye sungurunin ye, a y’a mɛn cogo min na Musa ye Kɔgɔji Wulen tilan fila ani ka Israɛldenw labɔ Misira jamana na. A y’a mɛn fana cogo min na Jehova ye Israɛldenw dɛmɛ u ye see sɔrɔ u juguw kan kɛlɛ la. Sisan a y’a mɛn ko Israɛldenw siginin be Zeriko gɛrɛfɛ!

Loon dɔ wulafɛ, Israɛlden fila tagara Zeriko dugu lajɛ. U sera Rahab ka soo. A ko u ka don ka to ale fɛ. Sufɛ, Zeriko masacɛ y’a mɛn ko mɔgɔ dɔw nana Zeriko walisa k’a cogoya lajɛ ani ko u be Rahab ka soo kɔnɔ. O kama, masacɛ ye mɔgɔw ci ka taga u minɛ. Rahab ye kolajɛbaga fila nunu dogo sanbon kan ani a y’a fɔ masacɛ ka mɔgɔw ye ko: ‘Mɔgɔ nunu sera ne fɛ, nka u bɔra ka taga. Ni aw tugura u kɔ sisan, aw bena u sɔrɔ sira la!’ I b’a lɔn fɛɛn min kama Rahab ye kolajɛbaga nunu dogo wa?— A y’o kɛ sabu a lara Jehova la ani a y’a lɔn fana ko Jehova bena Kanaan jamana di Israɛldenw ma.

Sanni kolajɛbaga nunu ka bɔ Rahab ka soo kɔnɔ, u y’u daa di ko ale n’a somɔgɔw bena kisi Zeriko halaki tuma na. I b’a lɔn u ko a ka min kɛ wa?— U y’a fɔ a ye ko: ‘Juru wulenman nin ta ka siri i ka finɛtiri la. Ni i y’o kɛ, i ka somɔgɔw bɛɛ bena kisi.’ Rahab y’o lo kɛ jaatika. I b’a lɔn fɛɛn min kɛra o kɔ wa?—

Tile damanin o kɔ, Israɛldenw tagamana ka Zeriko lamini, u tun tɛ kumana. U tagamana ka dugu lamini tile wɔɔrɔ kɔnɔ. U y’o kɛ siɲɛ kelen loon o loon. Nka tile wolonfilanan na, u ye dugu lamini siɲɛ wolonfila. A laban, u bɛɛ kulera ni kaanba ye. Jehova y’a kɛ dugu lamini kogow benna. Nka juru wulenman tun sirinin be boon min finɛtiri la, ale ma ben! I ɲɛɛ b’a la jaa nin kan wa?— Rahab n’a somɔgɔw kisira!

Rahab ka koo ye i dɛmɛ ka mun lo faamu?— Rahab ye kabako koo minw bɛɛ mɛn Jehova koo la, o lo y’a to a lara a la. E fana be kabako koo caaman kalanna Jehova koo la. I ko Rahab, i lanin be Jehova la fana wa?— An b’a lɔn ko i lanin b’a la!