Yezu b’a yɛrɛ yira jɛgɛminɛla dɔw la

Yezu tun y’a yɛrɛ yira a ka cidenw na. Wagati damanin o kɔ, Piyɛri y’a latigɛ ka taga jɛgɛ minɛ Galile baji la. Toma, Zaki, Zan ani kalanden wɛrɛw tagara n’a ye. U ye suu kuru bɛɛ kɛ jɛgɛminɛ na, nka u ma foyi sɔrɔ.

O dugusagwɛ sɔgɔma joona, u ye cɛɛ dɔ lɔnin ye baji daa la. O cɛɛ kulera k’a fɔ u ye ko: ‘Aw ye jɛgɛ dɔ minɛ wa?’ U y’a fɔ a ye ko: “Ayi!” Cɛɛ y’a fɔ u ye ko: “Aw ka jɔɔ fili kurun kinibolo fɛ.” U ye jɔɔ fili u kinibolo fɛ ani a fara jɛgɛ la. Jɛgɛ tun ka ca a kɔnɔ fɔɔ u ma se k’a sama k’a don kurun kɔnɔ. Zan sinna k’a faamu k’o cɛɛ ye Yezu lo ye ani a y’a fɔ ko: “Matigi lo!” Piyɛri y’o mɛn dɔrɔn, a panna ka don jii kɔnɔ ka taga fɔɔ baji daa la. Kalanden tɔɔw tora kurun kɔnɔ ka tugu a kɔ.

U sera baji daa la tuma min na, u ye tasuma mananin ye, buru ni jɛgɛ tun b’a kan. Yezu y’a fɔ u ye k’u ka na n’u ka jɛgɛ dɔw ye. O kɔ, a y’a fɔ u ye ko: ‘Aw ye na daraka kɛ.’

U ye daraka kɛ ka ban tuma min na, Yezu ye Piyɛri ɲininga ko: ‘I be ne kanu ka tɛmɛ jɛgɛminɛ kan wa?’ Piyɛri y’a jaabi ko: ‘Ɔnhɔn Matigi, ele yɛrɛ b’a lɔn ko n’ b’i kanu.’ Yezu ko: ‘ N’o lo, ne ka sagadenw dɛndɛ.’ Yezu y’a ɲininga tugun ko: ‘Piyɛri, i be ne kanu wa?’ Piyɛri y’a jaabi ko: ‘Matigi, i b’a lɔn ko n’ b’i kanu.’ Yezu y’a fɔ ko: “Ne ka sagaw kɔlɔsi.” Yezu y’a ɲininga tugun siɲɛ sabanan na. O ye Piyɛri hakili ɲagami ani a y’a fɔ ko: ‘Matigi i be koo bɛɛ lɔn. I b’a lɔn ko n’ b’i kanu.’ Yezu y’a fɔ a ye ko: “Ne ka sagaw dɛndɛ.” O kɔ, a y’a fɔ Piyɛri ye ko: ‘To ka tugu ne kɔ.’