Nyaɖeɖefia
18 Le nu sia megbe la, mekpɔ mawudɔla bubu aɖe wòle ɖiɖim tso dziƒo, eye ŋusẽ gã le esi, eƒe ŋutikɔkɔe na anyigba la dzi klẽ. 2 Eye wòdo ɣli kple gbe sesẽ aɖe gblɔ be: “Emu loo! Babilon Gã la mu,+ eye wòzu gbɔgbɔ vɔ̃wo kple gbɔgbɔ makɔmakɔwo katã kpakple xe makɔmakɔ siwo wotsri la katã ƒe nɔƒe!+ 3 Elabena dukɔwo katã no eƒe ahasiwɔwɔ* ƒe dzodzro sesẽ ƒe wain la mu,+ eye anyigbadzifiawo wɔ ahasi* kplii,+ eye anyigbadzisitsalawo* zu kesinɔtɔwo le eƒe agbeɖuɖu vivivo la ƒe ŋusẽ ŋuti.”
4 Eye mese gbe bubu aɖe tso dziƒo wògblɔ be: “Nye dukɔ, mido go le eme,+ ne miedi be yewoakpɔ gome kplii le eƒe nu vɔ̃wo me o, eye ne miedi be yewoaxɔ eƒe fuwɔamewo ƒe ɖeke o.+ 5 Elabena eƒe nu vɔ̃wo li kɔ yi ɖatɔ keke dziƒo ke,+ eye Mawu ɖo ŋku eƒe nu madzɔmadzɔ wɔwɔwo* dzi.+ 6 Miɖo eteƒe nɛ abe ale si wòwɔ amewo ene,+ ɛ̃, miɖo nu si wòwɔ la teƒe nɛ zi gbɔ zi eve;+ kplu+ si me wòtɔtɔ nu le la, mitɔtɔ nu teƒe eve nu ɖe eme nɛ.+ 7 Ale si nu wòdo eɖokui ɖe dzi heɖu agbe vivivoe la, miwɔ fui, eye mina wòaxa nu nenema ke. Elabena ele gbɔgblɔm le eƒe dzi me be: ‘Mebɔbɔ nɔ anyi abe fianyɔnu ene, nyemenye ahosi o, eye nyemaxa nu akpɔ o.’+ 8 Esia tae le ŋkeke ɖeka dzi la, fuwɔame siwo nye ku, nuxaxa kple dɔwuame ava edzi, eye woatɔ dzoe wòafiã keŋkeŋ,+ elabena Yehowa* Mawu, ame si drɔ̃ ʋɔnui la, ŋusẽtɔ wònye.+
9 “Eye ne anyigbadzifia siwo wɔ ahasi* kplii heɖu agbe kplii ŋumakpemakpee la kpɔ eƒe bibi ƒe dzudzɔa la, woafa avi, eye woaxa nu vevie le eŋuti. 10 Woanɔ adzɔge ke le vɔvɔ̃ na eƒe fuwɔame la ta agblɔ be: ‘Baba na wò, baba na wò, wò, du gã,+ Babilon, wò, du sesẽ, elabena wò ʋɔnudɔdrɔ̃ va ɖo le gaƒoƒo ɖeka me!’
11 “Eye anyigbadzisitsalawo hã le avi fam hele nu xam ɖe eta, elabena ame aɖeke megali aƒle woƒe adzɔnuwo katã azɔ o, 12 adzɔnu siawoe nye sika, klosalo, kpe xɔasiwo, dzonuwo, aklala biɖibiɖi, avɔ hẽ, seda kple avɔ dzĩ, kpakple nu sia nu si wotsɔ ati ʋeʋĩ kpa kple nu sia nu si wotsɔ nyiɖu kpa kpakple nu sia nu si wotsɔ ati xɔasi, akɔbli, gayibɔ kple kpe fufu xɔasi wɔ; 13 kple nu ʋeʋĩ si woyɔna be sinamɔn kple ataku, atike ʋeʋĩ, ami ʋeʋĩ, lifi, wain, ami, wɔ memee, lu, nyiwo, alẽwo, sɔwo, tasiaɖamwo, kluviwo kple amewo ƒe agbe.* 14 Ɛ̃, kutsetse nyui si dzroa wò* la dzo le gbɔwò, eye wò nu viviwo kple atsyɔ̃ɖonuwo katã bu ɖe wò vĩi, eye womagakpɔ wo akpɔ gbeɖe o.
15 “Asitsala siwo dzraa nu siawo, siwo to eya amea dzi zu kesinɔtɔwo la, atɔ ɖe adzɔge ke le vɔvɔ̃ na eƒe fuwɔame la ta, eye woafa avi ahafa konyi 16 agblɔ be: ‘Baba na wò, baba na wò, wò du gã, si do aklala biɖibiɖi wu kple awu hẽ kple awu dzĩ, eye nètsɔ sikanuwo kple kpe xɔasiwo kpakple dzonuwo+ ɖo atsyɔ̃ na ɖokuiwò fũu, 17 elabena le gaƒoƒo ɖeka me wogblẽ kesinɔnu gbogbo siawo dome!’
“Eye tɔdziʋukula ɖe sia ɖe kple ame sia ame si ɖoa ʋu toa tɔ dzi, kple ƒudzidɔwɔlawo kple ame siwo katã kpɔa woƒe abolo tso ƒudzidɔwɔwɔ me la le tsitre ɖe adzɔge ke, 18 eye esi wokpɔ eƒe bibi ƒe dzudzɔa la, wodo ɣli gblɔ be: ‘Du kae le abe du gã la ene?’ 19 Eye wolɔ ke kɔ ɖe tame, le ɣli dom le avi fam hele konyi fam le gbɔgblɔm be: ‘Baba na wò, baba na wò, wò du gã, si me ame siwo katã si tɔdziʋu le le atsiaƒu dzi to zu kesinɔtɔwo le wò kesinɔtɔnyenye ta, elabena wotsrɔ̃ wò le gaƒoƒo ɖeka me!’+
20 “O dziƒo,+ dzi nedzɔ wò le eta, dzi nedzɔ mi ame kɔkɔewo+ kple mi apostolowo kpakple mi nyagblɔɖilawo hã, elabena Mawu drɔ̃ ʋɔnui na mi!”+
21 Eye mawudɔla sesẽ aɖe kɔ kpe aɖe, si le abe té gã aɖe ene tsɔ ƒu gbe ɖe atsiaƒu me gblɔ be: “Aleae woatsɔ Babilon, si nye du gã la, axlã ɖe anyi sesĩe zi ɖekae nye esi, eye womagakpɔe gbeɖegbeɖe o.+ 22 Eye womagase haƒola siwo le saŋku ƒom ɖe ha dzi kple dzekulawo kple kpẽkulawo kpakple hadzila bubuwo ƒe gbe le mewò akpɔ o. Eye womagakpɔ aɖaŋudɔwɔla aɖeke le mewò azɔ o, eye womagase tétutu ŋkɔ le mewò azɔ o. 23 Eye akaɖi ƒe keklẽ aɖeke magaklẽ le mewò azɔ o, eye womagase ŋugbetɔsrɔ̃ kple ŋugbetɔ ƒe gbe le mewò azɔ o. Elabena wò asitsalawo nye ame ŋkutawo le anyigba la dzi, eye nèflu dukɔwo katã to wò gbɔgbɔyɔnuwɔnawo+ me. 24 Ɛ̃, wokpɔ nyagblɔɖilawo kple ame kɔkɔewo+ kpakple ame siwo katã wowu le anyigba dzi la ƒe ʋu le du sia me.”+