Nyaɖeɖefia
22 Eye wòfia agbetsitɔsisi aɖem,+ si me kɔ abe kristalo-kpe ene, eye wòle sisim tso Mawu kple Alẽvi+ la ƒe fiazikpui la gbɔ 2 va to du la ƒe ablɔ gã la titina. Eye agbetiwo le tɔsisi la ƒe go eveawo dzi, eye wotsena zi wuieve ƒe sia ƒe, wotsena ɣleti sia ɣleti. Woƒe aŋgbawo nye dɔyɔgbe na dukɔwo.+
3 Eye fiƒode aɖeke maganɔ anyi azɔ o. Ke boŋ Mawu kple Alẽvi+ la ƒe fiazikpui la anɔ du la me, eye Mawu ƒe kluviwo awɔ subɔsubɔdɔ kɔkɔe nɛ; 4 eye woakpɔ eƒe ŋkume,+ eye eƒe ŋkɔ anɔ woƒe ŋgonu.+ 5 Eye zã megale dodo ge o,+ womahiã akaɖi alo ɣe ƒe keklẽ o, elabena Yehowa* Mawu aklẽ na wo,+ eye woaɖu fia tegbetegbee.+
6 Eye wògblɔ nam be: “Nya siawo nye nyateƒenyawo* kple nya vavãwo,+ ɛ̃, Yehowa,* Mawu si na eƒe gbɔgbɔ ʋã nyagblɔɖilawo la,+ dɔ eƒe dɔla ɖa be wòaɖe nu siwo ava dzɔ kpuie la afia eƒe kluviwo. 7 Kpɔ ɖa! Megbɔna kpuie.+ Dzidzɔtɔe nye ame sia ame si léa nyagblɔɖinya siwo le agbalẽ sia me la me ɖe asi.”+
8 Nye Yohanes, nyee nye ame si se nu siawo eye mekpɔ wo. Eye esi mese nu siawo eye mekpɔ wo la, medze klo ɖe mawudɔla si ɖe wo fiam la ƒe afɔnu be made ta agu nɛ. 9 Ke egblɔ nam be: “Kpɔ nyuie! Mègawɔ nu ma o! Nye hã kluvi ko menye abe wò ke ene kpe ɖe nɔviwò, siwo nye nyagblɔɖilawo kpakple ame siwo léa agbalẽ sia me nyawo me ɖe asi la ŋu. De ta agu na Mawu.”+
10 Egagblɔ nam be: “Mègatre nyagblɔɖinya siwo le agbalẽ sia me la nu o, elabena ɣeyiɣi ɖoɖi la tu aƒe. 11 Nu madzɔmadzɔ wɔla nenɔ nu madzɔmadzɔ wɔwɔ la dzi, ɖinuwɔla nenɔ ɖinuwɔwɔ la dzi; ke nu dzɔdzɔe wɔla hã nenɔ nu dzɔdzɔe wɔwɔ la dzi, eye ame si le kɔkɔe la neyi edzi wòanɔ kɔkɔe.
12 “‘Kpɔ ɖa! Megbɔna kpuie, eye fetu si mana la kpe ɖe ŋutinye, be maɖo eteƒe na ame sia ame ɖe eƒe dɔwɔwɔ nu.+ 13 Nyee nye Alfa kple Omega,*+ gbãtɔ kple mlɔetɔ, gɔmedzedze kple nuwuwu. 14 Dzidzɔtɔwoe nye ame siwo nya woƒe awu ʋlayawo,+ ne woana ŋusẽ wo be woayi agbetiawo gbɔ,+ eye woato du la ƒe agbowo nu age ɖe eme.+ 15 Avuwo* kple afakalawo kple ahasiwɔlawo* kple amewulawo kple trɔ̃subɔlawo kple ame sia ame si lɔ̃a aʋatsokaka, eye wòkanɛ la, woawo ya woatsi agbo la godo.’+
16 “‘Nye, Yesu, ye dɔ nye mawudɔla ɖa be wòaɖi ɖase le nu siawo ŋuti na mi hena hameawo. Nyee nye David+ ƒe kè kple eƒe dzidzimevi kpakple ŋukeɣletivi keklẽ la.’”+
17 Eye gbɔgbɔ la kple ŋugbetɔ+ la le gbɔgblɔm be, “Va!” eye ame sia ame si le esem la negblɔ be, “Va!” eye ame sia ame si tsikɔ le wuwum la neva;+ ame sia ame si lɔ̃ la, nexɔ agbetsi la no faa.+
18 “Mele ɖase ɖim na ame sia ame si sea nyagblɔɖinya siwo le agbalẽ sia me la be: Ne ame aɖe tsɔ nane kpe ɖe nu siawo ŋu la,+ Mawu atsɔ fuwɔame siwo woŋlɔ ɖe agbalẽ sia me la akpe ɖe eŋu nɛ;+ 19 eye ne ame aɖe ɖe nane le nyagblɔɖinya siwo le agbalẽ sia me la me la, Mawu aɖe eƒe gome ɖa le nu siwo woŋlɔ ɖe agbalẽ sia me la me: maɖe mɔ nɛ be wòaɖu agbetiawo+ ƒe tsetsewo o, eye maɖe mɔ nɛ be wòanɔ du+ kɔkɔe la me o.
20 “Ame si le ɖase ɖim le nu siawo ŋu la gblɔ be: ‘Ɛ̃, megbɔna kpuie.’”+
“Amen! Aƒetɔ Yesu, va.”
21 Aƒetɔ Yesu ƒe amenuveve nanɔ anyi kple ame kɔkɔeawo.