2 Kronika

15 Mawu ƒe gbɔgbɔ va Azariya, Oded vi dzi. 2 Eye wòyi ɖakpe Asa gblɔ nɛ be: “Oo Asa kpakple Yuda kple Benyamin blibo la katã, miɖo tom! Yehowa anɔ kpli mi zi ale si mieli kplii;+ eye ne miedii la, ana miake ɖe eŋu,+ gake ne miegblẽe ɖi la, eya hã agblẽ mi ɖi.+ 3 Mawu vavã la, nunɔla siwo nye nufialawo, kple se aɖeke menɔ Israel si o hena ɣeyiɣi didi aɖe.*+ 4 Ke esi woɖo xaxa me, eye wotrɔ ɖe Yehowa, Israel ƒe Mawu la ŋu hedii la, ena woke ɖe eŋu.+ 5 Ɣemaɣi la, afɔku le mɔzɔzɔ me,* elabena zitɔtɔ geɖe nɔ anyigba la dzi nɔlawo katã dome. 6 Dukɔ kple dukɔ nɔ wo nɔewo tsrɔ̃m, eye du kple du nɔ wo nɔewo tsrɔ̃m, elabena Mawu na zitɔtɔ ɖo wo dome le xaxa ɖe sia ɖe ƒomevi ta.+ 7 Ke miawo la, misẽ ŋu, eye dzi megaɖe le mia ƒo o,*+ elabena woaɖo miaƒe dɔwɔwɔ teƒe na mi.”

8 Esi Asa nya se Azariya ƒe nya siawo kple nyagblɔɖila Oded ƒe nyagblɔɖia ko la, dzi ɖo eƒo, eye wòna woɖe legba nyɔŋuwo ɖa le Yuda-nyigba+ blibo la dzi kple Benyamin kpakple du siwo wòxɔ le Efrayim tonutoa me la me, eye wòɖɔ Yehowa ƒe vɔsamlekpui si le Yehowa ƒe akpataa ŋgɔ la ɖo.+ 9 Eye wòƒo Yuda blibo la kple Benyamin nu ƒu hekpe ɖe amedzro siwo tso Efrayim kple Manase kpakple Simeon,+ siwo le wo gbɔ la ŋu, elabena amedzro gbogbo aɖee dzo le Israel va eƒe akpa dzi, esi wokpɔ be Yehowa eƒe Mawu la li kplii ta. 10 Eya ta woƒo wo nu ƒu ɖe Yerusalem le Asa ƒe fiaɖuɖu ƒe ƒe wuiatɔ̃lia ƒe ɣleti etɔ̃lia me. 11 Eye wotsɔ aboyonu siwo wotsɔ gbɔe la ƒe ɖe sa vɔ na Yehowa gbe ma gbe: nyi alafa adre kple alẽ akpe adre. 12 Gawu la, wobla nu kple Yehowa, wo tɔgbuiwo ƒe Mawu la be yewoadii tso dzi blibo kple luʋɔ* blibo me.+ 13 Ame sia ame si madi Yehowa, Israel ƒe Mawu la o la, woawui, eɖanye ɖevi alo ame tsitsi o, ŋutsu alo nyɔnu o.+ 14 Eye wodo ɣli sesĩe ka atam na Yehowa hetso aseye, eye woku kpẽwo kple lãdzowo. 15 Eye Yuda blibo la gli kple dzidzɔ le atam si woka la ta, elabena woka atam la tso dzi blibo me, eye dzidzɔ bliboe wotsɔ dii, ale be wòna woke ɖe eŋu,+ eye Yehowa na gbɔdzɔe wo le go sia go me.+

16 Fia Asa ɖe mamaa Maaka+ gɔ̃ hã ɖa be wòaganye nyɔnufia* azɔ o, elabena ewɔ legba nyɔŋu aɖe na Asera* subɔsubɔ;+ Asa mu eƒe legba nyɔŋu la ƒu anyi, eye wògbãe hetɔ dzoe ɖe Kidron-tɔʋu+ la me. 17 Ke womeɖe+ nuxeƒeawo ya ɖa le Israel o.+ Gake Asa ƒe dzi nɔ blibo le eƒe agbemeŋkekewo katã me.+ 18 Eye wòtsɔ nu siwo ŋu fofoa kɔ kple nu siwo ŋu eya ŋutɔ kɔ, va Mawu vavã la ƒe aƒe la me: klosalo kple sika kple ŋudɔwɔnuawo.+ 19 Aʋa aɖeke megadzɔ o, va se ɖe Asa ƒe fiaɖuɖu ƒe ƒe blaetɔ̃ vɔ atɔ̃lia me.+