Dɔwɔwɔwo
24 Le ŋkeke atɔ̃ megbe la, nunɔlagã Anania+ kple amegãwo dometɔ aɖewo kpakple nyanuɖela* aɖe si ŋkɔe nye Tertulo la va Kaisarea, eye wotsɔ nya si wotsɔ ɖe Paulo ŋu la ɖo nutodziɖula la ŋkume.+ 2 Esi woyɔe vɛ la, Tertulo de asi enutsotso me be:
“Esi wònye be wòe na míekpɔ ŋutifafa geɖe, eye wò nuŋububu nyuie ye na ɖɔɖɔɖowo le edzi yim le míaƒe dukɔ sia me ta la, 3 Bubutɔ Felike, míele akpe manyagblɔ dam na wò ɣesiaɣi ɖe nu siawo ta le afi sia afi. 4 Gake be magagblẽ ɣeyiɣi geɖe na wò o ta la, mele kuku ɖem na wò be nàve mía nu aɖo to mí vie ko. 5 Elabena míekpɔe be nugblẽla vɔ̃ɖi*+ aɖee ŋutsu sia nye, eye wòle zitɔtɔ+ dem Yudatɔwo katã me le anyigba dzi godoo, eye wònye Nazaretetɔwo ƒe kɔmama+ la ƒe ŋgɔnɔla. 6 Ete kpɔ hã be yeagblẽ kɔ ɖo na gbedoxɔ la, eya ta míelée.+ 7 * —— 8 Ne wò ŋutɔ èbia gbee nyuie la, ekema nya siwo katã míetsɔ ɖe eŋu la me akɔ na wò.”
9 Yudatɔwo hã de nutsotsoa dzi be nu siawo le eme nenema tututu. 10 Esi nutodziɖula la wɔ dzesi na Paulo be wòaƒo nu la, egblɔ be:
“Esi menyae nyuie be ƒe geɖee nye esia nènye dukɔ sia ƒe ʋɔnudrɔ̃la ta la, melɔ̃ faa be maƒo nu aʋli ɖokuinye ta.+ 11 Elabena àte ŋu aku eme akpɔe be, ŋkeke wuieve aɖewo koe nye esia tso esime meyi Yerusalem be maɖasubɔ;+ 12 eye womekpɔm mele nya ʋlim kple ame aɖeke le gbedoxɔa me loo alo de zi amewo me le ƒuƒoƒeawo alo le dua me o. 13 Eye womate ŋu aɖo kpe nya siwo tsɔm wole ɖe ŋunye fifi laa la hã dzi o. 14 Ke hã, melɔ̃ ɖe nya sia ya dzi le ŋkuwòme be, mele subɔsubɔdɔ kɔkɔe wɔm na tɔgbuinyewo ƒe Mawu+ la le mɔ si yɔm wole be kɔmama la nu, elabena mexɔ nu siwo katã le Se la me kple esiwo woŋlɔ ɖe Nyagblɔɖilawo ƒe agbalẽwo me la dzi se.+ 15 Eye mɔkpɔkpɔ le asinye le Mawu me, eye mɔkpɔkpɔ ma kee le ame siawo ŋutɔ hã si, be tsitretsitsi+ li na ame dzɔdzɔewo kple ame madzɔmadzɔwo siaa.+ 16 Esia tae medoa vevie nu ɣesiaɣi, be dzitsinya nyui* nanɔ asinye le Mawu kple amewo gbɔ.+ 17 Ke le ƒe geɖe megbe la, meva be matsɔ dɔmenyonunanawo+ avɛ na nye dukɔ la, eye masa vɔ hã. 18 Esi menɔ nu siawo wɔm la, woke ɖe ŋunye hekpɔe be mekɔ ɖokuinye ŋu le kɔa nu le gbedoxɔa me,+ gake ameha aɖeke menɔ ŋunye o, eye hoowɔwɔ aɖeke hã meyi edzi o. Ke Yudatɔ aɖewo tso Asia nuto me va, 19 eye ɖe wòle be ame siawo hã nava ŋkuwòme hafi, ale be ne nya aɖe le wo si ɖe ŋunye la, ne woagblɔe.+ 20 Alo, na ame siwo le afi sia la ŋutɔ nagblɔ vodada si wokpɔ le ŋunye esi metsi tsitre ɖe Sanhedrin la ŋkume, 21 negbe nya ɖeka sia ko, si medo ɣli gblɔ esime mele tsitre ɖe wo dome be: ‘Ame kukuwo ƒe tsitretsitsi la tae wole ʋɔnu drɔ̃mem egbea le mia ŋkume ɖo!’ ”+
22 Ke hã, esi Felike nya nu ku ɖe Mɔ+ sia ŋu nyuie ta la, etɔ te nya la dɔdrɔ̃ gblɔ be: “Ne aʋafiagã Lisia va ɖo ko la, matso nya me na mi.” 23 Eye wòɖe gbe na asrafomegã la be wòasika ŋutsua ɖi, gake wòana ablɔɖe aɖe sinui, eye be wòaɖe mɔ na eƒe amewo woana kpekpeɖeŋui.
24 Le ŋkeke aɖewo megbe la, Felike kple srɔ̃a Drusila, si nye Yudatɔ, la va ɖo, eye wòdɔ woɖayɔ Paulo vɛ, eye wòse Kristo Yesu dzi xɔxɔ se ŋu nya tso egbɔ.+ 25 Ke esi Paulo le nu ƒom tso dzɔdzɔenyenye kple ɖokuidziɖuɖu kpakple ʋɔnudɔdrɔ̃ si gbɔna+ ŋu la, vɔvɔ̃ ɖo Felike, eye wògblɔ be: “Heyi fifia gbɔ, ne mekpɔ asinu hã, magaɖo ame ɖe wò.” 26 Ke ele mɔ kpɔm hã be Paulo nana ga ye. Esia ta enuenu la, edɔna be woaɖakplɔe avɛ na ye, eye wòɖoa dze kplii. 27 Ke le ƒe eve megbe la, Porkio Festo va xɔ ɖe Felike teƒe; eye esi Felike di be yeƒe nu nadze Yudatɔwo+ ŋu ta la, egblẽ Paulo ɖe ga me.