Dɔwɔwɔwo
3 Esi Petro kple Yohanes yina ɖe gbedoxɔa me le gaƒoƒo asiekelia* dzi le gbedoɖaɣi la, 2 wokɔ ŋutsu aɖe si nye tekunɔ tso esime wodzii la va yi. Wokɔnɛ va dana ɖe gbedoxɔa ƒe agbo si woyɔna be Agbo Nyui la nu gbe sia gbe, ne wòabia nu ame siwo yina ɖe gbedoxɔa me. 3 Esi wòkpɔ Petro kple Yohanes wole gegem ɖe gbedoxɔa me la, ebia wo be woakpɔ nublanui na ye ana nane ye. 4 Ke Petro kple Yohanes kpɔ eƒe ŋkume dũu eye Petro gblɔ be: “Kpɔ mí ɖa.” 5 Eya ta efɔ ŋku ɖe wo dzi gãa hele mɔ kpɔm be yeakpɔ nane tso wo gbɔ. 6 Ke Petro gblɔ nɛ be: “Klosalo kple sika mele asinye o, ke nu si le asinye la, eyae mana wò: Le Yesu Kristo, Nazaretetɔ la, ƒe ŋkɔa me la, zɔ azɔli!”+ 7 Ale wòlé eƒe nuɖusi be wòatso ɖe tsitrenu.+ Enumake ŋusẽ ɖo eƒe afɔ kple eƒe afɔkɔewo ŋu;+ 8 eye wòti kpo tsi tsitre+ hete azɔli zɔzɔ, eye wòge ɖe gbedoxɔa me kpli wo le zɔzɔm le kpo tim le Mawu kafum. 9 Eye amewo katã kpɔe wòle zɔzɔm hele Mawu kafum. 10 Wokpɔe dze sii be eyae nye ŋutsu si nɔa anyi ɖe gbedoxɔ ƒe Agbo Nyui+ la nu nɔa nu biam, ale woƒe mo wɔ yaa, eye gbɔgblɔ bu ɖe wo, le nu si dzɔ la ta.
11 Ke esi ŋutsua lé ɖe Petro kple Yohanes ŋu goŋgoŋ la, amewo katã ƒu du va ƒo ƒu ɖe wo ŋu le teƒe si woyɔna be Salomo ƒe Akpata+ la me, eye woƒe nu ku. 12 Esi Petro kpɔ esia la, egblɔ na ameawo be: “Israel ŋutsuwo, nu ka tae nu sia le nuku wɔm na mi ale, alo nu ka tae miefɔ ŋku ɖe mía dzi, abe míawo ŋutɔwo ƒe ŋusẽ alo mawusosroɖae na wòzɔ azɔli ene? 13 Abraham kple Isak kpakple Yakob+ ƒe Mawu, mía tɔgbuiwo ƒe Mawu la, do eƒe Subɔla,+ Yesu,+ ɖe dzi, ame si miawo miede asi+ hegbe nu le egbɔ le Pilato ŋkume, togbɔ be eɖoe be yeaɖe asi le eŋu hafi. 14 Ɛ̃, miegbe nu le kɔkɔetɔ kple dzɔdzɔetɔ ma gbɔ, eye miebia be woaɖe asi le ŋutsu si nye amewula boŋ ŋu na mi,+ 15 eye miewu Kplɔla Vevitɔ si naa agbe+ la boŋ. Ke Mawu fɔe ɖe tsitre tso ame kukuwo dome, eye míenye nu sia ŋuti ɖasefowo.+ 16 Eƒe ŋkɔ, kple ŋkɔ sia si dzi míexɔ se la, mee ŋusẽ ɖo ŋutsu sia si kpɔm miele henya nyuie la ŋu le. Eye eya dzi xɔxɔ see na ŋutsu sia si le mi katã ŋkume la ƒe lãme sẽ keŋkeŋ le. 17 Ke azɔ nɔviwo, menya be nu si miewɔ la, miewɔe le manyamanya me,+ abe miaƒe dziɖulawo ke ene.+ 18 Ke mɔ sia dzie Mawu to na nya siwo wògblɔ do ŋgɔ to nyagblɔɖilawo ƒe nu me be yeƒe Kristo la akpe fu la va eme.+
19 “Eya ta mitrɔ dzi me,+ eye migbugbɔ,+ ne woatutu miaƒe nu vɔ̃wo ɖa,+ ale be miakpɔ dzidzemeɣiwo tso Yehowa* ŋutɔ gbɔ, 20 ne wòaɖo Kristo si wòtia na mi la ɖa, si nye Yesu. 21 Ele be dziƒo naxɔ ame sia ɖi, va se ɖe ɣeyiɣi si me woaɖɔ nuwo katã ɖo, abe ale si Mawu gblɔe to eƒe blema nyagblɔɖila kɔkɔewo ƒe nu me ene. 22 Le nyateƒe me la, Mose gblɔ be: ‘Yehowa* mia Mawu aɖo nyagblɔɖila aɖe tso mia nɔviwo dome na mi abe nye ene.+ Miɖo toe le nya siwo katã wòagblɔ na mi la me.+ 23 Le nyateƒe me la, ame sia ame* si maɖo to Nyagblɔɖila ma o la, woatsrɔ̃e ɖa keŋkeŋ le dukɔ la dome.’+ 24 Eye nyagblɔɖila siwo katã nɔ anyi tso Samuel dzi, kple ame siwo katã va ɖe eyome la dometɔ geɖe, gblɔ nya ɖi le ŋkeke siawo hã ŋuti.+ 25 Miawoe nye nyagblɔɖilawo kple nu, si Mawu bla kple mia tɔgbuiwo+ la ƒe viwo, esi wògblɔ na Abraham be: ‘Eye to wò dzidzimevi la dzi woayra anyigbadziƒomewo katã.’+ 26 Esi Mawu na eƒe Subɔla la do vɔ la, miawo gbɔe wòdɔe ɖo gbã+ be wòatrɔ mia dometɔ ɖe sia ɖe ɖa tso miaƒe nuwɔna vɔ̃ɖiwo gbɔ, ne wòayra mi.”