Dɔwɔwɔwo
11 Ke apostoloawo kple nɔvi siwo le Yudea la se be dukɔwo me tɔwo hã xɔ Mawu ƒe nya la. 2 Eya ta esi Petro va Yerusalem la, ame siwo de aʋatsotso+ dzi la he nya ɖe eŋu 3 be: “Èyi aʋamatsomatsotɔwo ƒe me heɖu nu kpli wo.” 4 Esia na Petro ɖe nya la me na wo nyuie be:
5 “Menɔ Yopa dua me nɔ gbe dom ɖa, eye mekpɔ le ŋutega me wole nane* si le abe aklala gã aɖe ene, si ƒe dzogoe eneawo wolé la, ɖiɖim tso dziƒo tẽe ɖe gbɔnye.+ 6 Esi melé ŋku ɖe eme nyuie la, mekpɔ anyigbadzilã afɔenewo kple gbemelãwo kple lã siwo tana kpakple dziƒoxewo. 7 Eye mese gbe aɖe hã si gblɔ nam be, ‘Petro, tso, wu wo nàɖu!’ 8 Ke megblɔ be: ‘Gbeɖe, Aƒetɔ, elabena nyemede nu ƒoɖi alo nu makɔmakɔ aɖeke nu me kpɔ o.’ 9 Gbe si tso dziƒo la ɖo eŋu zi evelia be: ‘Wò la, dzudzɔ nu siwo ŋuti Mawu kɔ la yɔyɔ be nu ƒoɖi.’ 10 Nu sia dzɔ zi gbɔ zi etɔ̃, eye wogahe nu sia nu dzoe yi dziƒo. 11 Eye ɣemaɣi tututu la, ŋutsu etɔ̃ le tsitre ɖe aƒe si me míele la me; wodɔ wo tso Kaisarea ɖe gbɔnye.+ 12 Eye gbɔgbɔ la gblɔ nam be mayi kpli wo, eye magake ɖi kura o. Ke nɔvi ade siawo hã yi kplim, eye míege ɖe ŋutsua ƒe aƒe me.
13 “Egblɔ na mí be yekpɔ mawudɔla wòle tsitre ɖe yeƒe aƒe me eye wògblɔ be: ‘Dɔ ame ɖo ɖe Yopa, ɖe Simon si wogayɔna be Petro gbɔ,+ 14 eye agblɔ nu siwo ana wò kple wò aƒe blibo la miakpɔ ɖeɖe la na wò.’ 15 Ke esi mede asi nuƒoƒo me la, woxɔ gbɔgbɔ kɔkɔe la, abe ale si ko míawo hã míexɔe le gɔmedzedzea me ene.+ 16 Ale meɖo ŋku Aƒetɔ la ƒe nya dzi, ale si wògblɔna be, ‘Yohanes tsɔ tsi nyrɔ amewo,+ ke woatsɔ gbɔgbɔ kɔkɔe anyrɔ miawo ya.’+ 17 Eya ta ne Mawu tsɔ nunana faa ma ke na woawo hã, abe ale si wòna mí ame siwo xɔ Aƒetɔ Yesu Kristo dzi se la hã ene ɖe, ame kae menye be maxe mɔ na Mawu?”+
18 Ke esi wose nya siawo la, wodzudzɔ nyaa hehe,* eye wokafu Mawu gblɔ be: “Ekema Mawu na mɔnukpɔkpɔ dukɔwo me tɔwo hã be woatrɔ dzi me, ne woakpɔ agbe.”+
19 Le ɣeyiɣi sia me la, ame siwo ka hlẽ+ le xaxa si va le Stefano ƒe ku megbe la yi keke Foinike kple Kipro kpakple Antiokia ke, gake Yudatɔwo ɖeɖe koe wonɔ nyaa gblɔm na.+ 20 Ke ame aɖewo le wo dome siwo tso Kipro kple Kirene va Antiokia, eye woƒoa nu na Helagbe dolawo henɔa Aƒetɔ Yesu ŋuti nya nyui la gblɔm na wo. 21 Yehowa* ƒe asi hã nɔ wo dzi, eye ame geɖe va zu xɔsetɔwo hetrɔ ɖe Aƒetɔ la ŋu.+
22 Hame si le Yerusalem la se wo ŋu nya, eye wodɔ Barnaba+ ɖo ɖe keke Antiokia ke. 23 Esi wòva ɖo eye wòkpɔ ale si Mawu ve wo nui la, dzi dzɔe ŋutɔ, eye wòde dzi ƒo na wo katã be woayi edzi aɖoe kplikpaa le woƒe dzi me be yewoanɔ Aƒetɔ la me;+ 24 elabena ame nyui wònye, gbɔgbɔ kɔkɔe la yɔe fũu eye xɔse sẽŋu le esi. Eye ameha gã aɖe va xɔ Aƒetɔ la dzi se.+ 25 Eye wòdzo yi Tarso be yeaɖadi Saul ake ɖe eŋu godoo.+ 26 Esi wòkpɔe la, ekplɔe va Antiokia. Wonɔ hamea gbɔ ƒe blibo ɖeka, ƒoa ƒu kpli wo, eye wofia nu ame gbogbo aɖewo. Antiokia ye woyɔ nusrɔ̃lawo le zi gbãtɔ be Kristotɔwo le Mawu ƒe mɔfiafia te.+
27 Le ŋkeke mawo me la, nyagblɔɖilawo+ tso Yerusalem va Antiokia. 28 Wo dometɔ ɖeka si ŋkɔe nye Agabo+ la tsi tsitre, eye gbɔgbɔ la ʋãe wògblɔ be eteƒe madidi o, dɔ gã aɖe ato le anyigba blibo la dzi,+ eye esia va eme vavã le Klaudio ŋɔli. 29 Eya ta nusrɔ̃lawo ɖoe be yewoaɖo kpekpeɖeŋununana,*+ ale si wo dometɔ ɖe sia ɖe ate ŋui,+ ɖe nɔvi siwo le Yudea; 30 nu siae wowɔ hã, eye wotsɔe de Barnaba kple Saul si ɖo ɖe hamemetsitsiawo.+