Dɔwɔwɔwo
25 Eya ta esi Festo+ va ɖo dziɖuƒea hedze eƒe dɔ gɔme la, etso Kaisarea yi Yerusalem le ŋkeke etɔ̃ megbe. 2 Eye nunɔlawo ƒe tatɔwo kple Yudatɔwo ƒe ame ŋkutawo tso Paulo nu nɛ.+ Eye woɖe kuku na Festo be 3 wòave yewo nu adɔ ame woakplɔ Paulo ava Yerusalem. Ke woɖoe be yewoade xa ɖi awu Paulo le mɔa dzi.+ 4 Gake Festo ɖo eŋu be ele be Paulo nanɔ Kaisarea, elabena ye ŋutɔ yeagatrɔ ayi afi ma kpuie. 5 Eye wògblɔ be: “Eya ta amegã siwo le mia dome la nayi kplim ne woaɖatso enu, ne ŋutsu la wɔ nu gbegblẽ aɖe nyateƒe.”+
6 Esi wònɔ wo gbɔ anɔ ŋkeke enyi alo ewo la, eyi Kaisarea, eye esi ŋu ke la, ebɔbɔ nɔ ʋɔnudrɔ̃zikpui la dzi, eye wòɖe gbe be woakplɔ Paulo avɛ. 7 Esi wòva ɖo la, Yudatɔ siwo tso Yerusalem va la ƒo xlãe, eye wotsɔ nya gã nya gãwo ɖe eŋu, evɔ womete ŋu nɔ kpe ɖom nutsotsoawo dzi o.+
8 Ke Paulo ʋli eɖokui ta gblɔ be: “Nyemeda Yudatɔwo ƒe Se aɖeke dzi alo gblẽ kɔ ɖo na gbedoxɔ la alo wɔ nu vɔ̃ ɖe Kaisaro ŋu o.”+ 9 Esi Festo di be yeƒe nu nadze Yudatɔwo+ ŋu ta la, ebia Paulo be: “Èdi be yeayi Yerusalem ne madrɔ̃ nya siawo na wò le afi ma?” 10 Ke Paulo gblɔ be: “Kaisaro ƒe ʋɔnudrɔ̃zikpui la ŋgɔe metsi tre ɖo, eye afi siae wòle be woadrɔ̃ ʋɔnum le. Nyemeda vo aɖeke ɖe Yudatɔwo ŋu o, abe ale si wò ŋutɔ hã nèva le ekpɔm ene. 11 Ne nu gbegblẽ wɔlae menye vavã, eye mewɔ nu si dze ku+ la, nyemegbe ku o; gake ne nya siwo wotsɔ ɖe ŋunye la dometɔ aɖeke mele eme o la, ekema ame aɖeke mekpɔ mɔ atsɔm ade asi na wo, be yeadze wo ŋu o. Kaisaro negbugbɔ nye nya la drɔ̃ nam!”+ 12 Esi Festo lé nya la kpɔ kple adaŋudelawo vɔ la, eɖo eŋu be: “Èbe Kaisaro negbugbɔ nya la drɔ̃ na ye; eya ta àyi Kaisaro gbɔ.”
13 Ke esi ŋkeke aɖewo va yi la, Fia Agripa kple Bernike va Kaisarea be yewoado gbe na Festo. 14 Esi wonɔ afi ma ŋkeke geɖe ta la, Festo tsɔ Paulo ƒe nya la ɖo fia la ŋkume be:
“Felike gblẽ ŋutsu aɖe ɖe ga me, 15 eye esi meyi Yerusalem la, nunɔlawo ƒe tatɔwo kple Yudatɔwo ƒe amegãwo tsɔ nya ɖe eŋu+ hebia be mabu fɔe. 16 Ke meɖo eŋu na wo be menye Romatɔwo ƒe ɖoɖo wònye be woatsɔ ame ade asi, kple susu be woadze ame ŋu, hafi ame si nu wotso la kple enutsolawo nakpe ŋkume kple ŋkume, ne wòaʋli eɖokui ta o.+ 17 Eya ta esi wova ɖo afi sia la, nyemehe ɖe megbe kura o, ke boŋ esi ŋu ke la, mebɔbɔ nɔ ʋɔnudrɔ̃zikpui la dzi eye mena wokplɔ ŋutsua vɛ. 18 Esi enutsolawo tsi tsitre la, wometsɔ nya vɔ̃ aɖeke ɖe eŋu abe ale si mebui ene o.+ 19 Ðeko wohe nya aɖewo kplii le woawo ŋutɔwo ƒe mawu la subɔsubɔ*+ kple ŋutsu aɖe si ŋkɔe nye Yesu si ku, gake Paulo ya yi edzi le tɔ tem ɖe edzi be ele agbe la ŋuti.+ 20 Esi metɔtɔ eye nyemenya ale si makpɔ woƒe nyaʋiʋli siawo gbɔe o ta la, mebiae be edi be yeayi Yerusalem ne woadrɔ̃ ʋɔnui tso nya siawo ŋu le afi ma hã.+ 21 Ke Paulo bia be yeanɔ ga me le afii va se ɖe esime Fiagã Bubutɔ*+ la natso nya me na ye, eya ta mede se be woasikae ɖi va se ɖe esime maɖoe ɖe Kaisaro.”
22 Agripa gblɔ na Festo be: “Nye ŋutɔ madi be mase ŋutsua ƒe numegbe.”+ Egblɔ be: “Etsɔ la, àsee.” 23 Eya ta esi ŋu ke la, Agripa kple Bernike va le atsyɔ̃ɖoɖo gã me, eye wo kple aʋafiagãwo kpakple dua me ame ŋkutawo woge ɖe takpexɔa me, eye Festo ɖe gbe be woakplɔ Paulo vɛ. 24 Eye Festo gblɔ be: “Fia Agripa kple mi ame siwo katã le mía gbɔ afi sia, ŋutsu sia si kpɔm miele la tae Yudatɔwo ƒe ha blibo la va do ɖe dzinye le Yerusalem kple afi sia, henɔ ɣli dom be medze be wòaganɔ agbe o.+ 25 Ke nye ya mekpɔe be mewɔ naneke si dze ku o.+ Eya ta esi ŋutsu sia ŋutɔ bia be Fiagã Bubutɔ La nagbugbɔ yeƒe nya la adrɔ̃ na ye ta la, metso nya me be maɖoe ɖee. 26 Gake nya gobi aɖeke mele asinye maŋlɔ tso eŋu aɖo ɖe nye Aƒetɔ la o. Eya ta mekplɔe va mi katã mia ŋkume, vevietɔ va wò, Fia Agripa, ŋkume ale be ne míedzro nya la me le ʋɔnua vɔ la, ɖewohĩ makpɔ nane aŋlɔ. 27 Elabena mekpɔe be susu mele eme be woaɖo gamenɔla aɖe ɖa, evɔ womaŋlɔ nutsotso aɖeke akpe ɖe eŋu o.”