Nyaɖeɖefia
17 Eye mawudɔla adre, siwo si kplu adreawo+ le la, dometɔ ɖeka va gblɔ nam be: “Va mafia gbolo gã si bɔbɔ nɔ tsi geɖewo dzi la ƒe ʋɔnudɔdrɔ̃ wò,+ 2 anyigbadzifiawo wɔ ahasi* kplii,+ eye anyigbadzinɔlawo no eƒe ahasiwɔwɔ* ƒe wain la mu.”+
3 Eye wòkɔm le gbɔgbɔ la ƒe ŋusẽ me yi gbedzi. Eye mekpɔ nyɔnu aɖe wòbɔbɔ nɔ lã wɔadã aɖe si biã helĩhelĩ, si ŋuti yɔ fũu kple busuŋkɔwo, eye ta adre kple dzo ewo li nɛ, la dzi. 4 Eye nyɔnu la do aɖabɛwu+ kple awu dzĩ, eye wòtsɔ sika kple kpe xɔasiwo kple dzonuwo+ ɖo atsyɔ̃ na eɖokui, eye wòlé sikakplu aɖe si yɔ taŋ kple ŋunyɔnuwo kpakple nu makɔmakɔ siwo wòkpɔ tso eƒe ahasiwɔwɔ* me la ɖe asi. 5 Eye woŋlɔ ŋkɔ aɖe, si nye nya ɣaɣla, ɖe eƒe ŋgonu be: “Babilon Gã la, gbolowo+ kple anyigbadziŋunyɔnuwo dada.”+ 6 Eye mekpɔ be nyɔnu la mu ame kɔkɔewo ƒe ʋu kple Yesu ƒe ɖasefowo ƒe ʋu.+
Esi mekpɔe la, ewɔ moyaa nam ŋutɔ. 7 Eye mawudɔla la biam be: “Nu ka tae wòwɔ moyaa na wò ɖo? Magblɔ nyɔnu+ la kple lã wɔadã si dzi wòbɔbɔ nɔ, si si ta adreawo kple dzo ewoawo+ le la, ŋuti nya ɣaɣla la na wò: 8 Lã wɔadã si nèkpɔ la nɔ anyi kpɔ, gake megali o, ado tso aʋli me,+ eye wòayi ɖe tsɔtsrɔ̃ me. Eye anyigbadzinɔla siwo ƒe ŋkɔwo womeŋlɔ ɖe agbegbalẽ+ si li tso xexea ƒe gɔmeɖoanyiɣi* la me o la, ƒe mo awɔ yaa ne wokpɔ ale si lã wɔadã la nɔ anyi kpɔ, ke megali o, eye wògado la.
9 “Esia hiã susu si me nunya le: Ta adreawo+ le tsitre ɖi na to adre, siwo dzi nyɔnu la bɔbɔ nɔ anyi ɖo. 10 Eye wonye fia adre: Atɔ̃ dze anyi, ɖeka li, mamlɛtɔ la meva ɖo haɖe o; ke ne eva ɖo la, anɔ anyi ɣeyiɣi vi aɖe ko. 11 Eye lã wɔadã si nɔ anyi kpɔ, gake megali o+ lae nye fia enyilia, ke fia adreawo mee wòdo tso, eye wòyina ɖe tsɔtsrɔ̃ me.
12 “Eye dzo ewo siwo nèkpɔ la le tsitre ɖi na fia ewo, siwo mexɔ fiaɖuƒe haɖe o, ke woana ŋusẽ wo woanye fiawo kpe ɖe lã wɔadã la ŋu gaƒoƒo ɖeka. 13 Taɖodzinu ɖekae le wo si, eya ta wotsɔ woƒe ŋutete kple ŋusẽ na lã wɔadã la. 14 Woawɔ aʋa kple Alẽvi+ la, gake esi wònye aƒetɔwo ƒe Aƒetɔ kple fiawo ƒe Fiae+ Alẽvi la nye ta la, aɖu wo dzi.+ Eye ame siwo kpe ɖe eŋu, siwo nye ame yɔyɔwo kple ame tiatiawo kple nuteƒewɔlawo la hã aɖu wo dzi.”+
15 Eye wògblɔ nam be: “Tsi siwo nèkpɔ, siwo dzi gbolo la bɔbɔ nɔ la, le tsitre ɖi na amewo kple amehawo kple dukɔwo kpakple gbegbɔgblɔwo.+ 16 Eye dzo ewo+ siwo nèkpɔ kple lã wɔadã+ la, woawo alé fu gbolo+ la, woagblẽe aɖe amae, aɖu eƒe ŋutilã, eye woatɔ dzoe wòafiã keŋkeŋ.+ 17 Elabena Mawu tsɔe de woƒe dzi me be woawɔ nu si yeɖo ɖe tame la dzi,+ si nye be woawɔ woƒe tameɖoɖo ɖeka la dzi, be woatsɔ woƒe fiaɖuƒe ana lã wɔadã+ la, va se ɖe esime Mawu ƒe nyawo nava eme. 18 Eye nyɔnu+ si nèkpɔ la, le tsitre ɖi na du gã, si ƒe fiaɖuƒe kpɔ ŋusẽ ɖe anyigbadzifiawo dzi la.”