Nyaɖeɖefia
13 Eye ʋɔ driba la tɔ ɖe ƒutake la dzi.
Eyome mekpɔ lã wɔadã+ aɖe wòle dodom tso atsiaƒu+ me, dzo ewo kple ta adre li nɛ, fiakuku ewo le eƒe dzoawo dzi, eye busuŋkɔwo le eƒe taawo ŋu. 2 Lã wɔadã si mekpɔ la le abe lãklẽ ene, gake eƒe afɔwo le abe sisiblisi tɔwo ene, eye eƒe nu le abe dzata ƒe nu ene. Eye ʋɔ driba+ la tsɔ eƒe ŋutete, fiazikpui kple ŋusẽ gã na lã la.+
3 Eye eƒe tawo dometɔ ɖeka dze abe ɖe wode kubi eŋu ene, ke eƒe kubi la ku nɛ,+ eye anyigbadzinɔlawo katã ƒe mo wɔ yaa, eye wodze lã la yome. 4 Wode ta agu na ʋɔ driba la, elabena etsɔ eƒe ŋusẽ na lã wɔadã la, eye wode ta agu na lã wɔadã la gblɔ be: “Ame kae le abe lã wɔadã la ene, eye ame kae ate ŋu awɔ aʋa kplii?” 5 Eye wotsɔ nu, si gblɔa nya gã nya gãwo kple busunyawo la nɛ, eye wona ŋusẽe be wòawɔ dɔ ɣleti blaene vɔ eve.+ 6 Eke nu gblɔ busunyawo+ ɖe Mawu, eƒe ŋkɔ kple eƒe nɔƒe kpakple ame siwo le dziƒo ŋu.+ 7 Eye woɖe mɔ nɛ be wòawɔ aʋa kple ame kɔkɔewo ahaɖu wo dzi,+ eye wona ŋusẽe ɖe to sia to kple ame ɖe sia ɖe ƒomevi kple gbegbɔgblɔ sia gbegbɔgblɔ kpakple dukɔ sia dukɔ dzi. 8 Eye anyigbadzinɔlawo katã ade ta agu nɛ. Womeŋlɔ wo dometɔ aɖeke ƒe ŋkɔ ɖe Alẽvi si wowu la ƒe agbegbalẽ+ si li tso xexea ƒe gɔmeɖoanyiɣi* la me o.+
9 Ame si to li na la, nesee.+ 10 Ne aboyo mee wòle be ame aɖe nayi la, ayi aboyo me. Ne ame aɖe wu ame kple yi la,* woawu eya hã kple yi.+ Afi siae ame kɔkɔewo+ ƒe dzidodo+ kple xɔse+ hiã le.
11 Mekpɔ lã wɔadã bubu aɖe wòle dodom tso anyigba me, eye dzo eve le eta abe alẽvi tɔ ene, ke ede asi nuƒoƒo me abe ʋɔ driba ene.+ 12 Eye wòwɔ lã wɔadã+ gbãtɔ la ƒe ŋusẽwo katã ŋu dɔ le eƒe ŋkume. Eye wòna anyigba kple edzinɔlawo de ta agu na lã wɔadã gbãtɔ si ƒe kubi ku nɛ la.+ 13 Ewɔ dzesi gãwo, eye wòna dzo gɔ̃ hã ge tso dziƒo va dze anyigba dzi le amegbetɔwo ŋkume.
14 Eye wòflua anyigbadzinɔlawo to dzesi siwo woɖe mɔ nɛ be wòawɔ le lã wɔadã la ŋkume la me, eye wògblɔna na ame siwo le anyigba la dzi hã be woawɔ lã wɔadã si ŋu wotsɔ yi de abii, eye wògagbɔ agbe la,+ ƒe legba.+ 15 Eye woɖe mɔ nɛ be wòade gbɔgbɔ lã wɔadã la ƒe legba la me, ne lã wɔadã la ƒe legba la naƒo nu, eye wòana woawu ame siwo katã gbe be yewomade ta agu na lã wɔadã la ƒe legbaa o la.
16 Eye wòzi amewo katã, ɖeviwo kple tsitsiawo, kesinɔtɔwo kple ame dahewo, ablɔɖemewo kple kluviwo dzi be woaxɔ dzesi ɖe woƒe nuɖusi alo woƒe ŋgonu,+ 17 eye be ame aɖeke nagate ŋu aƒle nu alo adzra nu o, negbe ame si ŋu dzesi, si nye lã wɔadã la ƒe ŋkɔ+ alo xexlẽdzesi si le tsitre ɖi na eƒe ŋkɔ, le la ko.+ 18 Afi siae nunya hiã le: Ame si sea nu gɔme la, nebu lã wɔadã la ƒe xexlẽdzesia kpɔ, elabena ame ƒe xexlẽdzesi wònye; eye eƒe xexlẽdzesie nye alafa ade blaade vɔ ade.+