Dɔwɔwɔwo
18 Le nu siawo megbe la, Paulo dzo le Atene yi Korinto. 2 Eye wòkpɔ Yudatɔ aɖe si ŋkɔe nye Akwila,+ si nye Ponto vidzidzi, ame si kple srɔ̃a Priskila wotso Italia va eteƒe medidi o, elabena Klaudio de se be Yudatɔwo katã nadzo le Roma. Ale wòyi wo gbɔ, 3 eye esi eya kple ame siawo nye dɔ ɖeka ƒomevi wɔlawo ta la, edze woƒe aƒe me, eye wowɔ dɔ ɖekae,+ elabena avɔgbadɔwɔlawoe wonye. 4 Ke hã, eƒoa nu* le ƒuƒoƒe+ la le sabat ɖe sia ɖe dzi,+ eye wòna Yudatɔ kple Helatɔ geɖewo trɔ susu heva zu xɔsetɔwo.
5 Esi Sila+ kple Timoteo+ tso Makedonia va la, Paulo tsɔ nya la gbɔgblɔ ɖo dɔ koŋ, eye wòɖia ɖase na Yudatɔwo heɖoa kpe edzi be Yesu ye nye Kristo la.+ 6 Ke esi woyi edzi le tsitre tsim ɖe eŋu, eye wole nya manyomanyowo gbɔgblɔ dzi la, eʋuʋu eƒe awuwo,+ eye wògblɔ na wo be: “Miaƒe ʋu neva miawo ŋutɔwo miaƒe ta dzi.+ Nye ya ŋutinye kɔ.+ Tso esia dzi la, mayi dukɔwo me tɔwo gbɔ.”+ 7 Eya ta edzo le afi ma,* eye wòyi ŋutsu aɖe si vɔ̃a Mawu, si ŋkɔe nye Titio Yusto ƒe aƒe me. Eƒe aƒe la te ɖe ƒuƒoƒea ŋu. 8 Ke Krispo,+ si nye ƒuƒoƒea dzi kpɔla kple eƒe aƒe blibo la xɔ Aƒetɔ la dzi se. Eye Korintotɔ geɖe siwo see la hã xɔ edzi se, eye wonyrɔ wo. 9 Gawu la, Aƒetɔ la gblɔ na Paulo le ŋutega me le zã me be: “Mègavɔ̃ o, ke boŋ yi edzi nànɔ nya la gblɔm, eye ɖoɖoe megazi le nuwò o, 10 elabena meli kpli wò,+ eye ame aɖeke matso ɖe ŋuwò awɔ nu vevi wò o; elabena ame geɖewo le du sia me siwo nye tɔnyewo.” 11 Ale wònɔ afi ma ƒe ɖeka kple ɣleti ade nɔ Mawu ƒe nya la fiam wo.
12 Ke esime Galio nye nuto gã dziɖula* le Akaya la, Yudatɔwo wɔ ɖeka tso ɖe Paulo ŋu, eye wokplɔe va ʋɔnudrɔ̃zikpui la ŋgɔ, 13 gblɔ be: “Ame sia le susu trɔm na amewo be woasubɔ Mawu le mɔ si tsi tre ɖe sea ŋu la nu.” 14 Ke esi Paulo be yeake nu la, Galio gblɔ na Yudatɔwo be: “Oo, Yudatɔwo, ne nu gbegblẽ alo nu vɔ̃ gã aɖee wòwɔ la, ekema asɔ be magbɔ dzi ɖi asee na mi. 15 Gake ne nyagbɔgblɔwo kple ŋkɔwo kpakple miawo ŋutɔwo miaƒe se la ŋuti nyaʋiʋliwoe la,+ ekema miawo ŋutɔwo mikpɔ egbɔ. Nyemedi be madrɔ̃ nya siawo tɔgbi o.” 16 Ale wònya wo ɖa le ʋɔnudrɔ̃zikpui la ŋgɔ. 17 Ke wo katã wolé Sostene,+ si nye ƒuƒoƒea dzi kpɔla la, eye woƒoe le ʋɔnudrɔ̃zikpui la ŋgɔ. Ke Galio mede nu nya siawo katã me kura o.
18 Esi Paulo ganɔ afi ma ŋkeke aɖewo megbe la, eklã nɔviawo, eye wòɖo tɔdziʋu ɖo ta Siria, eye Priskila kple Akwila yi kplii. Ena wokpa ɖa nɛ le Kenkrea,+ le adzɔgbe aɖe si wòɖe ta. 19 Esi wova ɖo Efeso la, egblẽ wo ɖe afi ma; ke ege ɖe ƒuƒoƒe la, eye wòdzro nu me kple Yudatɔwo.+ 20 Togbɔ be woɖe kuku nɛ be wòaganɔ yewo gbɔ vie hã la, melɔ̃ o, 21 ke boŋ eklã wo gblɔ be: “Ne Yehowa lɔ̃ la, magatrɔ ava mia gbɔ.” Eɖo tɔdziʋu tso Efeso 22 eye wòva ɖi go ɖe Kaisarea. Eye wòyi* ɖado gbe na hame la; emegbe wòtɔ edzi yi Antiokia.+
23 Esi wònɔ afi ma vie la, edzo yi Galatia nutoa kple Frigia+ ƒe teƒeteƒewo hele ŋusẽ dom nusrɔ̃lawo katã.+
24 Ke Yudatɔ aɖe si ŋkɔe nye Apolo,+ si nye Aleksandria vidzidzi la va Efeso; enye nuƒola bibi aɖe, eye wònya Ŋɔŋlɔawo nyuie. 25 Wofia Yehowa* ƒe mɔ la ŋutsu sia, eye esi wònye be ‘exɔ dzo le gbɔgbɔ la me’ ta la, enɔ nu ƒom nɔ nu fiam tso Yesu ŋu ɖe eteƒe tututu, gake nyɔnyrɔxɔxɔ si Yohanes ɖe gbeƒãe ŋu nya koe wònya nyuie. 26 Ede asi nuƒoƒo me dzideƒotɔe le ƒuƒoƒe la, eye esi Priskila kple Akwila+ se eƒe nyawo la, wokplɔe ɖe wo ɖokui ŋu, eye woɖe Mawu ƒe mɔ la me nɛ nyuie wu. 27 Ke esi wòle didim be yeayi Akaya ta la, nɔviawo ŋlɔ agbalẽ ɖo ɖe nusrɔ̃laawo, eye wode dzi ƒo na wo be woaxɔe nyuie. Ale, esi wòɖo afi ma la, ekpe ɖe ame siwo nu Mawu ve wova zu xɔsetɔwo la ŋu geɖe ŋutɔ; 28 elabena eɖoa kpe edzi kple ŋusẽ le dutoƒo be Yudatɔwo da ƒu, eye wòtsɔa Ŋɔŋlɔawo ɖenɛ fiana be Yesu ye nye Kristo la.+