Dɔwɔwɔwo

13 Ke nyagblɔɖilawo kple nufialawo le hame si le Antiokia la me:+ Barnaba kple Simeon si woyɔna be Niger, kple Lukio si tso Kirene, kple Manaen, ame si kple nutodziɖula Herodes woxɔ hehe ɖekae, kpakple Saul. 2 Esi wole subɔsubɔdɔ wɔm na Yehowa,* eye wotsi nu dɔ la, gbɔgbɔ kɔkɔe la gblɔ be: “Miɖe Barnaba kple Saul+ ɖe vovo nam hena dɔ si ta meyɔ wo ɖo la.”+ 3 Ale wotsi nu dɔ hedo gbe ɖa, eye esi woda woƒe asiwo ɖe wo dzi vɔ la, wodo mɔ wo.

4 Ale ame siawo, siwo gbɔgbɔ kɔkɔe la dɔ la, yi Seleukia, eye tso afi ma woɖo tɔdziʋu yi Kipro. 5 Esi wova ɖo Salami la, woyi ɖagblɔ Mawu ƒe nya la le Yudatɔwo ƒe ƒuƒoƒewo. Yohanes hã nɔ wo ŋu nɔ kpekpem ɖe wo ŋu.+

6 Esi wotsa le ƒukpo bliboa dzi va ɖo keke Pafo ke la, wodo go Yuda ŋutsu aɖe si ŋkɔe nye Bar-Yesu, ame si nye dzotɔ kple aʋatsonyagblɔɖila. 7 Enɔ nuto gã dziɖula* Sergio Paulo, si nye ŋutsu nyanu aɖe la gbɔ. Dziɖula sia yɔ Barnaba kple Saul vɛ, eye wòdi vevie be yease Mawu ƒe nya la. 8 Ke Elima si nye dzotɔ la (elabena aleae woɖe eƒe ŋkɔa gɔmee) tsi tsitre ɖe wo ŋu, eye wòdi be yeatrɔ nuto gã dziɖula la tso xɔse la gbɔ. 9 Esi gbɔgbɔ kɔkɔe la yɔ Saul si wogayɔna be Paulo fũu la, efɔ ŋku ɖe edzi gãa, 10 eye wògblɔ be: “Oo, wò, ame si yɔ fũu kple amefuflu kple nu vɔ̃ɖiwo katã ƒomevi, wò, Abosam vi,+ wò, nu dzɔdzɔewo katã ƒe futɔ, màdzudzɔ Yehowa* ƒe mɔ dzɔdzɔewo gɔglɔ̃ oa? 11 Kpɔ ɖa! Yehowa* kɔ asi dzi ɖe ŋuwò, wò ŋku agbã, eye màgakpɔ ɣe ƒe keklẽ o va se ɖe ɣeyiɣi aɖe.” Enumake eƒe ŋku dzi tsyɔ eye wòtsi viviti me, eye wòle togodoe dom le ame dim be wòalé yeƒe alɔnu akplɔ ye. 12 Esi nuto gã dziɖula la kpɔ nu si dzɔ la, ezu xɔsetɔ, elabena Yehowa* ƒe nufiafia la wɔ dɔ ɖe edzi ale gbegbe.

13 Azɔ Paulo kple eƒe zɔhɛawo ɖo tɔdziʋu tso Pafo, eye wova ɖo Perga le Pamfilia. Ke Yohanes+ trɔ le wo yome gbugbɔ yi Yerusalem.+ 14 Gake woawo ya woyi mɔzɔzɔa dzi tso Perga va ɖo Antiokia le Pisidia. Woyi ƒuƒoƒe+ la le Sabat dzi eye wobɔbɔ nɔ anyi. 15 Esi woxlẽ Se+ la kple Nyagblɔɖilawo ƒe agbalẽwo na ameawo vɔ la, ƒuƒoƒea dzi kpɔlawo ɖo ame ɖe wo be: “Ŋutsuwo, nɔviwo, ne dzideƒonamenya aɖe le mia si na amehaa la, migblɔe.” 16 Ale Paulo tso, eye wòwɔ asi na ameawo gblɔ be:

“Ŋutsuwo, Israel-viwo kple mi ame siwo vɔ̃a Mawu, miɖo tom. 17 Israel dukɔ sia ƒe Mawu la tia mía tɔgbuiwo hedo dukɔ la ɖe dzi esime wonye amedzrowo le Egipte-nyigba dzi, eye wòtsɔ eƒe ŋusẽ triakɔ* kplɔ wo dzoe le afi ma.+ 18 Eye le gbea dzi la, edo dzi tsɔ woƒe nuwɔnawo ƒe blaene sɔŋ.+ 19 Esi wòtsrɔ̃ dukɔ adre le Kanaan-nyigba la dzi vɔ la, ema woƒe anyigba na wo wòzu woƒe domenyinu.+ 20 Nu siawo katã dzɔ le ƒe alafa ene blaatɔ̃ me.

“Le nu siawo megbe la, ena ʋɔnudrɔ̃lawo wo, va se ɖe nyagblɔɖila Samuel dzi.+ 21 Esia megbe wobia be woaɖo fia na yewo,+ eye Mawu tsɔ Saul, Kis viŋutsu si tso Benyamin-toa me+ la na wo ƒe blaene. 22 Esi wòɖee ɖa vɔ la, etia David be wòanye fia na wo,+ ame si ŋu wòɖi ɖase le be: ‘Mekpɔ David, Isai vi,+ ŋutsu si ƒe nu dze nye dzi ŋu;+ eyae awɔ nu siwo katã medi la.’ 23 Mawu na ɖela si nye Yesu do tso ame sia me na Israel le eƒe ŋugbedodo la nu.+ 24 Do ŋgɔ na ame sia ƒe vava la, Yohanes ɖe gbeƒã nyɔnyrɔxɔxɔ, si nye dzimetɔtrɔ ƒe dzesi, na Israel dukɔ blibo la.+ 25 Ke esi Yohanes nɔ eƒe subɔsubɔdɔa nu wum la, egblɔna be: ‘Ame kae miesusu be menye? Menye nyee nye ame ma o. Kpɔ ɖa, ame aɖe le megbenye gbɔna, ame si ƒe afɔkpaka nyemedze atu o.’+

26 “Ŋutsuwo, nɔviwo, mi Abraham ƒe ƒomea me tɔwo kple mi ame siwo vɔ̃a Mawu, woɖo xɔxɔ sia ƒe nya la ɖe mí.+ 27 Elabena Yerusalem nɔlawo kple woƒe dziɖulawo mede dzesi ame sia o, ke esi wole ʋɔnu drɔ̃m la, wona nya siwo Nyagblɔɖilawo gblɔ la va eme,+ nya siwo woxlẽna míesena le sabat ɖe sia ɖe dzi. 28 Togbɔ be womekpɔ naneke si ta woatso kufia nɛ o+ hã la, wobia tso Pilato si be wòawui.+ 29 Ke esi wowɔ nu siwo katã woŋlɔ ɖi le eŋuti vɔ la, woɖee le atia ŋu, eye wotsɔe mlɔ yɔdo* me.+ 30 Gake Mawu fɔe ɖe tsitre tso ame kukuwo dome,+ 31 eye ame siwo tso Galilea yi Yerusalem kplii la kpɔe ŋkeke geɖe. Ame siawoe le ɖase ɖim tso eŋu na dukɔ la fifia.+

32 “Eya ta ŋugbe si wodo na tɔgbuiawo la ŋu nya nyui gblɔm míele na mi. 33 Mawu na wòva eme bliboe na mí ame siwo nye wo viwo esi wòfɔ Yesu ɖe tsitre;+ abe ale si woŋlɔe ɖe psalmo evelia me ene be, ‘Vinyee nènye, mezu fofowò egbe.’+ 34 Eye nyateƒenya si wònye be Efɔe ɖe tsitre tso ku me ale be magazu ŋutilã si nyunyɔna akpɔ o la, Egblɔe ale: ‘Maɖe lɔlɔ̃ mavɔ si ŋugbe medo na fia David, si ŋu kakaɖedzi le la, afia mi.’+ 35 Esia tae psalmo bubu gblɔ be: ‘Màɖe mɔ ame si wɔa nuteƒe na wò la nanyunyɔ o.’+ 36 David subɔ Mawu hewɔ eƒe lɔlɔ̃nu le eŋɔli, eye wòdɔ alɔ̃ le ku me, wotsɔe mlɔ tɔgbuiawo gbɔ, eye wònyunyɔ.+ 37 Ke ame si Mawu fɔ ɖe tsitre ya menyunyɔ o.+

38 “Eya ta nɔviwo, minya esia be, to ame sia dzi la, wole gbeƒã ɖem nu vɔ̃wo tsɔtsɔ ke na mi;+ 39 eye le nu siwo katã me womate ŋu abu mi ame maɖifɔwoe le Mose ƒe Sea+ me o la, wobua ame sia ame si xɔna sena la ame maɖifɔe to ame sia ya dzi.+ 40 Eya ta mikpɔ nyuie be nya si wogblɔ ɖe Nyagblɔɖilawo ƒe agbalẽawo me la nagaɖi mia ŋu o, be: 41 ‘Mi vlodolawo, mikpɔe, miaƒe nu neku ne miatsrɔ̃, elabena mele dɔ aɖe wɔm le miaƒe ŋkekeawo me, eye ne ame aɖe gblɔ dɔ sia ŋu nya na mi tsitotsito hã la, miaxɔ edzi ase akpɔ o.’ ”+

42 Ke esi wodo yina la, ameawo ɖe kuku na wo vevie be woagagblɔ nya siawo na yewo le Sabat si kplɔe ɖo la dzi. 43 Esi ƒuƒoƒea me tɔwo kaka la, Yudatɔwo kple ame siwo trɔ dzi me zu Yudatɔwo, siwo vɔ̃a Mawu la, dometɔ geɖewo dze Paulo kple Barnaba yome, eye esi woƒo nu na wo la, woxlɔ̃ nu wo be woayi edzi anɔ Mawu ƒe amenuveve la me.+

44 Le Sabat si kplɔe ɖo dzi la, du blibo la katã kloe va ƒo ƒu be yewoase Yehowa* ƒe nya. 45 Esi Yudatɔwo kpɔ amehaawo la, woyɔ fũu kple ŋuʋaʋã, eye wode asi busunya gbɔgblɔ me ɖe nya siwo gblɔm Paulo le la ŋu.+ 46 Eye Paulo kple Barnaba gblɔ na wo vɔvɔ̃manɔmee be: “Ehiã be woagblɔ Mawu ƒe nya la na mi gbã.+ Gake esi miegbe nya la, eye miele mia ɖokui bum be yewomedze na agbe mavɔ o ta la, kpɔ ɖa, míetrɔ ɖe dukɔwo ŋu.+ 47 Yehowa* de se na mí be, ‘Meɖo wò be nànye dukɔwo ƒe kekeli, be nànye xɔxɔ va se ɖe anyigba ƒe seƒe ke.’ ”+

48 Esi dukɔwo me tɔwo se nya sia la, wokpɔ dzidzɔ, eye wokafu Yehowa* ƒe nya la, eye ame siwo si dzi ƒe nɔnɔme nyui le hena agbe mavɔ kpɔkpɔ la zu xɔsetɔwo. 49 Hekpe ɖe eŋu la, wokaka Yehowa* ƒe nya la ɖe nuto blibo la me. 50 Ke Yudatɔwo de zi nyɔnu bubume siwo vɔ̃a Mawu kple dua me ame ŋkutawo me be woatso ɖe Paulo kple Barnaba ŋu,+ eye wonya wo le woƒe nutoawo me. 51 Eya ta woʋuʋu ke le woƒe afɔwo ŋuti ɖe wo ŋu, eye wodzo yi Ikonio.+ 52 Nusrɔ̃lawo yi edzi nɔ dzidzɔ kpɔm+ eye gbɔgbɔ kɔkɔe yɔ wo fũu.