Ta 59
Amekae Yesu Nye Ŋutɔŋutɔ?
ESI tɔdziʋu si me Yesu kple eƒe nusrɔ̃lawo le la ɖi go le Betsaida la, amewo kplɔ ŋkuagbãtɔ aɖe va egbɔ heɖe kuku nɛ be wòaka asi ŋutsua ŋu ayɔ dɔe. Yesu lé ŋutsua ƒe alɔnu kplɔe do go tso kɔƒea me, eye esi wòɖe ta ɖe ŋku dzi nɛ la, ebiae bena: “Èle nane kpɔma?”
Ŋutsua ɖo eŋu bena: “Mekpɔ amewo; mekpɔ wo wole abe atiwo ene hele azɔli zɔm.” Esi Yesu ɖo asi ŋutsua ƒe ŋkuwo dzi la, eyɔ dɔe ale be wòkpɔ nu nyuie. Azɔ Yesu ɖo ŋutsua ɖe aƒeme hegblɔ nɛ be megayi ɖe dua me o.
Yesu kple eƒe nusrɔ̃lawo dzo azɔ heɖo ta Kaisarea Filipi ƒe kɔƒe siwo le Palestina ƒe anyiehe ʋĩ la me. Enye tolialia legbe aɖe si anɔ abe agbadroƒe 30 [kilometa 50] ene yi ɖe teƒe dzeani si Kaisarea Filipi le si ƒe kɔkɔme nye afɔ 1,150 ne wodzidzee tso atsiaƒu gbɔ. Mɔzɔzɔ sia anya xɔ ŋkeke eve.
Le mɔa dzi la, Yesu ɖeka yi gbe do ge ɖa. Ɣleti asieke alo ewo koe susɔ hafi wòaku, eye etsi dzi ɖe eƒe nusrɔ̃lawo nu. Ame geɖe trɔ le eyome xoxo. Edze abe ame bubuwo hã tɔtɔ eye dzi ɖe le wo ƒo ene le esi wògbe agbagba siwo amewo dze be woatsɔe aɖo fiae la, kple le esi mewɔ dzesi si tso dziƒo tsɔ ɖo kpe eƒe fianyenye dzi esime eƒe futɔwo tɔ gbee o la ta. Nukae nye eƒe apostolowo ƒe dzixɔse ku ɖe amesi wònye ŋu? Esi wova afisi wòle gbe dom ɖa le la, Yesu bia wo be: “Ameka amewo gblɔna bena, menye mahã?”
Woɖo eŋu be: “Ðewo bena, Yohanes [Amenyrɔ̃ɖetsimelae], ke bubuwo bena, Elia ye, eye ame aɖewo hã gblɔ bena, Yeremya, alo nyagblɔɖilawo dometɔ ɖekae.” Ẽ, amewo susu be Yesu nye amesiawo dometɔ ɖeka si fɔ tso ame kukuwo dome!
Yesu bia bena: “Ke miawo la, amekae miegblɔna bena, menye mahã?”
Petro ɖo eŋu kaba be: “Wòe nye Kristo, Mawu gbagbe la ƒe vi!”
Esi Yesu gblɔ nya siwo ɖe ŋudzedzekpɔkpɔ ɖe Petro ƒe ŋuɖoɖoa ŋu fia vɔ la, egblɔ be: “Wòe nye Petro, eye nenem kpe gbadza sia dzi matu [nye] ha la ɖo, eye tsiẽƒe ƒe agbowo hã mele edzi ɖu ge o.” Yesu ɖe gbe ƒãe zi gbãtɔ le afisia be yele hame aɖe ɖo ge anyi eye ku kura gɔ̃ hã mate ŋu awɔ amesiwo le eme la kluviwoe ne wowu woƒe anukwareɖiɖi ƒe zɔzɔme le anyigba dzi la nu o. Azɔ egblɔ na Petro bena: “Matsɔ dziƒofiaɖuƒe ƒe safuiawo ana wò.”
Yesu to ema dzi ɖee fia be mɔnukpɔkpɔ tɔxɛwo asu Petro si. Ao, metsɔ nɔƒe gbãtɔ le apostoloawo dome na Petro o, eye metsɔe ɖo hamea ƒe gɔmeɖoanyi hã o. Yesu ŋutɔe nye Kpe Gbadza si dzi wòatu eƒe hamea ɖo. Gake woatsɔ safui etɔ̃ na Petro, esiwo wòatsɔ aʋu Dziƒofiaɖuƒea me yiyi ƒe mɔnukpɔkpɔ na ameha aɖewo le kpɔɖeŋumɔ nu.
Petro awɔ safui gbãtɔ ŋudɔ le ƒe 33 M.Ŋ. ƒe Pentekoste dzi atsɔ aɖe nusi wòle be Yudatɔ siwo trɔ dzime nawɔ be woakpɔ ɖeɖe la afia. Ɣeyiɣi kpui aɖe le ema megbe la, awɔ evelia ŋudɔ atsɔ aʋu Mawu ƒe Fiaɖuƒea me yiyi ƒe mɔnukpɔkpɔ na Samariatɔ dzixɔsetɔwo. Azɔ le ƒe 36 M.Ŋ. me la, awɔ safui etɔ̃lia ŋudɔ atsɔ aʋu mɔnukpɔkpɔ ma ke na Kornelio kple exɔlɔ̃ siwo nye Trɔ̃subɔdukɔ me tɔ aʋamatsomatsotɔwo.
Yesu yi eƒe dzeɖoɖo kple eƒe apostoloawo dzi. Egblɔ nusi to vovo na nusi wonɔ mɔ kpɔm na la esime wògblɔ alesi wòakpe fu ahaku kpuie le Yerusalem la na wo. Esi Petro mese egɔme be Yesu afɔ ɖe tsitre ayi dziƒogbenɔnɔ me o ta la, ekplɔ Yesu ɖe kpɔe. Egblɔ bena: ‘Aƒetɔ, ve ɖokuiwò nu. Esia nagava dziwò gbeɖe o.’ Yesu trɔ megbee dee heɖo eŋu be: “Te ɖa yi megbenye, Satana! Nuɖiaɖia nènye nam, elabena menye Mawu tɔ nèsusu o, negbe nusi nye amegbetɔwo tɔ ko.”
Edze ƒã be ame bubuwo hã nɔ mɔ zɔm kple Yesu kpe ɖe apostoloawo ŋu, eyata eyɔ wo va eɖokui gbɔ eye wòɖe eme be ye yomedzela zuzu manɔ bɔbɔe o. Egblɔ bena: “Amesi ke le lɔlɔ̃m bena, yeadze yonyeme la, negbe nu le ye ŋutɔ ɖokui gbɔ, eye wòatsɔ eƒe [fuwɔameti], eye wòadze yonyeme. Elabena amesi ke di be, yeaɖe yeƒe agbe la, atsrɔ̃e; ke amesi atsrɔ̃ eƒe agbe le nye kple nyanyuie la ŋuti la, aɖee.”
Ẽ, ne Yesu yomedzelawo adze be wòave wo nu la, ekema ele be woanye kalẽtɔwo eye woatsɔ wo ɖokui asa vɔ. Egblɔ bena: “Elabena amesi ke kpe ŋu nye kple nye nyawo le dzidzime wɔahasi kple dzidzime wɔnuvɔ̃ sia dome la, Amegbetɔvi la hã akpe ŋui, ne ava le Fofoa ƒe ŋutikɔkɔe me kple mawudɔla kɔkɔeawo.” Marko 8:22-38; Mateo 16:13-28; Luka 9:18-27.
▪ Nukatae Yesu tsi dzi ɖe eƒe nusrɔ̃lawo nu?
▪ Nukpɔsusu kae le amewo si ku ɖe amesi Yesu nye ŋu?
▪ Safui kawoe wotsɔ na Petro, eye aleke wòazã woe?
▪ Aleke woɖɔ Petro ɖoe, eye nukatae?