“Ƒome ɖeka me tɔwoe mí katã míenye”

LE ƑE siawo me la, mawusubɔsubɔ me nazãbubu kple vovototodedeameme le ŋutigbalẽ ƒe amadede ta kaka ɖe xexeame godoo. Gbevovovodolawo dome dzrewo na be wowu amewo, wowɔ funyafunya amewo, eye wowɔ ŋutasesẽnu ɖigbɔ bubuwo. Dukɔwo Dome Agɔdzedzetsɔtsɔke Taʋliha ka nya ta be amegbetɔ ƒe gomenɔamesi ƒe se siwo dzi woda la nyã amesiwo wu miliɔn 23 de gbe le xexeame godoo le ƒe 1994 me.

Esime ŋutasesẽ fe ati le Tutsi kple Hutu tɔwo dome le Rwanda ɖeɖe la, wowu amesiwo ade 500,000 eye ame bubu siwo sɔ gbɔ wu 2,000,000 zu sitsoƒedilawo. Belgiumtɔwo ƒe nyadzɔdzɔgbalẽ si nye Le Soir ka nya ta be: “Yehowa Ðasefowo koŋ yomee woti le esi wogbe be yewomatsɔ tu o ta.” Yehowa Ðasefowo mewɔa aʋa o. Gake wowu wo dometɔ alafa geɖe le ŋutasesẽnuwɔna la me. Esia na míeɖo ŋku nya si Yesu gblɔ na eƒe nusrɔ̃lawo dzi be: “Esi mienye xexeame ƒe akpa aɖeke o . . . la, eyaŋuti xexeame le fu lém mi ɖo.”—Yohanes 15:19, NW.

Ðasefo ƒome aɖe—Eugène Ntabana, srɔ̃a, kple via eve—nɔ fiadu Kigali me. Ne Eugène le Kristotɔwo ƒe akpaɖekedzimademade me ɖem na eƒe nutome tɔwo la, eƒoa nu zi geɖe le bougainvillea si nye seƒoƒoka si lia nu eye wònyona le anyigba xɔdzowo dzi la ŋu.—Mateo 22:21.

Eugène gblɔna be: “Le Kigali afisia la, bougainvillea ƒoa se dzĩ, hẽ, kple ɣeaɖewoɣi la, ɣiawo. Gake ƒome ɖeka mee wo katã tso. Nenemae wòle le amegbetɔwo hã gome. Togbɔ be míenye ameƒomevi vovovo me tɔwo, míaƒe ŋutigbalẽ to vovo, alo míedoa gbe vovovowo hã la, ƒome ɖeka me tɔwoe mí katã míenye, míenye ameƒomea me tɔwo.”

Nublanuitɔe la, togbɔ be Ntabana ƒomea me tɔwo nye ame fafawo eye womede akpa aɖeke dzi o hã la, nuvlowɔha ʋukɔɖeanyila aɖewo wu wo. Ke hã la, wowɔ nuteƒe ɖaseɖe ku me. Míate ŋu aka ɖe edzi be Yehowa Mawu awɔ ŋugbe si wòdo na amesiawo tɔgbe la dzi, eye woafɔ wo ɖe tsitre bene woava nyi xexe si me nazãbubu maganɔ o la ƒe dome. (Dɔwɔwɔwo 24:15) Ɣemaɣi la, Ntabana ƒomea, kpakple ame bubuwo ‘akpɔ dzidzɔ ɖe ŋutifafa gbogbo la ŋuti.’—Psalmo 37:11.