Connecticut Ʋɔnudrɔ̃ƒe Kɔkɔtɔ Ʋli Dɔnɔ ƒe Gomenɔamesi Ta

LE April 16, 1996 dzi la, Ʋɔnudrɔ̃ƒe Kɔkɔtɔ si le Connecticut, U.S.A., ʋli gome si le Yehowa Ðasefowo si be woagbe ʋudodo la ta. Nyametsotso sia te fli ɖe nya si nutomeʋɔnudrɔ̃ƒe aɖe drɔ̃ tsã me.

Le August 1994 me la, ʋu te dodo le Nelly Vega si nye Yehowa Ðasefo ŋu vevie le eƒe vi gbãtɔ dzidzi vɔ megbe. Wodze agbagba geɖe be woatɔ ʋua ƒe dodo do kpoe. Esi Aƒenɔ Vega ƒe nɔnɔmea nɔ gbegblẽm ɖe edzi la, kɔadzi ƒe tatɔwo di be yewoaxɔ gbeɖeɖe tso ʋɔnudrɔ̃ƒe si ana ŋusẽ yewo woado ʋu nɛ. Aƒenɔ Vega de asi atikewɔgbalẽvi aɖe te xoxo be woagado ʋu alo nusiwo woɖe tso ʋu me na ye le yeƒe kɔadzi nɔnɔ me o, eye wòto ema me ɖe nusianu si ado tso eƒe nyametsotsoa me ƒe agba le kɔadzi la dzi. Gake kɔadzi ƒe tatɔwo he nya be ʋudodo nɛ akpasesẽtɔe nye nu nyuitɔ si ade vidzĩa, amesi kɔadzi ƒe tatɔwo gblɔ be ehiã na dadaa la dzi. Ʋɔnudrɔ̃ƒe gbãtɔ la gblɔ hã be, ɖetugbi si ƒe lãme sẽ ye Aƒenɔ Vega nye, negbe ʋu koe do le eŋu. Eyata togbɔ be Aƒenɔ Vega srɔ̃ kple eƒe senyala gbe hã la, ʋɔnudrɔ̃ƒea ɖe gbe eye wodo ʋu nɛ.

Emegbe wotsɔ nya la yi Connecticut Ʋɔnudrɔ̃ƒe Kɔkɔtɔ. Le afima la, ʋɔnudrɔ̃laawo katã lɔ̃ ɖe edzi nusɔsɔe be kɔadzi ƒe tatɔwo do vlo Aƒenɔ Vega ƒe gomenɔamesi. Wogblɔ le nyametsotsoa me be: “Zãtsiƒee ʋɔnudrɔ̃ƒe gbãtɔ la nɔ anyi ɖe nya la dzi eye enɔ kpatakpata ale gbegbe be akpa evea siaa mate ŋu aɖe woƒe nyawo me bliboe o.”

Connecticut Ʋɔnudrɔ̃ƒe Kɔkɔtɔ ƒe afiatsotso sia le vevie na ame bubu siwo menye Yehowa Ðasefowo o hã. Donald T. Ridley si nye Aƒenɔ Vega ƒe senyala gblɔ be: “Ele vevie na dɔnɔ siwo katã malɔ̃ ɖe woƒe ɖɔkta ƒe nyametsotsowo dzi o. Afiatsotsoa axe mɔ na kɔdziwo be woagatu afɔkpo dɔnɔwo ƒe nu veviwo o, eɖanye le mawusubɔsubɔ alo ame ŋutɔ ƒe nyawo gome o.”