“Nyɔnu Zãzɛ Nènye”

Moab-ɖetugbi aɖee wogblɔ kafukafunya siawo na. Enye ahosi aɖe si ŋkɔe nye Rut, Israel-nyɔnu Naomi ƒe lɔ̃xoyɔvi. Rut si nɔ Israel ƒe 3000 enye esi va yi, le ɣeyiɣi si me ʋɔnudrɔ̃lawo nɔ dzi ɖum la xɔ ŋkɔ le nunyuiwɔwɔ me. (Rut 3:11) Aleke wòwɔ va xɔ ŋkɔ sia? Amekawoe eƒe kpɔɖeŋua aɖe vi na?

Esi Rut menye amesi ɖua “kuviabolo” o ta la, ewɔa dɔ sesẽ ɣeyiɣi didi nɔa lu fɔm le agble me, eye eƒe kutrikukuae na wokafui. Esi wobia tso esi be woaɖe eƒe dɔwɔwɔ dzi akpɔtɔ hã la, ekpɔtɔ nɔ dɔ sesẽ wɔwɔ dzi wu alesi dze kura gɔ̃ hã. Eƒe agbenɔnɔ sɔ ɖe nya si Biblia gblɔ le srɔ̃nyɔnu si dze na kafukafu, si zã, eye wòkua kutri ŋu la nu ŋutɔ.—Lododowo 31:10-31; Rut 2:7, 15-17.

Rut ƒe gbɔgbɔmenɔnɔmewo—eƒe ɖokuibɔbɔ, ɖokuitsɔtsɔsavɔ kple eƒe nuteƒewɔwɔ ƒe lɔlɔ̃—koŋue nye nɔnɔme vevi siwo ta wòxɔ kafukafu ɖo. Edzo le edzilawo gbɔ hegblẽ wo denyigba ɖi, eye wòku ɖe Naomi ŋu kplikplikpli togbɔ be dedienɔnɔ si srɔ̃ɖeɖe hena vɛ ƒe mɔkpɔkpɔ boo aɖeke menɔ esi o hã. Le ɣeyiɣi ma ke me la, Rut gblɔ didi si nɔ eme ɖe Yehowa, lɔ̃xoa ƒe Mawu la, subɔsubɔ ŋu. Esi Ŋɔŋlɔawo ƒe nuŋlɔɖia nɔ nu ƒom tso alesi Rut nye ame vevii ŋu la, egblɔ be ede “ŋutsuvi adre nu na [Naomi] gbɔ edzi.”—Rut 1: 16, 17; 2: 11, 12; 4:15.

Togbɔ be Rut ƒe ʋuɖɔɖɔ na wòdze na kafukafu le ehati amegbetɔwo dome hã la, nusi le vevie wu enye alesi Mawu de asixɔxɔ eƒe nɔnɔmewo ŋu be wòtsɔ Yesu Kristo mama nyenye ƒe mɔnukpɔkpɔ yrae. (Mateo 1:5; Petro I, 3:4) Menye Kristotɔ nyɔnuwo ɖeɖekoe Rut nye kpɔɖeŋu nyui na o, ke enyee na amesiwo katã gblɔna be Yehowa subɔlawoe yewonye hã!