Satana ƒe Ƒe Alafae Wònyea?

“MÍATE ŋu agblɔ le ɣeyiɣi vɔ̃ siawo ŋu be Satana ƒe ƒe alafae wònye. Ɣeyiɣi aɖeke meva yi si me amewo di vevie eye wòdzro wo vevie be yewoawu ame miliɔn gbogbo aɖewo le ameƒomevinyenye, mawusubɔsubɔ alo ɖoƒedidi ta abe esia ene o.”

Asiɖeɖe le amesiwo wode Nazitɔwo ƒe fuwɔamegaxɔwo me madzemadzee ŋu ƒe ƒezã 50 lia ɖuɖue na woŋlɔ nya si le etame la ɖe January 26, 1995, ƒe The New York Times me. Ametsɔtsrɔ̃ Gã la—si nye ameƒomevi aɖewo tsɔtsrɔ̃ ɖa si ŋu wonya nu le nyuie le ŋutinya me—ɖe Yudatɔ siwo ade miliɔn ade ƒe agbe ɖa. Polandtɔ siwo menye Yudatɔwo o, siwo ade miliɔn etɔ̃, ye ku le nusi woyɔ be “Ametsɔtsrɔ̃ Gã si Woŋlɔ Be” la me.

Jonathan Glover gblɔ le eƒe agbalẽ si nye Humanity—A Moral History of the Twentieth Century me be: “Akɔnta si wobu le ƒe 1900 vaseɖe ƒe 1989 ŋu ɖee fia be ame miliɔn 86 ye ku le aʋawɔwɔ me.” Egblɔ kpee be: “Alesi amewo kui le ƒe alafa blavelia ƒe aʋawɔwɔwo me la sɔ gbɔ ale gbegbe be egɔme menya se o. Manya wɔ be woama kukulawo ƒe xexlẽme ɖe mama dedie nu o, le esi amesiwo ku dometɔ eve le etɔ̃ ɖesiaɖe me (miliɔn 58) ku le xexemeʋã eveawo me ta. Gake ne woama kukula siawo pɛpɛpɛ ɖe ɣeyiɣi ƒe didime sia nu la, afia be ame 2,500 lɔƒo ye kuna le aʋa me gbesiagbe, Si fia be ame 100 kple edzivɔwo kuna gaƒoƒo ɖeka ɖesiaɖe tsiã ɖe nu hena ƒe blasieke sɔŋ.”

Le esia ta woyɔ ƒe alafa 20 lia be enye ƒe alafa si me ameƒomea kpɔ ʋukɔkɔɖi teƒe le wu ɖesiaɖe. Nadezhda Mandelstam ŋlɔ ɖe agbalẽ si nye Hope Against Hope me be: “Míekpɔe be vɔ̃ ɖu dzi le esi amewo do vlo eye wotu afɔkpo agbenɔnɔ me gɔmeɖosewo megbe.” Le nyui kple vɔ̃ dome ʋiʋlia me la, ɖe vɔ̃ ɖu dzi nyateƒea?

[Nɔnɔmetata Tsoƒe si le axa 3]

U.S. Department of Energy photograph