Ðe Wòle Be Míabia Kpekpeɖeŋu tso Mawudɔlawo Gbɔa?

NE MÍEÐO xaxa me la, ɖe wònyo be míabia kpekpeɖeŋu mawudɔlawoa? Nenemae ame geɖewo susunɛ. Le nyateƒe me la, New Catholic Encyclopedia gblɔ bena: “Míedoa gbe ɖa na . . . mawudɔlawo . . . gake kple susu be woaɖe mía nu le Mawu gbɔ ko.” Enyo be míabia mawudɔlawo be woaɖe mía nua?

Mawudɔla eve ko ƒe ŋkɔwoe Mawu ƒe Nya la yɔ, woawoe nye Mixael kple Gabriel. (Daniel 8:16; 12:1; Luka 1:26; Yuda 9) Esi wònye be woyɔ ŋkɔ siawo le Biblia me ta la, míate ŋu akpɔe be gbɔgbɔmeme siwo le wo ɖokui si wo tɔxɛ wo tɔxɛe mawudɔla ɖesiaɖe nye, menye ŋusẽ si mele nɔnɔme aɖeke me o. Gake wo dometɔ aɖewo gbe be yewomayɔ yewoƒe ŋkɔ o. Le kpɔɖeŋu me, esi Yakob bia mawudɔla aɖe si va srãe kpɔ be neyɔ eƒe ŋkɔ na ye la, egbe eyɔyɔ nɛ. (Mose I, 32:30; Ʋɔnudrɔ̃lawo 13:17, 18) Womeyɔ mawudɔlawo ƒe ŋkɔ gbogbo aɖeke le Biblia me o, bene amegbetɔwo nagatsɔ bubu si gbɔ eme na wo o.

Mawudɔlawo ƒe dɔdasiwo dometɔ ɖekae nye be woaxɔ gbedasi tso Mawu gbɔ ayi na amewo. Le nyateƒe me la, Hebri kple Hela gbe me nya si gɔme woɖe be “mawudɔla” la gɔmeɖeɖe le nyaa ŋutɔŋutɔ nue nye “dɔtsɔla.” Gake mawudɔlawo menye domenɔlawo, nɔa amewo ƒe gbedodoɖawo xɔm nɔa Dziƒoʋĩtɔ la ƒe fiazikpui gbɔ yimee o. Mawu ƒe ɖoɖoe nye be woado gbe ɖa na ye le ye Vi, Yesu Kristo, amesi gblɔ be, ‘Nusi ke miabia Fofo la le nye ŋkɔa dzi la, woanae mi’ la, ƒe ŋkɔ me.—Yohanes 15:16; Timoteo I, 2:5.

Ne míedo gbe ɖa na Yehowa Mawu le mɔ nyuitɔ nu la, mexaxana akpa na wo sese gbeɖe o. Biblia ka ɖe edzi na mí be: “Yehowa tsɔ ɖe amesiwo katã yɔnɛ, amesiwo katã yɔnɛ le nyateƒe me la gbɔ.”—Psalmowo 145:18.