BIBLIA ME BIABIAWO ƑE ŊUÐOÐOWO

Nu ka tae woyɔ Yesu be Mawu ƒe Vi ɖo?

Srɔ̃ mele Mawu si ne wòadzi vi nɛ abe ale si wòle le amegbetɔwo gome ene o. Eyae nye nu gbagbewo katã Wɔla. Mawu wɔ amegbetɔwo kple ŋutete be woaɖe yeƒe nɔnɔmewo afia. Esia tae woyɔ Adam, si nye amegbetɔ gbãtɔ si Mawu wɔ la, be “Mawu ƒe vi” ɖo. Nenema kee woyɔ Yesu hã be “Mawu ƒe Vi” le esi Mawu, si nye Fofoa, wɔe kple nɔnɔme siwo le abe etɔwo ene ta.—Xlẽ Luka 3:38; Yohanes 1:14, 49.

Ɣekaɣie wowɔ Yesu?

Mawu wɔ Yesu hafi wɔ Adam. Le nyateƒe me la, esi Mawu wɔ Yesu vɔ la, eto Yesu dzi wɔ nu bubuwo katã, siwo dome mawudɔlawo hã le. Esia tae Biblia yɔ Yesu be Mawu ƒe “nuwɔwɔwo katã ƒe ŋgɔgbevi” ɖo.—Xlẽ Kolosetɔwo 1:15, 16.

Hafi woadzi Yesu le Betlexem la, enye mawudɔla nɔ dziƒo. Esi ɣeyiɣia de la, Mawu tsɔ Yesu si nɔ dziƒo la ƒe agbe va de Maria ƒe vidzidɔ me ale be woate ŋu adzii wòanye amegbetɔ.—Xlẽ Luka 1:30-32; Yohanes 6:38; 8:23.

Nu ka tae Mawu na wodzi Yesu ɖe anyigba dzi wònye amegbetɔ? Dɔ vevi kae Yesu va wɔ? Àte ŋu akpɔ nyabiase mawo ƒe ŋuɖoɖowo le Biblia me, eye woakpe ɖe ŋuwò nàse nu si Mawu kple Yesu wɔ na wò la gɔme ahade asixɔxɔ geɖe wu eŋu.