Ðe Ame Aɖe Sea Gbedodoɖawoa?

Ame aɖewo susuna be ɣeyiɣi gbegblẽe gbedodoɖa nye; wosusuna be ame aɖeke mesea gbedodoɖawo o. Ame aɖewo ya te ŋu do gbe ɖa, ke hã wose le wo ɖokuiwo me be womeɖo eŋu na yewo o. Mawudzimaxɔsela aɖe susu ale si eya bu be Mawu le ko hedo gbe ɖa be: “Do dalĩ nam mase ko.” Gake egblɔ be Mawu “zi kpi.”

Ke hã Biblia ka ɖe edzi na mí be Mawu li ŋutɔŋutɔ eye wòsea gbedodoɖawo. Biblia gblɔ tso dukɔ aɖe si nɔ anyi le blema ŋu be: “[Mawu] ave mia nu godoo ne ese miaƒe ɣlidodo la; ne esee ko la, atɔ na mi.” (Yesaya 30:19) Biblia gagblɔ hã be: “Ame dzɔdzɔewo ƒe gbedodoɖa dzea Eŋu.”—Lododowo 15:8.

Ame siwo ƒe gbedodoɖawo Mawu se la ƒe kpɔɖeŋuwo hã le Biblia me. Mawunyakpukpui aɖe gblɔ be Yesu ɖe “kuku vevie na Ame si te ŋu ɖee” la, eye “wòɖo toe.” (Hebritɔwo 5:7) Míate ŋu akpɔ esia ƒe kpɔɖeŋu bubuwo hã le Daniel 9:21 kple 2 Kronika 7:1.

Ke nu ka tae ame aɖewo sena le wo ɖokuiwo me be womeɖoa yewoƒe gbedodoɖawo ŋu o? Hafi woase míaƒe gbedodoɖawo la, ele be míado gbe ɖa na Mawu si ŋu Biblia ƒo nu tsoe, si ŋkɔe nye Yehowa,a ke menye na mawu bubu aɖe alo tɔgbui kukuwo o. Mawu di tso mía si hã be nu siwo ‘míabia nawɔ ɖeka kple yeƒe lɔlɔ̃nu,’ si fia be woanye nu siwo dzea ye ŋu. Mawu ka ɖe edzi na mí be ne míedo gbe ɖa alea la, ‘yeaɖo to mí.’ (1 Yohanes 5:14) Eya ta hafi woase míaƒe gbedodoɖawo la, ele be míanya Mawu si ŋu Biblia ƒo nu tsoe la, eye míanya eƒe lɔlɔ̃nu.

Ame geɖe xɔe se be menye subɔsubɔkɔnu dzro aɖee gbedodoɖa nye o, ke boŋ Mawu sea gbedodoɖawo vavã eye wòɖoa wo ŋu hã. Isaac, si le Kenya, gblɔ be: “Medo gbe ɖa be Mawu nakpe ɖe ŋunye mase Biblia gɔme. Esia megbe kpuie la, ame aɖe te ɖe ŋunye hegblɔ nam be yeakpe ɖe ŋunye.” Hilda, si le Philippines la, di be yeadzudzɔ atamanono. Esi wòdze agbagba zi geɖe be yeaɖe asi le eŋu do kpoe la, srɔ̃a gblɔ nɛ be, “Ðe manyo be nàbia Mawu ne wòakpe ɖe ŋuwò oa?” Hilda wɔ ɖe srɔ̃a ƒe aɖaŋuɖoɖoa dzi, eye wògblɔ emegbe be: “Ale si Mawu kpe ɖe ŋunyee la wɔ nuku nam ŋutɔ. Ðeko wòwɔ abe atamanono ƒe dzodzroa nu nɔ tsitsim le menye ene. Mete ŋu dzudzɔ enono mlɔeba.”

Ðe wòanye be Mawu di be nàgblɔ wò didi siwo wɔ ɖeka kple yeƒe lɔlɔ̃nu la na ye eye yeakpe ɖe ŋuwòa?