Ðe Yehowa Ðasefowo Susuna Be Gbeƒã Si Yewoɖena Tso Ʋɔtru Nu Yi Ʋɔtru Nu Lae Ana Yewoadze Na Ðeɖekpɔkpɔa?

Ao. Míeɖea gbeƒã na amewo edziedzi tso ʋɔtru nu yi ʋɔtru nu, gake míebunɛ be dɔ ma wɔwɔe ana míakpɔ ɖeɖe o. (Efesotɔwo 2:8) Nu ka tae?

Bu nya sia ŋu kpɔ: Tsɔe be ŋutsu dɔmenyotɔ aɖe kpe amewo be woava teƒe aɖe le ŋkeke aɖe koŋ dzi ava xɔ nunana xɔasi aɖe. Ne èxɔ ŋutsua ƒe ŋugbedodoa dzi se la, ɖe màwɔ ɖe eƒe nyawo dzi oa? Àwɔe godoo! Kakaɖedzitɔe la, àgblɔ ŋugbedodo sia ŋu nya na xɔ̃wòwo kple wò ƒometɔwo ale be wòaɖe vi na woawo hã. Menye esi nèva teƒea eye nèva ɖe gamea dzi tae na nèdze na nunana ma xɔxɔ o. Ke boŋ esi ŋutsua di be yeatsɔ nunana la ana wò tae wòtsɔe na wò ɖo.

Nenema kee, Yehowa Ðasefowo xɔ ŋugbe si Mawu do be yeana agbe mavɔ ame sia ame si ɖoa to ye la dzi se. (Romatɔwo 6:​23) Míedzea agbagba be míaƒo nu tso míaƒe dzixɔsewo ŋu na amewo be Mawu ƒe ŋugbedodowo naɖe vi na woawo hã. Gake mímexɔe be míaƒe gbeƒãɖeɖedɔa wɔwɔ ana míadze na ɖeɖekpɔkpɔ o. (Romatɔwo 1:​17; 3:​28) Le nyateƒe me la, amegbetɔ aɖeke mate ŋu ato eƒe kutrikuku dzi adze na nunana wɔnuku sia xɔxɔ tso Mawu gbɔ o. Biblia gblɔ be: “Eɖe mí, menye le dzɔdzɔenyenye ƒe dɔ, si míawo míewɔ la ta o, ke boŋ le eƒe nublanuikpɔkpɔ la nu.”​—Tito 3:5.