Ðe Woate Ŋu Aka ɖe Ame Dzia?

“Enye ame ʋee siwo menye míaƒe ƒometɔ o siwo dzi dzinyelawo ka ɖo bliboe la dometɔ ɖeka. . . . Ewɔa eɖokui ame nyui kple amesi tsɔa ɖe le eme na ame si mawɔ naneke si ado nuxaxa na mí gbeɖe o. . . . Enye ame ʋee siwo dzi meka ɖo vevie le nye agbe me la dometɔ ɖeka.”

ALEAE ɖetugbi aɖe ɖɔ kakaɖedzi si nɔ esi na eƒe ƒomea ƒe ɖɔkta lae. Nublanuitɔe la, enye kakaɖeamedzi madzemadze. Tso esime wòxɔ ƒe 16 kee ɖɔkta sia dze egbɔ dɔdɔ gɔme. Egblɔ na ʋɔnudrɔ̃la siwo nɔ afia tsom be: “Eda alakpa nam heflum.”—The Toronto Star.

Wogblẽ Kakaɖeamedzi Me le Afisiafi

Kakaɖeamedzi, si le abe seƒoƒo dzeani gake le beli la, nye nusi woate ŋu aho afanya kple afɔ bɔbɔe ene. Wogblẽ edome le afisiafi! Michael Gaine si nye papatenɔla aɖe kple bisiɔp aɖe ƒe agbalẽŋlɔla le England gblɔ be: “Ɣeyiɣi aɖe nɔ anyi kpɔ si me amesiame ka ɖe nunɔla dzi. Ɣemaɣi ƒomewo gblẽa wo viwo ɖe eƒe dzikpɔkpɔ te. Nyemeka ɖe edzi be aganɔ nenema fifia o. Kakaɖeamedzi ma maganɔ mía dome gbeɖe o.”—The Guardian Weekend.

Asitsalawo baa amesiwo ʋlia ho kpli wo. Boblodola dzeayewo blea nuƒlelawo eye wotafaa wo. Dɔnunɔla nublanuimakpɔla aɖe fi eya ŋutɔ ƒe adzɔha ƒe ga si wòxena na amesiwo xɔ dzudzɔ le dɔ me, si wɔe be ga si wòdzra ɖo ɖi na eƒe dɔwɔlawo bu. Dɔwɔlawo fia woƒe dɔtɔwo ɣesiaɣi. Le kpɔɖeŋu me, nyatakaka aɖe ɖee fia be “wobu akɔnta be ga si wofina le Canada ƒe adzɔhawo me dea $20 biliɔn le ƒe ɖeka me.”—Canadian Business.

Menye dunyahelawo katã dzie womate ŋu aka ɖo o. Gake nyatakaka abe esia ene la mawɔ nuku na ame geɖe o: “Esime wowu France-nyɔnu dunyahela si ŋu woʋlia nya le wu kwasiɖa eve megbe la, kpovitɔwo va klo nu le dunyahehe me alakpanuwɔwɔ kple nuvlowɔwɔ ƒe nugbeɖoɖo si ɣla ɖe dziɖuɖu si le Mediterrania-ƒuta me la dzi.”—The Sunday Times, London.

Kakaɖeamedzi me gblẽna zi geɖe le ƒomedodo kplikplikpliwo me. Srɔ̃ŋutsuwo kple srɔ̃nyɔnuwo mewɔa nuteƒe na wo nɔewo o. Dzilawo wɔa ŋlɔmi le ɖeviwo ŋu. Ðeviwo daa alakpa na dzilawo. Esime wotsa Stasi, siwo nye adzamekpovitɔ siwo le Ɣedzeƒe Germania si nɔ anyi tsã ƒe nuŋlɔɖiwo me la, woɖee fia be “amebaba ƒe nuwɔna vivivo” nɔ amesiwo wobu xɔlɔ̃woe la dome. Nyatakaka aɖe gblɔ be esi wowɔ ɖeka be woafia amewo yome mɔ la, “Stasi ƒe ŋusẽkpɔkpɔ keke ta ɖo sukuxɔwo me, gbedoxɔwo me, xɔdɔmewo me, kple nuvɔ̃meʋuƒewo gɔ̃ hã.”—Time.

Nyadzɔdzɔŋlɔla aɖe gblɔ le Ireland be: “Amesiwo míeda ɖe ŋusẽnɔƒewo la ble mí, woflu mí eye wozã mí hegblẽ mí eye wodo vlo mí.” (The Kerryman) Le esi woflu ame geɖe zi geɖe ta la, womega ka ɖe ame aɖeke dzi o. Nukae míate ŋu awɔ be míagaka ɖe ame dzi madzemadzee o? Nyati eve siwo kplɔe ɖo adzro biabia sia me.