Nya Veamewo Doa Blanuitɔ Ame

“Movitɔ, ame ɖɔe!”a Nya mawo tsi susu me na nyɔnu aɖe si le Japan ale gbegbe—nenemae wodzunɛ edziedzi le eƒe ɖevime. Amekawoe dzunɛ nenema? Sukuviwoea? Nɔviawoea? Ao. Edzilawoe. Egblɔ be: “Meléa blanui elabena dzugbe mawo veam ŋutɔ.”

Ŋutsu aɖe si le United States ɖo ŋku edzi be le yeƒe ɖevime la, ɣesiaɣi si ye fofo gbɔ va aƒeme la, yevɔ̃na eye yetsia dzodzodzoe. Egblɔ be: “Vaseɖe egbegbe megaɖoa ŋku alesi eƒe ʋu ŋkɔ ɖinae ne egbɔna aƒeme eye nye lãme wɔa yii. Ƒenye sina va bena. Nu medzea fofonye ŋu o eye enyrana ɖe mía dzi ɣesiaɣi be míewɔ míaƒe aƒemedɔ aɖeke nyuie o.”

Ŋutsu sia nɔvinyɔnu hã gblɔ be: “Nyemeɖo ŋku edzi be dzinyelawo dometɔ aɖeke kpla asi akɔ na mí, gbugbɔ nu na mí, alo gblɔ be ‘Melɔ̃ wò’ alo ‘Wò nu nyo ŋunye’ kpɔ o. Eye ne womegblɔ na ɖevi kpɔ wòse be ‘Melɔ̃ wò’ o la, atsɔe ko—le eƒe agbemeŋkeke ɖesiaɖe me—be wogblɔ na ye be ‘Melé fu wò.’”

AME aɖewo agblɔ be menye fu boo aɖekee ma ame mawo kpe le woƒe ɖevime o. Nyateƒee, ebɔ be woagblɔ nya veamewo kple nya manyomanyowo ɖe ɖeviwo ŋu eye woawɔ fu wo. Womeŋlɔa nya siawo ɖe ŋutasesẽnuwɔna siwo dzena le nyadzɔdzɔgbalẽwo ƒe tanyawo me alo ɖea wo le television dzi nyadzɔdzɔ tsodzikaƒonamewo me o. Nusi wògblẽna le ame ŋu medzena wokpɔna o. Gake ne dzilawo wɔa fu wo viwo nenema gbesiagbe la, agblẽ nu geɖe le wo ŋu—eye ate ŋu agblẽ nu le wo ŋu le woƒe agbe me katã.

De ŋugble le numekuku aɖe si wogawɔ le ƒe 1990 me si kplɔ ƒe 1951 me tɔ ɖo tso alesi dzila aɖewo nyi ƒe atɔ̃ vi aɖewoe ŋu la ŋuti kpɔ. Numekulaawo dze agbagba di ɖevi siawo dometɔ geɖe siwo xɔ ƒe 40 va ɖo 60 fifia be yewoanya dɔ si alesi wonyi woe wɔ ɖe wo dzi. Wogblɔ le numekuku yeyea me be menye dzila siwo da ahe alo wonye kesinɔtɔwo alo dzila siwo wòdze ƒã be nuwo ɖe fu na la ƒe viwo kokokoe nu va sẽna na wu le agbe me, siwo mete ŋu vona le wo ɖokui me o, eye eme sẽ na wo le srɔ̃ɖeɖe kple xɔlɔ̃dzedze me, kple le dɔwɔƒe gɔ̃ hã o. Ðevi siwo dzilawo metena ɖe wo ŋu o, siwo metsɔ ɖeke le eme na wo o eye womeɖe amelɔlɔ̃ boo aɖeke fia wo o alo womeɖe ɖeke ŋutɔ fia wo o ye.

Nyateƒenya aɖe si woŋlɔ ɖi ƒe 2,000 kloe nye esia la ko dzie numekuku sia gaɖo ŋkui na mí le mɔ sue aɖe nu, be: “Mi fofowo la, migado dziku na mia viwo, bene dzika nagatso wo ƒo o.” (Kolosetɔwo 3:21) Ne dzilawo dzua wo viwo alo wɔa nusi ate ɖe wo dzi ɖe wo ŋu la, godoo edoa dziku na ɖeviawo eye ate ŋu ana dzika natso wo ƒo vavã.

Agbalẽ si nye Growing Up Sad gblɔ be eteƒe medidi boo o esi ɖɔktawo gblɔ be ɖeviwo medzea blanuilédɔ o. Gake ɣeyiɣiwo ƒe yiyi kple nuteƒekpɔkpɔ fia be menye nyateƒee o. Egbea agbalẽŋlɔlaawo gblɔna be wolɔ̃ ɖe edzi be ɖeviwo dzea blanuilédɔ eye ebɔ fũ hã. Nusiwo henɛ vɛ ƒe ɖewoe nye dzilawo ƒe wo viwo gbegbe alo fuwɔwɔ wo. Agbalẽŋlɔlawo ɖe nu me be: “Le teƒe aɖewo la, dzila nɔa nyahehe ɖe ɖevia ŋu kple vlododoe dzi. Le teƒe bubuwo la, vi kple dzila dome ƒomedodo aɖeke menɔa anyi o: dzila la meɖea alesi wòlɔ̃ ɖevia fianae gbeɖe o. . . . Nusi dzɔna ɖe dzila siawo ƒe viwo dzi la wɔ nublanui ale gbegbe elabena le ɖevi gome—alo le ame tsitsi gɔ̃ hã gome le nya sia me—la, lɔlɔ̃ le abe alesi ŋdɔʋuʋu kple tsi le na numiemie ene.”

Ðeviwo srɔ̃a nyateƒe vevi aɖe ne wo dzilawo ɖea woƒe lɔlɔ̃ fiana faa wòdzena kɔte: Be yewodze na lɔlɔ̃; be yewoxɔ asi. Ame geɖe bua nya sia vodadatɔe be enye ameɖokuidodoɖedzi, ameɖokuilɔlɔ̃ wu ame bubuwo. Gake menye eya gblɔm míele le nya sia me o. Nyɔnu aɖe gblɔ le nya sia ŋu le eƒe agbalẽ me be: “Alesi viwò buna le eɖokui ŋu la kpɔa ŋusẽ ɖe xɔlɔ̃ siwo ƒomevi wòdzena, alesi wòte ŋu nɔa anyi kple ame bubuwoe, amesi ƒomevi wòaɖe, kple alesi wòakpɔ dzidzedze le agbe mee dzi.” Biblia lɔ̃ ɖe alesi gbegbe wòle vevie be woabu ame ɖokui ŋui wòada asɔ eye womabu ame ɖokui wu alesi dze o dzi esi wògblɔ be eyae nye se vevitɔ evelia, si nye: “Lɔ̃ hawòvi abe wò ŋutɔ ɖokuiwò ene.”—Mateo 22:38, 39.

Esesẽ be nàkpɔ dzila si si tagbɔ le wòadi be yeagblẽ nu vevi si le belii si nye ɖevi ƒe asixɔxɔ dede eɖokui ŋu me. Ke nukatae wòdzɔna zi geɖe? Eye aleke woawɔ axe mɔ ɖe enu?

[Etenuŋɔŋlɔ]