Liliti Wɔnuku La

ETSO NYƆ! ƑE NUŊLƆLA SI LE NIGERIA GBƆ

“KƆƑEMETIKEWO tsoƒe”—nenemae amewo yɔna na liliti le India. Ƒe alafa geɖee nye sia si dukɔ ma me tɔwo zãa liliti tsɔ daa lãmeve, asrã, kple dɔdzeamedziwoe. Esi Hindutɔwo xɔe se be liliti ate ŋu aklɔ ʋu me na yewo ta la, wo dometɔ geɖe ɖua lilitiŋgba tsɔ dzea ƒea gɔmee. Lilitilɔewo nye ame aɖewo hã ƒe atiɖuɖu, wowɔa eƒe aŋgba me tsi ɖe woƒe ŋutigbalẽdɔléle wo dzi, eye wotsɔa liliti ɖoa tii be woado ŋusẽ yewo.

Ƒe siawo me la, dzɔdzɔmeŋutinunyalawo va ʋu ŋku ɖe liliti ŋu. Gake dzɔdzɔmeŋutinunyalawo ƒe nyatakaka si woyɔ be Neem—A Tree for Solving Global Problems (Liliti—Ati si Akpɔ Xexeame Kuxiwo Gbɔ) xlɔ̃ nu be: “Togbɔ be edze abe ɖe nuwuwu meli na nusiwo liliti te ŋu wɔna o hã la, kpeɖodzi blibo mele naneke ŋu haɖe o. Dzɔdzɔmeŋutinunyala siwo ƒe nu sẽ wu le atia kple nusiwo wòwɔna me la lɔ̃ ɖe edzi be kpeɖodzi meli be yewoaka ɖe nusiwo yewole mɔ kpɔm na la dzi bliboe o.” Ke hã nyatakakaa gagblɔ be: “Ƒe blaeve ƒe numekukuwo fia be ati sia si ŋu womenya nu boo le o la nyo na nu geɖe ale gbegbe be ate ŋu aɖe vi na dukɔ siwo nye kesinɔtɔwo kple daheawo siaa. Numekula siwo ɖɔ ŋu ɖo wu be yewomade yewo ɖokui nya me o dometɔ aɖewo ke hã le gbɔgblɔm be ‘liliti dze be woayɔe be nukuti.’”

Vi Siwo Atia Ŋutɔ Ðena

Lili nye ati si le mahogeni ƒomeawo me, eye anyigbaxɔdzowo dzie wònɔna. Ekɔkɔna dea meta 30 eye wòte ŋu lolona wua meta 2.5. Esi aŋgba melɔ̃na vɔna le eta o ta la, enye ati si ɖoa vɔvɔli le ƒe bliboa me. Etsina kabakaba eye wònyona le anyigba mawɔnuwo dzi.

Ƒe alafa sia ƒe gɔmedzedzee wotsɔe va Ɣetoɖoƒe Afrika be wòanye vɔvɔliti axe mɔ na Sahara Kenyigba la ƒe takeke va anyiehe. Avedolawo doe ɖe Fiji, Mauritius, Saudi Arabia, Titina kple Anyiehe Amerika, kpakple Carib-ƒukpowo hã dzi. Le United States la, wodoe ɖe Arizona ƒe anyiehe, California, kple Florida be woakpɔ alesi wòatsii ɖa.

Tsɔ kpe ɖe eƒe vɔvɔlidodo le ƒea katã me le anyigbaxɔdzowo dzi ŋu la, liliti ganye nake hã. Eye esi baba meɖunɛ o ta la, wotsɔnɛ tua xɔe gatsɔnɛ kpaa nu hã. Eyata ne míabu vi siwo atia ɖeɖe dzaa ɖena ŋu la, míakpɔ be enye ati si ŋu viɖe geɖe le. Gake míeɖo afi aɖeke nɛ haɖe o.

Ðuatiɖuatiwo Melɔ̃nɛ O

Esi Indiatɔwo nya be lilitiŋgba nyãa nudzodzoe ɖiamenuwo ta la, wodaa eƒe aŋgbawo ɖe aba dzi, agbalẽ, nugo, drɔ̃ kple xɔ me. Le ƒe 1959 me, esi Germanytɔ nudzodzoeŋutinusrɔ̃la aɖe kpɔ alesi gbegbe ʋetsuvi biliɔn geɖewo gblẽ nui le Sudan eye woɖu ati ɖesiaɖe ƒe aŋgba negbe liliti tɔ koe susɔ la, wo kple eƒe sukuviwo wodze numekuku gɔme le liliti ŋu.

Tso ɣemaɣi la, dzɔdzɔmeŋutinunyalawo va nya be atike hamehame siwo le liliti me tsrɔ̃a nudzodzoe vovovo siwo wu 200 tsɔ kpe ɖe axɔ̃ vovovowo, vɔklui, dza, nugbagbevi suesuewo, kple dɔlékuiwo gɔ̃ hã ŋu. Numekulawo wɔ dodokpɔ aɖe si me wode ayiŋgbawo nugo si me Japantɔwo ƒe adoŋgowo le me. Wowu lilitiŋgba me tsi ɖe aŋgba ɖesiaɖe ƒe afã ŋu. Adoŋgoawo ɖu aŋgbaawo ƒe afã siwo ŋu womewu atike ɖo o gake womeka nu afisi wowu atikea ɖo ya ŋu o. Le nyateƒe me la, dɔ wu wo woku gake womeɖu aŋgba ƒe afisiwo wowu atikea ɖo vie hã o.

Nudodokpɔ siawo na wosusui be woate ŋu atsɔe awɔ nugbagbeviwutike siwo maxɔ asi o eye womanye aɖinu na amegbetɔ kple lãwo o si wɔwɔ masesẽ o ɖe esiwo wotsɔ nu vovovowo tsaka wɔe la teƒe. Le kpɔɖeŋu me, le Nicaragua la, agbledelawo to liliku de tsi me—wodea kua gram 80 tsi lita ɖeka me. Wona wònɔa eme gaƒoƒo 12 eye wotsyɔa kua le eme wua tsia ɖe woƒe agblemenukuwo dzi.

Lilititikewo mewua nudzodzoe akpa gãtɔ tẽ o. Ne wowu lilititike nukuwo la, etrɔa nudzodzoeawo ƒe agbenɔnɔ, ale be mlɔeba la, womegate ŋu ɖua nu, dzina, alo trɔa nɔnɔme o. Gake togbɔ be liliti me nuwo menyo na ɖuatiɖuatiwo o hã la, ewɔ abe ɖe womegblẽa nu le xeviwo, lãfɔnewo, alo amegbetɔ ŋu o ene.

“Kɔƒemetikewo Tsoƒe”

Egaɖea vi bubuwo hã na amegbetɔ. Atike siwo wua nugbagbevi siwo voa nu, dɔlékuiwo, kple dzawo, le kua kple eƒe aŋgbawo me. Ame aɖewo do susu ɖa be ɖewohĩ liliti ate ŋu ada lãmeʋudzoame, ʋusɔgbɔdɔ, kple dɔmebiwo. Wogblɔ be lilititikewo te ŋu daa suklidɔ kple asrã. Nusiwo wòganyo na ƒe ɖewoe nye esiawo:

Nudzodzoenyãtike. Lilitimetike aɖe si woyɔna be salannin te ŋu nyãa nudzodzoe ɖuame aɖewo ŋutɔ. Tagbatsu kple mu nyãtike aɖe si wotsɔ lilikumi wɔe la li xoxo wole dzadzram.

Atiɖuɖu. Indiatɔ geɖe ŋea lilitilɔe gbesiagbe ŋdi ɖua eƒe nugbɔ wòbɔbɔna wotsɔna tutua aɖu kple aɖulã ŋui. Numekuku fia be enyo, elabena atike siwo le atia ƒe tsro me te ŋu wua dɔlékui siwo naa nu vona la ŋutɔ.

Mɔxexe na fufɔfɔ. Lilikumi nye atike si te ŋu wua ŋutsu ƒe tsinyenye me nugbagbeviwo ŋutɔ eye ena dometsotso nɔ lã siwo dom kpɔ wonɔ ƒe vidzidzi dome. Dodokpɔ siwo wotsɔe wɔe le fiewo ŋu fia be woate ŋu atsɔ atike siwo woɖe tso eme awɔ mɔxexeɖevidzidzinutikekui na ŋutsuwo.

Edze kɔte be menye ati gbɔloe liliti nye o. Togbɔ be womenya nusianu tso lilitia ŋu o hã la, edze be woate ŋu atsɔe awɔ nu geɖe le etsɔme—na mɔxexe na nugbagbevi siwo gblẽa agblemenukuwo, ame ƒe lãmesẽ kpɔkpɔ, avewo dodo, kple ɖewohĩ na amewo ƒe agbɔsɔsɔ akpa. Eyata mewɔ nuku o be amewo yɔ liliti wɔnuku la be enye “Mawu ƒe nunana na ameƒomea”!

[Nɔnɔmetata siwo le axa 25]

Liliti, kple eƒe aŋgba le eme fotoa me