Ale Si Miawɔ Azã Ga Nyuie

KUXIA

Esi nèle ŋku ɖe wò gadzraɖoƒe ŋuti nyatakakawo kple fe siwo le ŋuwò ŋu la, èkpɔe be ɖeko yeƒe gawo le dudum abe ale si ke duduna le asi me na ame ene. Nyitsɔ laa koe mieɖe srɔ̃ gake miaƒe gazazãwo wu gbɔgblɔ. Srɔ̃wò gbɔe wòtsoa? Mègaƒo nya ta kpata nenema o. Mi ame evea milé ŋku ɖe nu siwo gbɔ wòanya tso be nuwo va yi na mi alea ŋu.a

NU SI GBƆ WÒTSONA

Nɔnɔmewo trɔ. Ne dziwòlawo gbɔe nènɔ hafi va ɖe srɔ̃ la, ɖewohĩ nugblẽfewo xexe azu nu yeye na wò. Anɔ eme be ale si mia dometɔ ɖe sia ɖe zãa gae la to vovovo na nɔvia tɔ. Le kpɔɖeŋu me, ɖewohĩ ame ɖeka zãa ga yakayaka evɔ ame evelia ya léa be na ga. Exɔa ɣeyiɣi hafi srɔ̃tɔwo ƒe susu va wɔa ɖeka le ale si woazã gã me.

Femaxemaxe ɖe game dzi. Jim si nye asitsala kpɔdzidze fifia la gblɔ be esi yeɖe srɔ̃ teti la, yeƒe ɖoɖo nyui mawɔmawɔ na be yenyi fe gbogbo aɖewo. Egblɔ be: “Esi mehe mía ŋu fewo xexe ɖe megbe ta la, nye kple srɔ̃nye míeva xe deme dɔlar geɖe ɖe fe siwo míenyi la dzi. Míaƒe kotokuwo me koe ƒu kplakplakpla!”

Ga la bu vĩi. Ele bɔbɔe be nàzã ga wu ale si dze ne wò ŋku mele ale si nèle ezãm la ŋu o. Esia ate ŋu adzɔ ne èzãa agbananuƒlegbalẽvi, ƒlea nu toa internet dzi kple esiawo tɔgbi. Ale si gadodo nɔa bɔbɔe ate ŋu azu mɔ̃ aɖe srɔ̃tɔ yeyewo.

Nu ka ke gbɔe wòɖatso o, ganyawo ate ŋu ahe kuxi sesẽwo ade miaƒe ƒomea me. Agbalẽ aɖe gblɔ be: “Srɔ̃tɔ geɖewo gblɔ be ga koŋue hea kuxiwo dea yewo dome, eɖanye ga home ka kee ɖale yewo si o. Ga koŋue hea masɔmasɔwo vɛ.”​—Fighting for Your Marriage.

NU SI MIATE ŊU AWƆ

Miɖoe be yewoawɔ nu ɖekae. Le esi mianɔ fɔ bum mia nɔewo teƒe la, miwɔ nu aduadu miatsɔ alé gazazã fũu akpa nu. Miɖoe tso gɔmedzedzea ke be yewomaɖe mɔ ga nade dzre yewo dome o.​—Biblia ƒe gɔmeɖose: Efesotɔwo 4:32.

Miwɔ ɖoɖo ɖe gazazã ŋu. Miŋlɔ ɣleti ɖeka ƒe gazazãwo katã da ɖi, ne woɖale sue hã. Esia akpe ɖe mia ŋu mianya nu siwo ŋu miele ga zãm ɖo ahanya nenye be miele ga zãm yakayaka. Jim si ŋu míeƒo nu tsoe va yi la gblɔ be: “Ele be nàƒo asa na gazazã fũu akpa.”

Miŋlɔ nu vevi siwo ŋu miezãa ga ɖo la ɖi; esia ate ŋu anye nuɖuɖu, nudodowo, xɔfewo, ʋuŋufewo kple esiawo tɔgbi. Miŋlɔ ga home si miesusu be yewoazã ɖe nu siawo dometɔ ɖe sia ɖe ŋu le ɣleti bliboa me la ɖi.​—Biblia ƒe gɔmeɖose: Luka 14:28.

Mima ga ɖe nu siwo ŋu miezãa ga ɖo la nu ɣleti sia ɣleti (nuɖuɖu, xɔfe, ʋuɖofe kple bubuawo). Ame aɖewo maa ga ɖe lɛtakotokuwo me ɖe nu siawo dometɔ ɖe sia ɖe nu.b Eye ne ga vɔ le lɛtakotoku aɖe me la, wodzudzɔa gazazã ɖe nu ma ŋu alo ɖea ga le lɛtakotoku bubu me tsɔ dea ema me.

Migbugbɔ ŋku lé ɖe ale si miebua nunɔamesiwoe ŋu. Menye nu siwo le tsia dzi ƒe amesisusu ye nana wokpɔa dzidzɔ o. Yesu gblɔ gɔ̃ hã be: “Ne nu gbogbo aɖewo le ame si hã la, eƒe agbe menɔa te ɖe nu siwo le esi la dzi o.” (Luka 12:15) Zi geɖe la, ale si miezãa gae aɖee afia nenye be miexɔ nya mawo dzi se.​—Biblia ƒe gɔmeɖose: 1 Timoteo 6:8.

Miwɔ tɔtrɔwo. Aaron si ɖe srɔ̃ ƒe evee nye esia gblɔ be: “Nanewo abe mɔɖaŋudɔwɔnu siwo nana woléa teƒe vovovowo le television dzi ƒeƒle kple nuɖuɖudzraƒewo yiyi aɖaɖu nu ate ŋu adze nu bɔbɔe ya, gake ate ŋu ana kotokua me nava ƒu kplakplakpla emegbe. Ele be míatu afɔ nanewo ƒeƒle me ale be míagazã ga fũu akpa o.”