Ale Si Wòanɔ Te Ðe Nu Nu

NU KAE WÒFIA BE WOANƆ TE ÐE NU NU?

Ame si nɔa te ɖe nu nu nye ame si tea ŋu trɔna ɖe nɔnɔmeawo ŋu bɔbɔe eye wògakpɔa dzidzɔ. Nanewo me toto ye nana nɔnɔme sia va sua ame si. Ale si ko ɖevi si le azɔlizɔzɔ srɔ̃m megbea anyidzedze o la, nenemae agbe madze edzi na ɖevi ne mesrɔ̃ ale si wòanɔ te ɖe kuxiwo nu o.

NU KA TAE TENƆNƆ ÐE NU NU LE VEVIE?

Dzi ɖena le ɖevi aɖewo ƒo ne wodo kpo nu, wole nɔnɔme sesẽ aɖe me tom, alo wohe nya ɖe wo ŋu. Ðewo ya naa ta kura. Ke hã, ele be wòase nyateƒenya vevi siawo gɔme:

• Míado kpo nu le nanewo me godoo.—Yakobo 3:2.

• Ame sia ame toa nɔnɔme sesẽ aɖe me ɣeaɖewoɣi.—Nyagblɔla 9:11.

• Ðɔɖɔɖo hiã be míate ŋu asrɔ̃ nu geɖe.—Lododowo 9:9.

Tenɔnɔ ɖe nu nu akpe ɖe viwòa ŋu be dzi nanɔ eƒo wòakpe akɔ kple agbemekuxiwo.

ALE SI NÀFIA VIWÒA BE WÒANƆ TE ÐE NU NU

Ne viwòa do kpo nu le nane me.

BIBLIA ƑE MƆFIAME: “Ne ame dzɔdzɔe dze anyi zi adre hã la, agafɔ.”—Lododowo 24:16.

Kpe ɖe viwòa ŋu be wòada nuwo akpɔ nyuie. Le kpɔɖeŋu me, nu kae wòawɔ ne ege le sukudodokpɔ aɖe me? Ðewohĩ ana ta agblɔ be, “Nye ya nyemate ŋu awɔ naneke wòanyo o!”

Be nàfia ale si wòanɔ te ɖe nu nui la, kpe ɖe eŋu wòakpɔe ɖa be nu kae yeawɔ be dodokpɔa nanyo ɣebubuɣi hã. Ne èwɔe elea la, viwòa ŋutɔ ate ŋu akpɔ kuxia gbɔ, wu be kuxia naɖu edzi.

Gake wò ŋutɔ mègakpɔ kuxia gbɔ nɛ o. Kpe ɖe eŋu be eya ŋutɔ boŋ nadi mɔ si dzi wòato akpɔ egbɔ. Àte ŋu abiae be: “Nu kae nèsusu be yeate ŋu awɔ be yeagase nyati ma gɔme nyuie wu ne wole efiam?”

Ne nya vɔ̃ aɖe dzɔ.

BIBLIA ƑE MƆFIAME: “Mienya ale si miaƒe agbe anɔ etsɔ o.”—Yakobo 4:14.

Ame aɖeke menya nu si adzɔ etsɔ o. Ame si nye gatɔ egbea ate ŋu ava zu hiãtɔ etsɔ; ame si le lãmesẽ me egbea ate ŋu ava zu dɔnɔ etsɔ. Biblia gblɔ be: “Dziɖuɖu le duɖimekeke me mele afɔ ɖeablɛ me ɣesiaɣi o, dziɖuɖu le aʋa me mele kalẽwɔwɔ me ɣesiaɣi o . . . elabena azãgbe kple nuɖiɖeame li na wo katã.”—Nyagblɔla 9:11.

Esi nènye dzila ta la, èwɔa tɔwò sinua be yeakpɔ ye via ta tso afɔku me. Gake manya wɔ be nàkpɔ viwòa ta tso kuxi ɖe sia ɖe me o.

Enye nyateƒe be viwòa metsi ase nu si wòfia be dɔ nagblẽ na ame alo be ame nanɔ gakuxiwo me tom gɔme o. Ke hã, àte ŋu akpe ɖe eŋu be wòanɔ te ɖe kuxi bubuwo abe, ne eya kple exɔlɔ̃ aɖe ƒe ƒomedodo me gblẽ alo ne miaƒe ƒometɔ aɖe ku ene nu.a

Ne wogbe nya na viwòa le nu gbegblẽ aɖe si wòwɔ ta.

BIBLIA ƑE MƆFIAME: “Se aɖaŋuɖoɖo . . . ne nàdze nunya le etsɔ si gbɔna me.”—Lododowo 19:20.

Ne ame aɖe gbe nya na viwò la, menye ŋlɔmi wɔm wòle le eŋu o; ke boŋ ele kpekpem ɖe eŋu be wòaɖe asi le nu gbegblẽ alo nɔnɔme gbegblẽ aɖe ŋu.

Ne èfia viwòa be wòalɔ̃ woaɖɔe ɖo la, aɖe vi na mi ame evea siaa. Vifofo aɖe si ŋkɔe nye John gblɔ be: “Ne ètsoa viwòwo xɔna le vodada ɖe sia ɖe si wowɔna me la, womasrɔ̃ nu gbeɖe o. Nu gbegblẽ wɔwɔ dzi koe woanɔ, eye gbe sia gbe la, ànɔ woƒe kuxiwo nu lém. Esia ana agbea nati dzilawo kple ɖeviawo siaa.”

Aleke nàte ŋu akpe ɖe viwòa ŋu be wòalɔ̃ woagbe nya nɛ? Ne wogbe nya na viwòa, le suku alo teƒe bubu aɖe la, ɖu ɖokuiwò dzi be màgagblɔ be mesɔ be woaɖɔe ɖo o. Ðe ema teƒe la, àte ŋu abiae be:

• “Èsusu be nu ka tae woɖɔ wò ɖo?”

• “Ðe nàte ŋu awɔ asitɔtrɔ aɖewoa?”

• “Ne ègakpɔ ɖokuiwò le nɔnɔme sia me ɣebubuɣi la, nu kae nàwɔ?”

Ðo ŋku edzi be ne wogbea nya na viwòa la, aɖe vi nɛ fifia kple ne eva tsi.