5. Ðe Fukpekpewo Nu Ava Yia?

Nu Si Ta Wòle Vevie

Ne susu aɖe li si tae míaxɔe ase be fukpekpewo nu ayi la, ke ana ale si míebua agbee kple ale si míebua Mawui la natrɔ.

Bu Nya Sia Ŋu Kpɔ

Ame geɖe dina be yewoaɖe fukpekpewo ɖa, gake ŋutetea mele wo ŋu o. De dzesi nya siwo gbɔna:

Togbɔ be woyi ŋgɔ le atikewɔwɔ me hã . . .

• Dzidɔ ye nye dɔléle si wua ame gbogbotɔwo.

• Kansa wua ame miliɔn geɖe ƒe sia ƒe.

• Ðɔkta David Bloom gblɔ le agbalẽ aɖe me be, “Togbɔ be ɖɔktawo ke ɖe atike geɖewo ŋu hã la, womete ŋu le dɔwo dam o, eye dɔléle yeyewo kple esiwo womegakpɔ kpɔ o ɣeyiɣi didi aɖe nye esia gɔ̃ hã le ta dom ɖa.”

Togbɔ be nu de dukɔ aɖewo dzi hã . . .

• Ƒe sia ƒe la, ɖevi miliɔn geɖe ye kuna, vevietɔ esiwo le nuto siwo me ahedada le me.

• Ame miliɔn geɖe le nuto siwo me dzadzɛnyenyenyawo mede amewo dzi le o.

• Ame miliɔn gbogbo aɖewo mekpɔa tsi nyui nona o.

Togbɔ be ame geɖe nya ale si woawɔ nu ɖe wo havi amegbetɔ ŋu egbea hã . . .

• Wogale amewo lém le dzadzram le dukɔ geɖe me, evɔ dukɔ mawo mele to hem na ame siwo le nu sia wɔm o. Dukɔ Ƒoƒuawo ka nya ta be, “dukɔ mawo ƒe dziɖuɖumegãwo menya be ele edzi yim o, alo mɔnu si woazã atsɔ ahe to na wo la meli o.”

  SRƆ̃ NU GEÐE KPEE

  Kpɔ video si nye Nu Kae Nye Mawu Fiaɖuƒe La? si le jw.org/ee.

Nya Si Biblia Gblɔ

Mawu léa be na mí.

Etena ɖe Mawu dzi ne míele veve sem alo le nu xam.

“[Mawu] medo vlo alo nyɔ ŋu hiãtɔ la ƒe fukpekpe o; meɣla eƒe ŋkume ɖee o. Eye esi wòdo ɣli nɛ be wòaxɔ na ye la, esee.”—PSALMO 22:24.

‘Midro miaƒe dzimaɖitsitsiwo katã ɖe edzi, elabena eléa be na mi.’—1 PETRO 5:7.

Fukpekpewo manɔ anyi ɖaa o.

Biblia do ŋugbe be tame si Mawu ɖo ɖe mía ŋu la ava eme.

“Mawu . . . atutu aɖatsi sia aɖatsi ɖa le woƒe ŋkume, eye ku maganɔ anyi akpɔ o, konyifafa kple ɣlidodo kpakple vevesese hã maganɔ anyi o.”—NYAÐEÐEFIA 21:3, 4.

Mawu aɖe nu siwo nana míekpea fu la ɖa.

Ato eƒe Fiaɖuƒe, si Biblia ɖɔ be enye dziɖuɖu ŋutɔŋutɔ la dzi, awɔ esia.

“Dziƒo ƒe Mawu la aɖo fiaɖuƒe aɖe anyi, si matsrɔ̃ gbeɖegbeɖe o. Eye fiaɖuƒe sia mayi ɖe dukɔ bubu aɖeke si me o. . . . Eya ɖeɖe anɔ anyi tegbee.”—DANIEL 2:44.