Nunya Si Nana Dzidzɔ Nɔa Ƒomewo Me

Srɔ̃ŋutsuwo, Milɔ̃ Mia Srɔ̃wo

“Srɔ̃ŋutsuwo nalɔ̃ wo srɔ̃wo abe woawo ŋutɔwo ƒe ŋutilã ene. Ŋutsu si lɔ̃a srɔ̃a la lɔ̃a eɖokui, elabena ame aɖeke melé fu eya ŋutɔ ƒe ŋutilã kpɔ o, ke boŋ enyinɛ, eye wòléa be nɛ nyuie.”—EFESOTƆWO 5:28, 29.

Srɔ̃ŋutsue nye ƒomea ƒe ta. (Efesotɔwo 5:23) Gake srɔ̃ŋutsu nyui mewɔa ŋlɔmi alo sẽa tame le srɔ̃a ŋu o. Ke boŋ edea asixɔxɔ eŋu, lɔ̃nɛ vevie eye wòkpɔa eƒe nuhiahiãwo gbɔ. Azɔ hã, edzea agbagba wɔa nu siwo ado dzidzɔ na srɔ̃a, eye mezia edzi be wòawɔ nu si yedi ɣesiaɣi o. (Filipitɔwo 2:4) Egblɔa eƒe susuwo kple seselelãmewo nɛ faa, eye eɖoa to sea eya hã ƒe susuwo. Medoa “domedzoe . . . helĩhelĩ” ɖe srɔ̃a ŋu o, eye meƒonɛ alo dzunɛ o.—Kolosetɔwo 3:19.

Srɔ̃nyɔnuwo, Mide Bubu Mia Srɔ̃ Ŋu

“Srɔ̃nyɔnu . . . nade bubu deto srɔ̃a ŋu.”—EFESOTƆWO 5:33.

Ne srɔ̃nyɔnu dea bubu srɔ̃a ŋu eye wòlɔ̃na ɖe eƒe nyametsotsowo dzia, ana ŋutifafa nanɔ ƒomea me. Ne ŋutsua wɔ vodadaa, meɖia gbɔe o, ke boŋ ewɔa nu ɖe eŋu le tufafa me eye wòdea bubu eŋu. (1 Petro 3:4) Ne edi be yeaɖe kuxi aɖe dzi na srɔ̃a, edia ɣeyiɣi nyuitɔ si dzi wòawɔe le, eye wòƒoa nu nɛ tso nyaa ŋu le bubumɔ nu.—Nyagblɔla 3:7.

Wɔ Nuteƒe Na Srɔ̃wò

‘Ŋutsu aku ɖe srɔ̃a ŋu, eye woazu ŋutilã ɖeka.’—1 MOSE 2:24.

Ne ŋutsu kple nyɔnu ɖe wo nɔewoa, wova zua ƒome ɖeka. Eya ta be srɔ̃tɔwo dome nanɔ kplikplikplia, ele be woadze agbagba geɖe anɔ dze ɖom tso dzi me eye woanɔ dɔme nyom na wo nɔewo. Azɔ hã, ele be woawɔ nuteƒe na wo nɔewo; mele be wo dometɔ aɖeke nadɔ kple ame bubu o. Ame si mewɔ nuteƒe na srɔ̃a oa doa vevesese nɛ. Enana megakana ɖe edzi o, eye esia ate ŋu agbã ƒomea.—Hebritɔwo 13:4.

Dzilawo, Mihe Mia Viwo

“Mla ɖevi ɖe mɔ si wòato la ŋu; ne eva tsi hã mate ɖa le edzi o.”—LODODOWO 22:6.

Mawu de dɔ asi na dzilawo be woahe wo viwo. Esia bia be woafia wo ale si woanɔ agbee, eye woaɖo kpɔɖeŋu nyui ɖi na wo. (5 Mose 6:6, 7) Ne ɖevi wɔ nu gbegblẽa, dzila nyui mawɔ nu wòagbɔ eme o. Ke boŋ ‘aɖe abla le nusese me, anɔ blewu le nuƒoƒo me eye wòanɔ blewu le dziku me.’ (Yakobo 1:19) Ne dzilaa kpɔe be ehiã be yeahe to na ye via, awɔe le lɔlɔ̃ me, ke menye le dziku me o.

Ðeviwo, Miɖo To Mia Dzilawo

“Mi ɖeviwo, miɖo to mia dzilawo . . . ‘Bu fofowò kple dawò.’”—EFESOTƆWO 6:1, 2.

Ele be ɖeviwo naɖo to wo dzilawo eye woade bubu wo ŋu vevie. Ne ɖeviwo dea bubu wo dzilawo ŋua, enana dzidzɔ kple ŋutifafa nɔa ƒomea me eye ƒomea wɔa ɖeka. Vi tsitsiwo dea bubu wo dzilawo ŋu ne wokpɔa woƒe nuhiahiãwo gbɔ. Nuhiahiã siawo ate ŋu anye ga alo wo dzilawo ƒe aƒe me dzadzra ɖo.—1 Timoteo 5:3, 4.