Mawu Do Paradiso Aɖe Ŋugbe

ESIA nye paradiso, si ƒomevi Mawu tsɔ fia eƒe nyagblɔɖila Yesaya la ƒe nɔnɔmetata. Yesaya nɔ agbe le Yona ƒe agbenɔɣi megbe kpuie.

Paradiso gɔmee nye “abɔ” alo “gbadzaƒe.” Ðe wòɖo ŋku nane, si míekpɔ le agbalẽ sia me va yi la dzi na wòa? Mele abe abɔ nyui, si Yehowa Mawu wɔ na Adam kple Xawa la ene oa? Gake ɖe anyigba bliboa ava nye paradiso gbaɖegbea?

Yehowa gblɔ na eƒe nyagblɔɖila Yesaya be wòaŋlɔ nu tso paradiso yeye, si gbɔna na Mawu ƒe amewo la ŋuti. Egblɔ be: ‘Amegãxiwo kple alẽwo anɔ afi ɖeka le ŋutifafa me. Nyiviwo kple dzataviwo aɖu gbe le afi ɖeka, eye ŋutsuvi sue akplɔ wo. Ne vidzĩe fe le da gbɔ hã la, mawɔ nuvevii o.’

Ame geɖe agblɔ be: ‘Nusia mate ŋu ava eme gbeɖe o. Fukpekpe le anyigba dzi tso gbaɖegbe ke, eye woanɔ anyi ɖaa.’ Gake bu eŋu kpɔ: Aƒe ka ƒomevie Mawu tsɔ na Adam kple Xawa?

Mawu da Adam kple Xawa ɖe paradiso me. Esi womeɖo to Mawu o la ko tae wobu woƒe aƒe nyui la, ku amegã heku. Mawu do ŋugbe be yeana nusiwo Adam kple Xawa bu la amesiwo lɔ̃ ye la.

Le paradiso yeye, si gbɔna me la, naneke mawɔ nuvevi ame alo agblẽ nu o. Ŋutifafa deblibo anɔ anyi. Amesiame anɔ lãmesẽ kple dzidzɔ me. Anɔ pɛpɛpɛ abe alesi Mawu di be wòanɔ le gɔmedzedzea me ene. Gake emegbe la, míasrɔ̃ alesi Mawu ahe esia vɛ la.