Ta 41

Nane si ŋu Woʋli Nya le Vevie

ESI wowɔ amedzro na Yesu le Simon ƒeme megbe ɣeyiɣi kpui aɖe la, edze gbeƒãɖeɖe ƒe mɔzɔzɔ evelia gɔme to Galilea-nutoa me. Le eƒe mɔzɔzɔ to anyigbamamã la katã me si do ŋgɔ me la, eƒe nusrɔ̃la gbãtɔ siwo nye Petro, Andrea, Yakobo, kple Yohanes kplɔe ɖo. Gake fifia apostolo 12 la, kpakple nyɔnu aɖewo hã kplɔe ɖo. Wo dometɔ aɖewoe nye Maria Magdalatɔ, Susana, kple Yohana, si srɔ̃ nye Fia Herodes ƒe xɔnuvi.

Esi ablaɖeɖe si Yesu tsɔ le subɔsubɔdɔa wɔm la le dzidzim ɖe edzi la, nenema ke nya si wonɔ ʋiʋlim ku ɖe eƒe dɔa ŋu hã nu nɔ sesẽm ɖe edzie. Wokplɔ ŋutsu aɖe si me gbɔgbɔ vɔ̃ le si nye ŋkuagbãtɔ eye mete ŋu ƒoa nu o la va Yesu gbɔe. Esi Yesu da gbe le eŋu ale be wòvo tso gbɔgbɔ vɔ̃a si me eye wòte ŋu ƒoa nu hekpɔa nu la, ewɔ mo yaa na amehawo ale gbegbe. Wodze biabia gɔme be: “Alo nenem me sia la menye Dawid vie o ɖe?”

Amehawo ƒo ƒu ɖe aƒe si me Yesu le la ale gbegbe be wo kple eƒe nusrɔ̃lawo megate ŋu ɖu nu hã o. Agbalẽfiala kple Farisitɔ siwo tso keke Yerusalem ke va be yewoaɖi gbɔe hã nɔ anyi kpe ɖe amesiwo susui be eyae anye ‘Dawid Vi’ si ŋugbe wodo la ŋu. Esi Yesu ƒe ƒometɔwo se alesi wotɔ zi ɖe Yesu ŋui la, wova be yewoalée. Nukatae?

Ẽ, Yesu nɔviwo kura gɔ̃ hã mexɔ edzi se haɖe be eyae nye Mawu ƒe Vi la o. Eye zitɔtɔ kple nyahehe si wòhe vɛ la nye nusi womenya le Yesu ŋu kura esime wònɔ Nazaret o. Eyata woxɔe se be nane gblẽ le Yesu ƒe susu ŋu vevie. Woƒo nya ta be: “Eƒe tame da!” eye wodi be yewoalée adzoe sesẽe.

Gake ɖaseɖiɖia me kɔ ƒã be Yesu da gbe le amesi me gbɔgbɔ vɔ̃ le la ŋu. Agbalẽfialawo kple Farisitɔwo nya be yewomate ŋu asẽ nu le nusia ƒe nyateƒenyenye ŋu o. Eyata be woada Yesu ɖe anyi la, wogblɔ na ameawo be: “Nenem me sia manyã gbɔgbɔ vɔ̃wo ado goe, ne menye to Beelzebul, si nye gbɔgbɔ vɔ̃wo ƒe fia la dzi o.”

Esi Yesu nya woƒe tame ta la, eyɔ Farisitɔwo kple agbalẽfialawo va eɖokui gbɔe hegblɔ be: “Fiaɖuƒe sia fiaɖuƒe, si mã ɖe ye ŋutɔ ɖokui ŋuti la, ezua aƒedo, eye du sia du alo aƒe sia aƒe, si mã ɖe ye ŋutɔ ɖokui ŋuti la, mele anyi nɔ ge o; eye ne Satana nyã Satana do go la, emã ɖe ye ŋutɔ ɖokui ŋuti, aleke lawɔ, eye eƒe fiaɖuƒe la anɔ anyi mahã?”

Nya si me susu le si nu womate ŋu anɔ te ɖo o kae nye si! Esi Farisitɔwo gblɔna be yewo ŋutɔ yewo dometɔ aɖewo hã nyã gbɔgbɔ vɔ̃wo do goe ta la, Yesu bia hã be: “Ne nye la menyã gbɔgbɔ vɔ̃wo do go to Beelzebul dzi la, ekema mia ŋutsuviwo la, ameka dzi woto nyã wo do goe mahã?” Le egbɔgblɔ bubui me la, ele be fɔ si wobu Yesu la nayi na woawo hã. Yesu xlɔ̃ nu be: “Ke ne nye la menyãa gbɔgbɔ vɔ̃wo doa go to Mawu ƒe gbɔgbɔ la dzi la, ekema Mawu ƒe fiaɖuƒe la do ɖe mia dzi.”

Be Yesu natsɔ aɖee afia be yeƒe gbɔgbɔ vɔ̃wo nyanyã do goe nye ɖaseɖiɖi be yekpɔ ŋusẽ ɖe Satana dzi la, egblɔ be: “Aleke ame lawɔ ayi ɖe ŋusẽtɔ la ƒe me, bena yeaha eƒe aƒemenuwo le esi, ne melé ŋusẽtɔ la bla gbã hafi oa? Ekema ko hafi wòaha eƒe aƒemenuwo. Amesi ke mele kplim o la, eya to vo ɖe ŋutinye; eye amesi ke meƒoa ƒu kplim o la, eya kana hlẽna.” Edze ƒã be Farisitɔwo tsi tre ɖe Yesu ŋu eye woto esia dzi le wo ɖokui ɖem fia be yewonye Satana ƒe dɔlawo. Wole Israel-viwo kam hlẽ le Yesu ŋu.

Eyata Yesu xlɔ̃ nu tsitretsiɖeŋula siawo siwo le abe Satana ene la be “busunya ɖe gbɔgbɔ la ŋuti la, womatsɔe ake o.” Eɖe eme be: “Ne ame aɖe agblɔ nya ɖe Amegbetɔvi la ŋuti la, woatsɔe akee, ke amesi ke agblɔ nya ɖe gbɔgbɔ kɔkɔe la ŋuti la, womatsɔe akee le xexe sia alo esi lava va la me o.” Agbalẽfiala kple Farisitɔ mawo wɔ nuvɔ̃ ma si ŋu tsɔtsɔke mele o la esi wotsɔ tame vɔ̃ ɖoɖo gblɔ be nusi dze ƒã be enye Mawu ƒe gbɔgbɔ kɔkɔea ƒe nukudɔwɔwɔ la tso Satana gbɔ. Mateo 12:22-32; Marko 3:19-30; Yohanes 7:5.

▪ Aleke Yesu ƒe mɔzɔzɔ evelia le Galilea to vovo tso gbãtɔ gbɔe?

▪ Nukatae Yesu ƒe ƒometɔwo dze agbagba be yewoalée sesẽe?

▪ Aleke Farisitɔwo te kpɔ be yewoada Yesu ƒe nukunuwo ɖe anyie, eye aleke Yesu ɖee fia be aʋatso kam wole?

▪ Nuvɔ̃ ka ƒe fɔe Farisitɔ mawo ɖi, eye nukatae?