Ta 42

Yesu Bu Fɔ Farisitɔwo

YESU ʋli nya kpli wo be ne Satana ƒe ŋusẽe yetsɔ nyãa gbɔgbɔ vɔ̃wo doa goe la, ekema Satana mã ɖe eɖokui ŋu. Eyi edzi gblɔ be: “Mido ati nyui la, eye eƒe kutsetse lanyo, alo mido ati manyomanyo la, eye eƒe kutsetse la manyo o; elabena ati ƒe tsetse wotsɔna dzea sii.”

Enye susumanɔmenya be woagblɔ be kutsetse nyui si nye gbɔgbɔ vɔ̃ nyanyã do goe la tso alesi Yesu le Satana subɔm la gbɔ. Ne kutsetsea nyo la, atia mate ŋu anye ati vóvo o. Ke Farisitɔwo ƒe kutsetse gbegblẽ si nye nutsotso siwo ŋu gɔmesese mele o kple tsitretsitsi ɖe Yesu ŋu evɔ menye nanekee wòwɔ hafi o la nye kpeɖodzi be woa ŋutɔwo nye ame gbegblẽwo. Yesu do ɣli be: “Dawo ƒe dzidzimeviwo! Aleke lawɔ mi, amesiwo vɔ̃ɖi la, miate ŋu agblɔ nya nyuiwo mahã? Elabena nya, si ke wu dzi la, eya nu gblɔna.”

Esi míaƒe nyawo ɖea míaƒe dzi ƒe nɔnɔme fiana ta la, woate ŋu anɔ te ɖe nusi míegblɔna dzi adrɔ̃ ʋɔnu mí. Yesu gblɔ be: “Nya dzodzro sia nya dzodzro, si amegbetɔwo lagblɔ la, woabu akɔnta le eŋuti le ʋɔnudrɔ̃gbeŋkeke la dzi. Elabena wò nyawo woatsɔ atso afia na wò, eye wò nyawo woatsɔ abu fɔ wò.”

Togbɔ be Yesu wɔ nukudɔ siawo katã hã la, agbalẽfialawo kple Farisitɔwo gale biabiam be: “Nufiala, míedi be, míakpɔ dzesi tso gbɔwò.” Togbɔ be amesiawo siwo tso Yerusalem la ŋutɔ manya kpɔ eƒe nukunuwo o hã la, eteƒekpɔlawo ƒe ɖaseɖiɖi siwo ŋu womate ŋu asẽ nu le o la li. Eyata Yesu gblɔ na Yudatɔwo ƒe kplɔlawo be: “Dzidzime vɔ̃ɖi wɔahasi le dzesi biam, eye womele dzesi na gee o, negbe nyagblɔɖila Yona ƒe dzesi la ko.”

Le nusi nya ma fia gɔme ɖeɖe me la, Yesu yi edzi be: “Abe alesi Yona nɔ ƒumelãtsu ƒe dɔ me xɔ ŋkeke etɔ̃ kple zã hã etɔ̃ la, nenema ke Amegbetɔvi la anɔ anyigba ƒe tu me ŋkeke etɔ̃ kple zã hã etɔ̃.” Esi tɔmelã la mi Yona vɔ la, edzoe wòdo go abe ɖe wofɔe ɖe tsitre ene, eyata Yesu le egblɔm ɖi be yeaku eye le ŋkeke etɔ̃liagbe yeafɔ ɖe tsitre agbagbee. Gake esi wofɔ Yesu ɖe tsitre emegbe kura gɔ̃ hã la, Yudatɔwo ƒe kplɔlawo gbe “Yona ƒe dzesi la.”

Eyata Yesu gblɔ be Niniwetɔ siwo trɔ dzime esime wose Yona ƒe gbeƒãɖeɖea la afɔ ɖe tsitre le ʋɔnudɔdrɔ̃a me ava bu fɔ Yudatɔ siwo gbe Yesu la. Nenema ke etsɔ Seba-fianyɔnu si tso anyigba ƒe mlɔeanu ke va be yease Salomo ƒe nunya eye nusi wòkpɔ kple nusi wòse wɔ mo yaa nɛ la hã wɔ kpɔɖeŋue. Yesu gblɔ be: “Kpɔ ɖa, amesi wu Salomo la, le afii!”

Emegbe Yesu gblɔ ŋutsu aɖe si me gbɔgbɔ vɔ̃ do go le la ƒe kpɔɖeŋu. Gake ŋutsua metsɔ nu nyuiwo xɔ ɖe teƒe si tsi ƒuƒlu la o, eyata gbɔgbɔ vɔ̃ adre bubu va ge ɖe eme. Yesu gblɔ be: “Nenema ke wòanɔ na nenem dzidzime vɔ̃ɖi sia hã.” Wokɔ Israel-dukɔa ŋu eye wowɔ tɔtrɔ geɖewo le eme—abe alesi gbɔgbɔ makɔmakɔ la dzo sẽe ene. Gake alesi dukɔa gbe Mawu ƒe nyagblɔɖilawo eye wotsɔ woƒe tsitretsitsi ɖe Kristo ŋutɔ ŋu ƒo etae la ɖee fia be nɔnɔme si me wova le la vɔ̃ɖi wu alesi wònɔ le eƒe gɔmedzedzea me.

Esi Yesu ganɔ nuƒoƒo dzi la, dadaa kple nɔviawo va eye wonɔ ameha la megbe. Eyata ame aɖe gblɔ be: “Kpɔ ɖa, dawò kple nɔviwòwo le tsitre le xexe le didim be, yewoaƒo nu kpli wò.”

Yesu bia be: “Amekae nye danye, eye amekawo nye nɔvinyewo mahã?” Edo abɔ ɖe eƒe nusrɔ̃lawo gbɔ eye wògblɔ be: “Kpɔ danye kple nɔvinyewo ɖa! Elabena amesi ke le Fofonye, si le dziƒowo, ƒe lɔlɔ̃nu wɔm la, eyae nye nɔvinyeŋutsu, enye nɔvinyenyɔnu, ganye danye hã.” To mɔ sia dzi la, Yesu ɖee fia be togbɔ be ƒomedodo si bla ye kple yeƒe ƒometɔwo ɖekae xɔ asi hã la, ƒomedodo si le ye kple yeƒe nusrɔ̃lawo dome la xɔ asi wu. Mateo 12:33-50; Marko 3:31-35; Luka 8:19-21.

▪ Aleke Farisitɔwo do kpo nana be “ati” la kple eƒe “kutsetse” nanyoe?

▪ Nukae nye “Yona ƒe dzesi la,” eye aleke wogbee emegbee?

▪ Aleke ƒe alafa gbãtɔ me Israel-dukɔa le abe ŋutsu si me gbɔgbɔ makɔmakɔ do go le la ene?

▪ Aleke Yesu te gbe ɖe ƒomedodo kplikplikpli si le wo kple eƒe nusrɔ̃lawo dome la dzie?