Ta 48

Dzodzo le Yairo ƒe Aƒeme kple Tɔtrɔ Yi Nazaret

VOVO mele Yesu ŋu le ŋkeke sia me kura o—ezɔ mɔ to ƒu dzi tso Dekapoli la, eda gbe le nyɔnu si nɔ ʋusisidɔ lém ŋu, eye wòfɔ Yairo vinyɔnuvia ɖe tsitre. Gake zã medo haɖe o. Edze ƒã be esi Yesu dzo le Yairo ƒe aƒeme la, ŋkuagbãtɔ eve dze eyome nɔ ɣli dom be: “Dawid vi la, kpɔ mía nublanui!”

Le Yesu yɔyɔ be ‘Dawid Vi’ me la, amesiawo le eɖem fia be yewoxɔ edzi se be Yesue nye Dawid ƒe fiazikpui la ƒe domenyila, eyata eyae nye Mesia si ŋugbe wodo la. Gake ewɔ abe ɖe Yesu mede nu me na ɣli si dom wole be wòakpe ɖe yewo ŋu la o ene, ɖewohĩ anye ɖe wòdi be yeado woƒe kutrikuku kpɔ. Gake ŋutsuawo mena ta o. Wodze Yesu yome yi afisi nye eƒe nɔƒe, eye esi wòge ɖe aƒea me la, wodze eyome ge ɖe eme.

Yesu bia wo se le afima be: “Miexɔe se bena, mate ŋu awɔ esia mahã?”

Wotsɔ kakaɖedzi ɖo eŋu be: “Ẽ, Aƒetɔ.”

Eyata Yesu ka asi woƒe ŋku ŋu eye wògblɔ be: “Ava me na mi le miaƒe xɔse la nu.” Kasia wodze nu kpɔkpɔ gɔme! Yesu de se na wo vevie be: “Kpɔ ɖa, migana ame aɖeke nanyae o.” Gake esi dzidzɔ yɔ wo me fũ la, womewɔ ɖe Yesu ƒe sededea dzi o eye woƒo nu tso eŋu le nutoa katã me.

Esi amesiawo dzo teti ko la, wotsɔ ame aɖe si me gbɔgbɔ vɔ̃ le, si gbɔgbɔ vɔ̃a na mete ŋu ƒoa nu o la vɛ. Yesu nyã gbɔgbɔ vɔ̃ la do goe eye enumake amea dze nuƒoƒo gɔme. Nukunu siawo wɔ mo yaa na amehawo eye wogblɔ be: “Womekpɔ nusia tɔgbee le Israel kpɔ o.”

Farisitɔwo hã le eteƒe. Womate ŋu asẽ nu le nukunuawo ŋu o, gake le woƒe dzimaxɔse vɔ̃ɖi la me la, wogagblɔ woƒe nutsotso si ku ɖe afisi Yesu kpɔ ŋusẽ tsoe hena nukunuwo wɔwɔ ŋu la be: “Gbɔgbɔ vɔ̃wo ƒe fia la dzie wòto nyã gbɔgbɔ vɔ̃wo do goe.”

Le nudzɔdzɔ siawo megbe kpuie la, Yesu trɔ yi wo de si nye Nazaret eye fifia ya eƒe nusrɔ̃lawo kplɔe ɖo. Anɔ abe ƒe ɖeka ene do ŋgɔ la, eyi ƒuƒoƒea eye wòfia nu le afima. Togbɔ be eƒe nya siwo dzɔa dzi na ame la wɔ mo yaa na amewo gbã hã la, emegbe wodo dɔmedzoe ɖe eƒe nufiafia ŋu eye wodi be yewoawui. Fifia Yesu tsɔ nublanuikpɔkpɔ gadze agbagba bubu be yeakpe ɖe amesiwo ye kpli wo yewo nɔ teƒe ɖeka tsã la ŋu.

Togbɔ be amewo nyè zi ɖe Yesu ŋu le teƒe bubuwo hã la, edze abe ɖe mele nenema le afisia ya o ene. Eyata eyi ƒuƒoƒea le Sabat dzi be yeafia nu. Amesiwo nɔ eƒe nyawo sem ƒe akpa gãtɔ tsi yaa. Wobia be: “Afika amesia kpɔ nenem nunya kple ŋusẽawo tsoe mahã? Nenem me sia la menye atikpala ƒe vie o ɖe? Alo menye ɖe woyɔa dadaa be: Maria, eye nɔviaŋutsuwo be: Yakobo, Yosef, Simon kple Yuda oa? Eye nɔvianyɔnuwo la menye wo katãe le mía dome o ɖe? Afika gɔ̃ amesia kpɔ nenem nusiawo katã tsoe mahã?”

Wosusu le wo ɖokui me be, ‘Mía kple Yesu koe nɔ afisia eye ɖeko míesɔ. Míekpɔ eƒe ɖevime, eye míenya ƒome si me wòtso hã. Aleke wòate ŋu anye Mesia lae?’ Eyata togbɔ be ɖaseɖiɖiawo katã—eƒe nunya gã la kple nukunuwo—dze hã la, wogbee. Esi wòmã ŋku na eƒe ƒometɔwo nyuie ta la, ezu nukikli na woawo kura gɔ̃ hã, eye esia na Yesu ƒo nya ta be: “Womedoa kpo nyagblɔɖila bubu o, negbe le ye ŋutɔ fofoawo de kple ye ŋutɔ ƒe me ko.”

Le nyateƒe me la, woƒe xɔsemanɔamesi la wɔ nuku na Yesu. Eyata mewɔ nukunu aɖeke le afima o negbe asi dada ɖe dɔnɔ ʋee aɖewo dzi kple gbedada le wo ŋu ko. Mateo 9:27-34; 13:54-58; Marko 6:1-6; Yesaya 9:6.

▪ Le Yesu yɔyɔ be ‘Dawid Vi’ me la, nukae ŋkuagbãtɔwo ɖee fia be yewoxɔ se?

▪ Numeɖeɖe ka dzie Farisitɔwo te tɔ ɖo ku ɖe Yesu ƒe nukunuwo ŋu?

▪ Nukatae wònye nublanuikpɔkpɔ le Yesu gome be wògatrɔ va be yeakpe ɖe Nazaretetɔwo ŋu?

▪ Aleke woxɔ Yesue le Nazaret, eye nukatae?