Ta 61

Eyɔ Dɔ Ŋutsuvi si me Gbɔgbɔ Vɔ̃ Le

ESIME Yesu, Petro, Yakobo kple Yohanes dzo, eye anye be Xermon-toa ƒe togbɛ aɖe dzie woyi la, kuxi aɖe va ɖe fu na nusrɔ̃la bubuawo. Esi Yesu trɔ gbɔ la, ekpɔe enumake be nya aɖe dzɔ. Ameha gã aɖe ƒo xlã eƒe nusrɔ̃lawo, eye agbalẽfialawo le nya ʋlim kpli wo. Esi ameawo kpɔ Yesu la, ewɔ nuku na wo ŋutɔ eye woƒu du yi egbɔ ɖado gbe nɛ. Ebia wo bena: “Nuka miele nu sẽm kpli wo?”

Ŋutsu aɖe do go tso ameha la dome va dze klo ɖe Yesu ŋkume heɖe eme be: “Nufiala, mekplɔ vinyeŋutsuvi, si me gbɔgbɔ maƒonu le la, va gbɔwò; eye afisi ke wòlée le la, enyamanɛ, eye futukpɔ dona le enu, eye wòɖua aɖukli, eye wòɖia ku; megblɔ na wò nusrɔ̃lawo bena, woanyãe ado goe, eye womete ŋui o.”

Edze ƒã be agbalẽfialawo tsɔ alesi nusrɔ̃lawo mete ŋu da gbe le ŋutsuvia ŋu o la wɔ nya gãe, eye ɖewohĩ wole fewu ɖum le woƒe agbagbadzedzewo ŋu. Le ɣeyiɣi vevi sia me tututu la, Yesu va do. Egblɔ be: “O, dzidzime maxɔse! Ɣekaɣi manɔ anyi kpli mi ase ɖo? Eye ɣekaɣi mado dzi ahe mi ase ɖo mahã?”

Edze abe amesiame si le afimae Yesu le nya la gblɔm na ene, gake ɖikeke mele eme o be agbalẽfialawo, amesiwo nɔ fu ɖem na eƒe nusrɔ̃lawo la koŋ ye wònɔ egblɔm na. Azɔ Yesu gblɔ ku ɖe ŋutsuvia ŋu be: “Mikplɔe va gbɔnye!” Gake esi ŋutsuvia va ɖo Yesu gbɔ la, gbɔgbɔ vɔ̃ si le eme la na wòtsyɔ kplo hele dablibɛ ƒom vevie. Ŋutsuvia nɔ mimlim le anyigba eye futukpɔ nɔ dodom le enu.

Yesu bia be: “Ɣekaɣi nusia va edzi?”

Fofoa ɖo eŋu be: “Tso keke eƒe ɖevime kee. Eye enuenu [gbɔgbɔ vɔ̃a tsɔnɛ] ƒua dzo me kple tɔ me, bena yeawui.” Azɔ fofoa ƒo koko bena: “Ne àte ŋu awɔ nane la, kpɔ míaƒe nublanui, ne naxɔ na mí.”

Ðewohĩ vifofoa nɔ kpekpeɖeŋu dim ƒe geɖe. Eye fifia esi Yesu ƒe nusrɔ̃lawo do kpo nu la, dzi ɖe le eƒo ŋutɔ. Esi Yesu tsɔ nya tso ŋutsua ƒe kokoƒoƒo mɔkpɔkpɔmanɔamesitɔe la me la, egblɔ dzideƒonametɔe bena: “Ne àte ŋui! Amesi xɔe se la, ate ŋu awɔ nusianu.”

Vifofoa gblɔ sesĩe enumake be: “Mexɔe se.” Gake egagblɔ kukuɖeɖetɔe be: “Xɔ na nye maxɔse la!”

Esi Yesu kpɔ bena ameha la le du ƒum gbɔna yewo gbɔ la, ewo ɖe gbɔgbɔ vɔ̃a ta bena: “Wò gbɔgbɔ maƒonu kple tokunɔ, mede se na wò, do go le eme, eye tso esia dzi la megayi ɖe eme o!” Esi gbɔgbɔ vɔ̃ la nɔ go dom la, egana ŋutsuvia do ɣli eye wòganɔ dablibɛ ƒom ŋutɔ. Azɔ ŋutsuvia mlɔ anyi ɖe anyigba maʋãmaʋãe, ale be ame akpa gãtɔ va nɔ gbɔgblɔm be: “Eku.” Gake Yesu lé ŋutsuvia ƒe alɔnu eye wòtsi tre.

Do ŋgɔ na esia esime wòdɔ nusrɔ̃lawo be woaɖaɖe gbe ƒã la, wonyã gbɔgbɔ vɔ̃wo do goe. Eyata azɔ esi woge ɖe aƒe aɖe me la, woawo ɖeɖe wobia Yesu bena: “Aleke wɔ míawo míete ŋu nyãe do go o mahã?”

Esi Yesu nɔ eɖem fia be woƒe dzimaxɔse tae la, eɖo eŋu be: “Esia ƒomevi la mate ŋu ado go to naneke me o, negbe to gbedodoɖa . . . me ko.” Edze ƒã be ehiã na dzadzraɖo hafi woate ŋu anyã gbɔgbɔ vɔ̃ sia si sẽ ŋu ŋutɔ la ado goe. Xɔse si nu sẽ kple gbedodoɖa si me woabia Mawu ƒe ŋusẽdoame ƒe kpekpeɖeŋu le la hiã.

Azɔ Yesu gblɔ kpee be: “Ne xɔse le mia si abe logoku ene la, miagblɔ na to sia bena: Te ɖa tso afisia nayi afime, eye ate ayi, eye naneke mele miaƒe ŋutete wu ge o.” Aleke gbegbe xɔse ate ŋu asẽ ŋue nye si!

Mɔxenu kple kuxi siwo xea mɔ na ŋgɔyiyi le Yehowa ƒe subɔsubɔ me la adze abe nusiwo dzi womate ŋu aɖu o eye womate ŋu aɖe wo ɖa o ene, abe to gã ŋutɔŋutɔ ene. Gake Yesu le eɖem fia be ne míetu xɔse ɖo le míaƒe dzi me, míede tsii eye míewɔe be wòdzi ɖe edzi la, akeke ta atsi eye ana míate ŋu aɖu mɔxenu kple kuxi mawo siwo le abe towo ene la dzi. Marko 9:14-29; Mateo 17:19, 20; Luka 9:37-43.

▪ Nɔnɔme kae Yesu do goe esime wòtrɔ gbɔ tso Xermon-toa dzi?

▪ Dzideƒonya kae Yesu gblɔ na ŋutsuvi si me gbɔgbɔ vɔ̃ le la fofo?

▪ Nukatae nusrɔ̃lawo mete ŋu nyã gbɔgbɔ vɔ̃a do goe o?

▪ Ŋusẽ ka gbegbee Yesu ɖee fia be ate ŋu anɔ xɔse si?