Ta 63

Ameɖɔɖɔɖo ƒe Aɖaŋuɖonya Bubuwo

ESIME Yesu kple eƒe nusrɔ̃lawo gakpɔtɔ le aƒea me le Kapernaum la, wodzro nya bubu me kpe ɖe apostoloawo ƒe nyaʋiʋli ku ɖe amesi nye gãtɔ ŋu la ŋuti. Esia hã nye nya aɖe si anya dzɔ esime wotrɔ gbɔna Kapernaum, eye Yesu ŋutɔ menɔ eteƒe o. Apostolo Yohanes ka nya ta bena: “Míekpɔ ame aɖe, si le gbɔgbɔ vɔ̃wo nyãm le go dom le wò ŋkɔ la dzi, eye míegbe nɛ, elabena mele mía yome o.”

Edze ƒã be Yohanes bu apostoloawo be wonye gbedalawo ƒe ha tɔxɛ aɖe si woawo ɖeɖekoe kpɔ mɔ ada dɔ. Eyata ese le eɖokui me be ŋutsua le ŋusẽdɔwo wɔm madzemadzee le esi menye yewoƒe ƒuƒoƒoa me tɔ o ta.

Gake Yesu ɖo aɖaŋu be: “Migagbe nɛ o! Elabena ame aɖeke meli, si awɔ ŋusẽdɔ le nye ŋkɔ la dzi, eye wòate ŋu agblɔ nya vɔ̃ enumake ɖe ŋunye o. Elabena amesi ke meto vo ɖe mía ŋuti o la, eya le mía dzi. Elabena amesi ke ana tsi kplu ɖeka mi be, miano le nye ŋkɔ me, esi wònye Kristo tɔ mienye ŋuti la, vavã mele egblɔm na mi bena: Eƒe fetu la mele eŋu tsi ge o.”

Mehiã be ŋutsu sia nava kplɔ Yesu ɖo ŋutɔŋutɔ hafi wòanye be ele eƒe akpa dzi o. Womeɖo Kristo-hamea anyi haɖe o, eyata woƒe ƒuƒoƒoa me si mele o la mefia be enye ha bubu me tɔ o. Ŋutsua xɔ Yesu ƒe ŋkɔa dzi se ŋutɔŋutɔ eyata wòte ŋu nyã gbɔgbɔ vɔ̃wo do goe. Enɔ nusi sɔ kple nusi Yesu gblɔ be edze na teƒeɖoɖo la wɔm. Yesu ɖee fia be le esia wɔwɔ ta la, eƒe fetu matsi eŋu o.

Ke ne apostoloawo ƒe nyawo kple nuwɔnawo zu nukikli na ŋutsua ɖe? Esia anye ŋkubiãnya ŋutɔ! Yesu gblɔ be: “Amesi ke laɖia ɖevi sue, siwo xɔa dzinye sena, dometɔ ɖeka nu la, enyo nɛ wu bena, woatsɔ té [si tedzi trona] atsi ɖe kɔ me nɛ, eye woatsɔe aƒu gbe ɖe ƒu me.”

Yesu gblɔ be ele be ye yomedzelawo naɖe nusianu si le vevie na wo abe asi, afɔ, alo ŋku ene si ana woakli nu la ɖa le woƒe agbenɔnɔ me. Anyo be woayi ɖe Mawu ƒe Fiaɖuƒea me esime nusia si gbɔ womelɔ̃a nu le o la mele wo ŋu o tsɔ wu be woanɔ eyome eye woatsɔ wo aƒu gbe ɖe Gehena (si nye aɖukpo si nɔa bibim le Yerusalem gbɔto), si tsi tre ɖi na tsɔtsrɔ̃ mavɔ la me.

Yesu xlɔ̃ nu hã bena: “Mikpɔ nyuie, ne miagado vlo nenem ɖevi sue siawo dometɔ ɖeka o; elabena mele egblɔm na mi bena: Woƒe mawudɔla, siwo le dziƒowo la, le Fofonye, si le dziƒowo la, ƒe mo kpɔm ɖaasi.” Azɔ egblɔ alesi ‘ame tsɛawo’ xɔ asie esime wòƒo nu tso ŋutsu aɖe si si alẽ alafa ɖeka le gake ɖeka bu la ŋuti. Yesu ɖe eme be ŋutsua agblẽ 99 la ɖi ayi aɖadi ɖeka si bu la, eye ne ekpɔe la, akpɔ dzidzɔ le eŋu wu le 99 la ŋu. Yesu ƒo eta azɔ be: “Nenema ke menye mia Fofo, si le dziƒowo la, ƒe lɔlɔ̃nu bena, nenem ɖevi sue siawo dometɔ ɖeka nabu o.”

Esi Yesu ƒe apostolowo ƒe nyaʋiʋlia anya nɔ susu me nɛ la, ede dzi ƒo na wo bena: “Mina dze naɖo mi, eye ŋutifafa nanɔ mia dome.” Dze nana nu vɔvɔwo vivina ɖe edzi. Nenemae kpɔɖeŋu ƒe dze nana nusi wogblɔ la xɔxɔ nɔa bɔbɔe wu. Dze ma tɔgbe si anɔ ame me la ana ŋutifafa nanɔ anyi.

Gake le amegbetɔ ƒe blibomademade ta la, ɣeaɖewoɣi la nyaʋiʋli sesẽwo ado mo ɖa. Yesu na mɔfiafia hena woawo hã gbɔ kpɔkpɔ. Yesu gblɔ be: “Ne nɔviwò wɔ nuvɔ̃ ɖe ŋutiwò la, yi ɖaɖee fiae le mia kple eya ɖeka ko dome; ne eɖo to wò la, ekema èɖe nɔviwò.” Yesu ɖo aɖaŋu be ne meɖo to wò o la, “yi ɖatsɔ ame ɖeka alo eve kpe ɖe ɖokuiwò ŋu, bena le ɖaseɖila eve alo etɔ̃ nu la woaɖo kpe nya sia nya dzi.”

Yesu gblɔ be ne èwɔ ɖesiaɖe wòglo ko hafi natsɔ nya la ayi na “hame la,” si fia dzikpɔla siwo wode dɔ asi na le hamea me, amesiwo ate ŋu awɔ ʋɔnudɔdrɔ̃ ƒe nyametsotso. Yesu ƒo nya ta be ne nuvɔ̃wɔla la mewɔ ɖe woƒe nyametsotsoa dzi o la, “na ne wòanɔ na wò abe trɔ̃subɔla kple nudzɔla ene.”

Le nyametsotso ma wɔwɔ me la, ehiã be dzikpɔlawo nawɔ ɖe mɔfiafia siwo le Yehowa ƒe Nya la me dzi pɛpɛpɛ. To ema dzi la, ne wotso nya me be ame aɖe ɖi fɔ eye edze na tohehe la, ʋɔnudɔdrɔ̃a ‘anye nusi wobla le dziƒo xoxo.’ Eye ne ‘wotu nane le anyigba dzi,’ si nye be wokpɔ be amea meɖi fɔ o la, anye nusi le “tutu le dziƒo” xoxo. Yesu gblɔ be le ʋɔnudrɔ̃nya mawo gbɔ kpɔkpɔ me la, “afisi ame eve alo ame etɔ̃ wokpe ta ɖo le nye ŋkɔa dzi la, afima mele wo titina.” Mateo 18:6-20; Marko 9:38-50; Luka 9:49, 50.

▪ Nukatae mehiã le Yesu ƒe ŋkekeawo me be woakplɔe ɖo o?

▪ Aleke ame tsɛ nu ɖiaɖia nye ŋkubiãnyae, eye kpɔɖeŋu kae Yesu gblɔ tsɔ fia alesi ame tsɛ mawo le vevie?

▪ Nukae anya ʋã Yesu be wòde dzi ƒo na apostoloawo be woana dze naɖo wo?

▪ Nukae ‘nuwo babla’ kple ‘nuwo tutu’ fia?