NUSRƆ̃LAWO WƆWƆ
NUSƆSRƆ̃ 10
Di Vevie Be Yeakpe Ðe Amea Ŋu
Nya si Biblia gblɔ: “Edzɔ dzi na mí vevie be, menye Mawu ƒe nya nyui la ɖeɖe ko míatsɔ ana mi o, ke míawo ŋutɔ mía ɖokuiwo hãe, elabena mieva zu míaƒe lɔlɔ̃tɔwo.”—1 Tes. 2:8.
Ale Si Yesu Wɔe
1. Kpɔ VIDEOA, alo xlẽ Yohanes 3:1, 2. Eyome nàbu biabia siawo ŋu:
Anye nu ka tae Nikodemo va Yesu gbɔ le zã me?—Kpɔ Yohanes 12:42, 43.
Esi Yesu lɔ̃ faa xɔ Nikodemo le zã mea, aleke esia ɖee fia be edi vevie be yeakpe ɖe amewo ŋu woava zu nusrɔ̃lawo?
Nu Kae Míesrɔ̃ Tso Yesu Gbɔ?
2. Ne míelɔ̃ amewoa, míadi vevie be míakpe ɖe wo ŋu woava zu nusrɔ̃lawo.
Srɔ̃ Yesu
3. Srɔ̃ nu kple nusrɔ̃via le teƒe kple game si sɔ nɛ dzi. Ðewohĩ nusrɔ̃via adi be yeasrɔ̃ nua le ŋkeke alo game aɖe koŋ dzi. Teƒe kae wòaɖe dzi ɖi le wu asrɔ̃ nua? Eƒe aƒe mea, dɔwɔƒea, alo teƒe bubu aɖea? Ne anya wɔa, srɔ̃ nu kple nusrɔ̃via le teƒe kple game si wòɖo na wò dzi.
4. Misrɔ̃ nua edziedzi. Ne wò ŋutɔ mate ŋu ayi egbɔ oa, mègana nusɔsrɔ̃a natsi eme o, ke boŋ kpɔe ɖa be ɖoɖo bubu kae yeawɔ hã. Le kpɔɖeŋu me:
a. Ðe miate ŋu asrɔ̃ nua le ŋkeke bubu aɖe dzi le kwasiɖa mea?
b. Ðe miate ŋu asrɔ̃ nua le fon alo videokadodo dzia?
d. Ðe nàte ŋu ana gbeƒãɖela bubu aɖe navae srɔ̃ nua kpliia?
5. Do gbe ɖa be wò susu nanɔ eƒe nɔnɔme nyuiwo ŋu. Ne nusrɔ̃via mete ŋu le nua srɔ̃m edziedzi o, alo ele sesẽm nɛ be wòawɔ nu siwo srɔ̃m wòle dzia, bia Yehowa wòado ŋusẽ wò nàyi edzi akpe ɖe nusrɔ̃via ŋu. (Flp. 2:13) Anɔ eme be nɔnɔme nyui geɖe le nusrɔ̃via si, ta do gbe ɖa na Yehowa be wòakpe ɖe ŋuwò wò susu nanɔ wo ŋu.