Wole Tsitre Ðe Dɔ Geɖe Wu Wɔwɔ ƒe Agbo Nu

“HOƲIƲLIGBƆGBƆ aɖeke menɔ anyi o. Amesiame di dzidzedzekpɔkpɔ na nɔvia. Mí katã míeto vo tso mía nɔewo gbɔ ŋutɔ, gake le mía gome la, sukuvi ɖesiaɖe le vevie ŋutɔ.” Aleae Richard kple Lusia gblɔ le wo nɔvi Gbetakpɔxɔ Habɔbɔa ƒe Gilead Biblia Suku ƒe klass 105 lia ŋu. Lowell, si nye sukuhati lɔ̃ ɖe edzi eye wògblɔ kpee be: “Míaƒe vovototoawo te mí ƒo ƒui.”

Klass sia si wu suku nu le September 12, 1998, dzi to vovo nyateƒe. Sukuviawo dometɔ aɖewo wɔ mɔɖeɖedɔ le teƒe siwo Fiaɖuƒe gbeƒãɖela geɖe hiã le; bubuwo subɔ nuteƒewɔwɔtɔe le afisi medidi tso wo de o. Ele na wo dometɔ ʋee aɖewo abe Mats kple Rose-Marie ene be woatsɔ ɣeyiɣi geɖe adze agbagba vevie be Eŋlisigbe namã wo nyuie wu hafi wova sukua. Sukuviawo dometɔ geɖe nɔ dutanyanyuigbɔgblɔdɔ ŋu bum tso ɖevime ke. Nɔvi aɖe kple srɔ̃a bia zi gbɔ zi 12 sɔŋ be yewoade suku sia; aleke dzi dzɔ woe nye si esi womia asi wo be woade klass 105 lia!

Kwasiɖa 20 ƒe hehenana vevi sia va yi kaba ŋutɔ. Kaka sukuviawo nakpɔ la, wotsɔ woƒe sukunuŋɔŋlɔ mamlɛtɔ na, eye wowu woƒe nuƒoƒodɔdasi mamlɛtɔ nu xoxo, eye sukunuwuwu ŋkekea va ɖo.

Wɔnawo ƒe zimenɔla, Albert Schroeder, amesi nye Gbetakpɔxɔ Habɔbɔa ƒe Dziɖuha la me tɔ, ɖo ŋku edzi na sukuviawo be wole “tsitre ɖe dɔ geɖe wu wɔwɔ ƒe agbo nu le Biblia fiafiadɔ me,” eye woava dze ame 7,000 siwo de Gilead do ŋgɔ na wo la yome. Egblɔ be le dzomeŋɔlia la, sukuviawo se vivi le mɔnukpɔkpɔ si nye hadede kple dutanyanyuigblɔla xoxowo me esime woɖi tsa va Habɔbɔa ƒe dɔwɔƒegã le dukɔwo dome takpekpewo wɔɣi.

Emegbe Nɔviŋutsu Schroeder yɔ Max Larson si nye Betel Dɔwo Dzikpɔkɔmiti me tɔ. Eƒo nu tso tanya si nye “Hehenana si Kplɔa Ame Yia Agbe Mavɔ Me” ŋu. Nɔviŋutsu Larson yɔ nya tso Lododowo 1:5, afisi wogblɔ le be: “Nunyala nasee, eye wòadzi eƒe nunya ɖe dzi, eye mɔ sɔsɔe nasu nugɔmesela si.” Ehiã na aɖaŋu hafi woazu dutanyanyuigblɔla bibi. Aɖaŋudzelawoe tsia tre ɖe fiawo ŋkume. (Lododowo 22:29) Esi sukuviawo xɔ hehe ɣleti atɔ̃ sɔŋ ta la, wosu te nyuie be woanɔ Fia gãtɔwo kekeake, Yehowa Mawu kple Kristo Yesu teƒe.

David Olson, si nye Subɔsubɔ Kɔmitia me tɔe ƒo nu kplɔe ɖo tso nyati si nye “Mina Míado Dzidzɔ na Yehowa ƒe Dzi” ŋu. Ebia be: “Nukae amegbetɔ madeblibowo ate ŋu awɔ ado dzidzɔ na Mawu ƒe dzi?” Nukae nye ŋuɖoɖoa? Woate ŋu asubɔe le anukwareɖiɖi, nuteƒewɔwɔ, kple le dzidzɔ me. Yehowa di be yeƒe amewo nakpɔ dzidzɔ le ye subɔsubɔ me. Ne míetsɔ dzidzɔ wɔ Mawu ƒe lɔlɔ̃nui la, míedoa dzidzɔ na eƒe dzi. (Lododowo 27:11) Nɔviŋutsu Olson xlẽ lɛta aɖe si tso dutanyanyuigblɔla aɖe kple srɔ̃a siwo wu Gilead Suku nu le klass 104 lia me gbɔ. Ðe wole dzidzɔ kpɔm le woƒe dɔdasi yeyea mea? Woŋlɔ tso woƒe hamea ŋu be: “Gbeƒãɖela 104 ye le míaƒe hamea me, eye ame 250 va ɖo 300 ye vaa kpekpeawo le mamã dedie nu. Dɔa ƒe ami mee nye gbeadzisubɔsubɔdɔa. Nusrɔ̃vi ene le mía dometɔ ɖesiaɖe si, eye wo dometɔ aɖewo le kpekpeawo dem xoxo.”

Lyman Swingle, si hã nye Dziɖuha la me tɔ, ƒo nu tso tanya si nye “Ɣeyiɣi si Nàtɔ Vie Àxlẽ Wò Yayrawo.” Gilead hehenana he yayra geɖe vɛ. Ekpe ɖe sukuviawo ŋu wodzi woƒe sidzedze ɖe edzi, woƒe ŋudzedzekpɔkpɔ ɖe Yehowa ƒe habɔbɔa ŋu dzi ɖe edzi, eye wotu nɔnɔme veviwo, abe ɖokuibɔbɔ ene ɖo. Nɔviŋutsu Swingle gblɔ be: “Miaƒe afisia nɔnɔ ase nufiame fia ɖokuibɔbɔ mi. Miegava bi ɖe edzi nyuie akafu Yehowa.”

“Mikpɔ Dzidzɔ Gã si me Miele Ða—Eyata Nukata Miagaxa Nu?” ye nye tanya si ŋu Daniel Sydlik, si hã nye Dziɖuha la me tɔ ƒo nu tsoe. Exlɔ̃ nu wo be, ne kuxiwo do mo ɖa la, woadi mɔfiame tso Ŋɔŋlɔawo me. Nɔviŋutsu Sydlik zã Mateo ta 6 lia ƒe kpukpui tiatia aɖewo tsɔ wɔ alesi woate ŋu awɔ esiae ƒe kpɔɖeŋu. Xɔsemanɔamesi ate ŋu ana míatsi dzi ɖe xexemenuwo, abe nuɖuɖu kple nudodo ene ŋu. Gake Yehowa nya nusiwo hiã mí. (Mateo 6:25, 30) Ðeko dzitsitsi ana gbesiagbekuxiawo nadzi ɖe edzi. (Mateo 6:34) Gake ɖoɖowɔwɔ hiã. (Tsɔe sɔ kple Luka 14:28.) Nɔviŋutsu Sydlik ɖe eme be: “Menye etsɔme ŋu bubu le nunya mee Yesu le gbegbem na mí o, ke dzitsitsi ɖe eŋu madzemadzee. Dɔ aɖe wɔwɔ ye nye dzimaɖitsitsi gbɔkpɔnu vevitɔwo kekeake dometɔ ɖeka. Ne eva eme be míetsi dzodzodzoe la, nunya anɔ eme be míaƒo mía ɖokui ɖe nyateƒea gbɔgblɔ na amewo me.”

Nufialawo ƒe Aɖaŋuɖoɖo Mamlɛawo

Gilead Sukua ƒe nufiala etɔ̃ ye ƒo nu kplɔe ɖo. Karl Adams ye ƒo nu gbã, tso tanya si nye “Aleke Nàɖo Eteƒe na Yehowae?” ŋu. Etu eƒe nuƒoa ɖe Psalmo 116 lia, si anɔ eme be eyae nye ha si Yesu dzi le zã mamlɛa do ŋgɔ na eƒe ku la me. (Mateo 26:30, NW ƒe etenuŋɔŋlɔ) Nukae nɔ susu me na Yesu esime wòanɔ hagbe siawo dzim be: “Aleke maɖo dɔmenyo, siwo katã Yehowa wɔ nam la, teƒe nɛ”? (Psalmo 116:12) Anɔ eme be enɔ ŋugble dem le ŋutilã deblibo si Yehowa dzra ɖo nɛ la ŋu. (Hebritɔwo 10:5) Atsɔ ŋutilã ma asa vɔe le ŋufɔke, atsɔ aɖo kpe lɔlɔ̃ si gbegbe le eme dzi. Sukuvi siwo nye klass 105 lia me tɔwo ɖɔ Yehowa ƒe dɔmenyonyo kpɔ le ɣleti atɔ̃ siwo va yi me. Fifia wole woƒe lɔlɔ̃ na Mawu ɖe ge afia to woƒe dutanyanyuigbɔgblɔ dɔdasiwo wɔwɔ veviedodotɔe me.

Mark Noumair, si nye Gilead nufiala evelia si ƒo nu la, xlɔ̃ nu sukuviawo be “Miyi Edzi Miawɔ Nusi Le Eteƒe.” Esi wodzra Yosef kluvii le Egipte la, edo dzi kpe ŋlɔmiwɔwɔ ƒe fu ƒe 13 sɔŋ. Ðe wòɖe mɔ ame bubuwo ƒe nuwɔna vɔ̃ɖiwo na eƒe lãme fa ɖe Mawu subɔsubɔ ŋua? Ao, eyi edzi wɔ nusi le eteƒe. Emegbe le Mawu ƒe ɣeyiɣi ɖoɖi dzi la, woɖe Yosef tso eƒe fukpekpewo me. Kasia, edo le gaxɔ me va yi ɖanɔ fiasã me. (Mose I, ta 37-50) Nufiala la bia eƒe sukuviawo be: “Ne nuwo meva nɔ na mi le miaƒe dutanyanyuigbɔgblɔ dɔdasia me abe alesi miesusui ene o la, ɖe miadzudzɔ dɔa? Ðe dziɖeleameƒo ana miadzudzɔa? Alo miado dzi abe Yosef ene?”

Mlɔeba la, Gilead Sukua ƒe ŋkɔŋlɔla, Wallace Liverance, wɔ numedzodzro lédziname aɖe si ƒe tanyae nye “Miɖe Gbeƒã Fia la Kple Fiaɖuƒea,” kple sukuviawo dometɔ aɖewo. Sukuviawo dometɔ aɖewo gblɔ nuteƒekpɔkpɔwo tso woƒe gbeƒãɖeɖe tso aƒeme yi aƒeme, fiase me yi fiase me, kple le ablɔwo dzi ŋu. Bubuwo gblɔ alesi woɖi ɖase na gbe bubu dolawoe. Eye bubuwo hã wɔ alesi woaɖi ɖase na subɔsubɔha vovovowo me tɔwoe fia. Sukunuwulaawo katã di vevie be yewoakpɔ gome blibo le subɔsubɔdɔa me le teƒe siwo yewoawɔ dutanyanyuigbɔgblɔdɔa le.

Dutanyanyuigblɔla Xoxo Kpɔdzidzɔwo

Robert Wallen ye ƒo nu tso tanya si nye “Dutanyanyuigbɔgblɔdɔa Me Tsonu Dodzidzɔnamewo,” ŋu le wɔna ƒe akpa si kplɔe ɖo me eye wòbia gbe nɔviŋutsu ene siwo tso dɔwɔƒea ƒe ta, amesiwo de ha tuameɖowo kple dutanyanyuigblɔla kpɔnuteƒewo nyitsɔ laa. Dutanyanyuigblɔla mawo lɔ̃ ɖe edzi kaba be menɔ bɔbɔe na yewo le gbegbɔgblɔ yeye sɔsrɔ̃, tɔtrɔ ɖe dekɔnu yeyewo, alo tɔtrɔ ɖe yame ƒe nɔnɔme si to vovo ŋu me o. Aƒedzroame ƒe blanuiléle hã nye kuxi bubu. Ɣeaɖewoɣi dɔlényawo ɖea fu. Gake le wo katã me la, nukpɔsusu nyui nɔa dutanyanyuigblɔlaawo si, eye woɖo woƒe dzidodo teƒe na wo. Wo dometɔ aɖewo kpe ɖe ame gbogbo aɖewo ŋu wova dze si Yehowa. Bubuwo na kpekpeɖeŋu le mɔ vovovowo nu le Fiaɖuƒea ƒe dɔwo dodo ɖe ŋgɔ me le anyigba siwo dzi wole.

Nuƒola mamlɛae nye Carey Barber, si nye Dziɖuha la me tɔ. Edzro “Mawu ƒe Agbemɔ” takpekpea ƒe wɔnawo me. Ebia eƒe nyaselawo be: “Ŋusẽ kae takpekpea ƒe wɔnawo kpɔ ɖe mia kple Yehowa dome ƒomedodo dzi?” Nuƒola la tsɔ yayra si tsoa Mawu ƒe mɔwo dzi zɔzɔ me sɔ kple xexeame ƒe mɔ si kplɔa ame yia tsɔtsrɔ̃ me. Eƒo nu tso vodada si Mose wɔ le Meriba (dzrewɔtsi la) gbɔ ŋu, eye wòxlɔ̃ nu be: “Ne ame aɖe subɔ nuteƒewɔwɔtɔe ƒe geɖe gɔ̃ hã la, Yehowa mebua Eƒe se dzɔdzɔewo dzidada le mɔ suetɔ kekeake gɔ̃ nu nu tsɛ o.” (Mose IV, 20:2-13) Neva eme be Mawu ƒe subɔlawo katã le afisiafi nalé woƒe subɔsubɔ ƒe mɔnukpɔkpɔ xɔasiwo me ɖe asi goŋgoŋ!

Ɣeyiɣia de azɔ be sukuviawo naxɔ woƒe ɖaseɖigbalẽwo. Ɣemaɣie sukuvia ɖeka xlẽ lɛta aɖe si sukuviawo ŋlɔ tsɔ ɖe woƒe ŋudzedzekpɔkpɔ ɖe hehexɔxɔa ŋu fia. Sukunuwuwu wɔnawo wu enu, le hadzidzi kple gbedodoɖa ʋãdziname aɖe megbe. Gake le klass 105 lia sia gome la, esia nye gɔmedzedze ko, elabena dutanyanyuigblɔla yeyeawo le “tsitre ɖe dɔ geɖe wu wɔwɔ ƒe agbo nu.”

[Aɖaka si le axa 23]

Sukuviawo Ŋuti Nyatakaka

Dukɔ siwo me wotso ƒe xexlẽme: 9

Dukɔ siwo me woɖo wo ɖo ƒe xexlẽme: 17

Sukuviawo ƒe xexlẽme: 48

Srɔ̃tɔwo: Wo katã

Ƒe si woxɔ le mamã dedie nu: 33

Ƒe si wole nyateƒea me mamã dedie: 16

Ɣeyiɣiawo katã ƒe subɔsubɔƒewo ƒe mamã dedie: 12

[Aɖaka si le axa 24]

Wotia Ɣeyiɣiawo Katã ƒe Subɔsubɔdɔ

Ben, si nye klass 105 lia nuwula, gblɔ be: “Esi menye ɖevi dzaa la, mɔɖeɖedɔa wɔwɔ meva susu me nam o.” Egblɔ kpee be: “Tsã ɖe mesusuna be amesiwo si ŋutete tɔxɛwo le eye woƒe nɔnɔmewo de wo dzi koe ate ŋu awɔ mɔɖeɖedɔa. Gake meva srɔ̃ alesi makpɔ dzidzɔ ɖe gbeadzisubɔsubɔdɔa ŋui. Emegbe meva de dzesii gbeɖeka be dɔ geɖe wu wɔwɔ le subɔsubɔdɔa me koe mɔɖeɖedɔa wɔwɔ nye. Ɣemaɣie mede dzesii be mate ŋu awɔ mɔɖeɖedɔa.”

Lusia gblɔ be, “wodea bubu ɣeawokatãɣi ƒe subɔlawo ŋu ŋutɔ le míaƒe aƒeme.” Eɖo ŋku alesi gbegbe woƒe hamea kpɔa dzidzɔe ɣesiaɣi si dutanyanyuigblɔlawo va srã wo kpɔ dzi. Egblɔ be: “Esi menɔ tsitsim la, enye nusi dze ƒã be ɣeawokatãɣi ƒe subɔsubɔdɔa ava nɔ nye ɖoɖowo me.”

Theodis dada ku esime wòxɔ ƒe 15. Egblɔ be: “Ɣemaɣi la, hamea kpe ɖe ŋunye ŋutɔ. Eyata mebia ɖokuinye be, ‘Nuka mate ŋu awɔ atsɔ aɖe nye ŋudzedzekpɔkpɔ afia?’ ” Esia na be wòƒo eɖokui ɖe ɣeawokatãɣi ƒe subɔsubɔdɔa me eye fifia ele dutanyanyuigbɔgblɔdɔ wɔm.

[Nɔnɔmetata si le axa 25]

Gbetakpɔxɔ Habɔbɔa ƒe Gilead Biblia Sukunuwulawo ƒe Klass 105 lia

Le amesiwo ƒe ŋkɔwo woŋlɔ ɖe ete me la, woxlẽ fliawo tso ŋgɔgbe yi megbee eye woŋlɔ ŋkɔawo tso miame yi ɖusime le fli ɖesiaɖe dzi

(1) Sampson, M.; Brown, I.; Heggli, G.; Abuyen, E.; Desbois, M.; Pourthié, P. (2) Kassam, G.; Lindberg, R.; Dapuzzo, A.; Taylor, C.; LeFevre, K.; Walker, S. (3) Baker, L.; Pellas, M.; Woggon, E.; Böhne, C.; Asplund, J.; Haile, J. (4) Pourthié, T.; Whittaker, J.; Palmer, L.; Norton, S.; Gering, M.; Haile, W. (5) Walker, J.; Böhne, A.; Groenveld, C.; Washington, M.; Whittaker, D.; Abuyen, J. (6) Gering, W.; Washington, K.; Pellas, M.; Desbois, R.; Heggli, T.; Asplund, Å. (7) Woggon, B.; LeFevre, R.; Taylor, L.; Brown, T.; Groenveld, R.; Palmer, R. (8) Norton, P.; Sampson, T.; Baker, C.; Lindberg, M.; Kassam, M.; Dapuzzo, M.