Mekpɔ Dzidzeme Togbɔ Be Dzigbãnyawo Ðe Kpe Nam Hã—Ale Si Biblia Kpe Ðe Ŋunye

Abe ale si Enrique Caravaca Acosta gblɔe ene

April 15, 1971 dzi ye. Menɔ mɔ dzi yina nye ƒometɔwo srã ge kpɔ le míaƒe ƒomea ƒe agblekɔƒe. Esi wònye be nyemegade aƒe kpɔ o ta la, menɔ mɔ kpɔm vevie be makpɔ ame sia ame. Menɔ eŋu bum nenye be wo katã woanɔ aƒe me, eye be wo dometɔ kae makpɔ gbã hã. Esi meɖo la, dzidzi ƒom ŋutɔ esi mekpɔ ame ene, siwo dome danye hã nɔ la woku tsi anyigba!

NYE nu ku ale gbegbe, eye gbɔgblɔ bu ɖem. Nu kae dzɔ? Nu kae mawɔ? Nyemekpɔ ame aɖeke hã le afi ma o, esia na metɔtɔ eye nyemenya nu si mawɔ o. Hafi mayi nyaa dzi la, mina maƒo nu tso ɖokuinye ŋu na mi gbã. Ekema miase ale si mese le ɖokuinye me ku ɖe dzigbãnya sia kple bubuwo ŋu la gɔme.

Míeke Ðe Nyateƒea Ŋu

Wodzim le Quirimán, si gogo Nicoya le Costa Rica. Le ƒe 1953 me, esime mexɔ ƒe 37 la, menɔ dzinyelawo gbɔ le míaƒe agblekɔƒea. Togbɔ be Katolikoha mee míenɔ tsi hã la, woƒe nufiafia aɖewo medoa dzidzɔ na mí o, eye biabia geɖewo nɔ mía si siwo míekpɔ ŋuɖoɖo na o.

Gbe ɖeka ŋdi la, ŋutsu aɖe si ŋkɔe nye Anatolio Alfaro va srã mí kpɔ eye wòde dzi ƒo na mí be míasrɔ̃ Biblia. Edzro mawunyakpukpui geɖewo me kpli mí hefia nu geɖewo hã mí tso Biblia me. Papa, Dada, nɔvinyeŋutsuawo dometɔ ɖeka, nɔvinyenyɔnu, kple exɔlɔ̃ aɖe si nɔ mía gbɔ, kple nye ŋutɔ hã, mí katã míenɔ anyi heɖo toe. Numedzodzroa yi edzi le ŋkeke bliboa me ʋuu va se ɖe zãtiƒe. Nyabiase geɖewo nɔ mía si.

Anatolio tsi mía gbɔ dɔ eye wòganɔ mía gbɔ le ŋkeke si kplɔe ɖo dzi. Nya siwo míese la do dzidzɔ na mí ŋutɔ, eye dzi gadzɔ mí wu esi wòɖo míaƒe biabiawo ŋu na mí tẽ tso Biblia me. Numedzodzro ma kpɔ ŋusẽ gã aɖe ɖe mía dzi. Míede ŋugble tso nu siwo míesrɔ̃ la ŋu, eye míeka ɖe edzi be míeke ɖe nyateƒea ŋu. Anatolio gblẽ magazine aɖewo kple agbalẽ siwo ƒo nu tso Biblia ŋu la ɖe mía gbɔ. Le fiẽsiwo me la, ƒome bliboa xlẽa agbalẽawo hesrɔ̃a wo ɖekae. Esia menɔ bɔbɔe o, le esi elektrikkaɖi menɔ anyi o ta. Hafi míanɔ anyi adze nusɔsrɔ̃a gɔme la, mía dometɔ ɖe sia ɖe tsɔa akpanyakotoku tsyɔa afɔ be muwo nagaɖu mí o.

Le ɣleti ade megbe la, míaƒe ƒomea me tɔ atɔ̃ xɔ nyɔnyrɔ—Papa, Dada, kple nye ŋutɔ hã míele eme. Míetsɔ dzidzɔ dze gbeƒãɖeɖe nu siwo míesrɔ̃ la na amewo tso aƒe me yi aƒe me. Míezɔa afɔ eye ɣeaɖewoɣi la, míedoa sɔ hena gaƒoƒo eve yia du aɖe si woyɔna be Carrillo me ɖaƒoa ƒu kple Yehowa Ðasefowo ƒe ƒuƒoƒo aɖe le afi ma. Anatolio yi edzi va nɔa Biblia srɔ̃m kple mi le míaƒe aƒe me. Emegbe wova wɔ ɖoɖo nɔa kpekpewo wɔm le míaƒe aƒe me, eye ame enyi lɔƒoe vaa kpekpe siawo. Wo katã wova xɔ nyɔnyrɔ mlɔeba. Eteƒe medidi o, ƒuƒoƒo ma dzi ɖe edzi va zu hame sue si me ame 20 aɖewo nɔ.

Subɔsubɔdɔ Wɔwɔ Na Mawu Ɣeyiɣiawo Katã

Le ɣeyiɣi aɖewo megbe la, Yehowa Ðasefowo ƒe alɔdzedɔwɔƒe si le Costa Rica la kpe ame siwo ate ŋui la be woaƒo wo ɖokui ɖe ɣeyiɣiawo katã ƒe gbeƒãɖeɖedɔa me. Le ƒe 1957 me la, mede asi agbalẽ te hete ɣeyiɣiawo katã ƒe gbeƒãɖeɖedɔa wɔwɔ. Dɔ sia wɔwɔ do dzidzɔ nam ale gbegbe. Zi geɖe la, nye ɖeka mezɔa afɔ hena gaƒoƒo geɖe hafi ɖoa ame siwo le kɔƒenutowo me la gbɔ. Ɣeaɖewoɣi la, amewo mexɔam nyuie o. Meɖo ŋku zi etɔ̃ aɖewo ya teti dzi esime ŋutsu aɖewo tsɔ yi do ŋɔdzi nam hedi be yewoanya ame si menye kple nu si wɔ ge meva.

Do ŋgɔ le ƒe 1950-awo me la, afɔmɔ glidzaglidza siwo to dzogbewo koe nɔ anyi, si wɔe be wòsesẽna na mí hafi míete ŋu ɖoa amewo gbɔ. Ele be míado sɔ hafi ate ŋu ade nuto aɖewo me. Míetsoa tɔsisiwo eye ɣeaɖewoɣi la, míetsia xexe dɔna. Muwo nyẽa zi ɖe mía dzi heɖua mí eteƒe mekɔna o. Ele be míanɔ ŋudzɔ ɖe dawo kple lowo hã ŋu. Le esiawo katã me la, mesea vivi le kpekpe ɖe amewo ŋu be woasrɔ̃ nu tso Yehowa Mawu ŋu me ŋutɔ. Ne meva ɖo aƒe me la, mekpɔa dzidzɔ eye nye dzi dzea eme le esi mefia Biblia me nyateƒea ame bubuwo ta. Esi meyi edzi ɖea gbeƒã hesrɔ̃a Biblia gbe sia gbe la, nye lɔlɔ̃ na Yehowa Mawu nu va sẽ ɖe edzi eye mese le ɖokui nye me be mete ɖe eyama ŋu wu.

Le ɣeyiɣi aɖewo megbe la, mɔnukpɔkpɔ bubuwo va su asinye. Mesubɔ abe dzikpɔla mɔzɔla ene henɔa hame vovovo siwo le nuto aɖe me la sram kpɔ kwasiɖa sia kwasiɖa henɔ ŋusẽ dom wo hena ƒe ewo kple edzivɔwo. Togbɔ be lãmesẽkuxiwo wɔe be meva ɖe asi le dzikpɔla mɔzɔla ƒe dɔa ŋu hã la, meyi edzi nɔ Mawu subɔm abe ɣeyiɣiawo katã ƒe gbeƒãɖela ene.

Dzigbãnya Aɖe Dzɔ

Emegbe esi menɔ Nicoya le ƒe 1971 me la, meɖi tsa be maɖasrã nye ƒometɔwo kpɔ. Esi mege ɖe miaƒe aƒea me la, danye si xɔ ƒe 80 lae nye ema tsi anyigba. Woda tui hetɔ hɛe. Esi mebɔbɔ lée la, mekpɔ be eganɔ gbɔgbɔm. Eteƒe medidi o, eku ɖe asinye me. Esi menye kɔ la, ame si ɖaa nu na ƒomea, si ƒo ɣleti enyi ƒe fu nɔ lae nye ema tsi anyigba le dzodoƒea. Eya hã ku. Kaka magakpɔ la, nɔvinyɔnu aɖe si le hame si le nutoa me me la hãe nye ema ku ɖe xɔdomemɔa dzi, eye nuɖalaa ƒe vi ŋutsuvi hãe nye ema ku ɖe tsileƒea. Woda tu wo katã hetɔ hɛ wo ŋutasesẽtɔe. Ame kae wɔ lodonu sia, eye le susu ka ta?

Esi medo go ɖe xexe la, mekpɔ Papa. Woda tu ta nɛ gake meku o. Meƒu du yi nɔvinyeŋutsu ƒe me, si medidi fũu tso afi ma o, esi meɖo afi ma la, mese be wowu nyɔnu aɖe kple via hã. Ewɔ nuku nam ŋutɔ be nye nyruiyɔvi si xɔ ƒe 17, si menye Yehowa Ðasefo o, eye susumedɔ le fu ɖem nɛ lae wu ameawo. Esi dzo le nutoa me. Woho aʋa ɖe edidi ŋu le mɔ aɖe si tɔgbi medzɔ kpɔ le Costa Rica o la nu.

Ŋutinya sia ɖi hoo le dukɔ bliboa me. Le ŋkeke adre megbe la, kpovitɔwo va ke ɖe amewulaa ŋu, eye wokpɔ hɛ gã aɖe kple tu sue aɖe si ame aɖe dzra nɛ togbɔ be amea nya nyuie be tagbɔdɔ nɔ fu ɖem nɛ hã la le esi. Woda tu nyruiyɔvinyea wòku esi wonɔ agbagba dzem be yewoalée.

Esime wonɔ amewulaa dim la, amewo ɖo aɖaŋu nam be masi adzo le nutoa me, le esi wonɔ vɔvɔ̃m be nyruiyɔvinyea ate ŋu atrɔ ava wɔ nuvevim ta. Medo gbe ɖa le nyaa ŋu, elabena mese le ɖokuinye me be ehiã be manɔ ƒomea me tɔ siwo kpɔtɔ le agbe kpakple Kristo hamea me tɔwo gbɔ. Eya ta metsi anyi.

Dzigbãnya Bubu Siwo Dzɔ Kplɔ Wo Nɔewo Ðo

Nublanuitɔe la, ƒe ɖeka koe Papa ganɔ agbe hafi ku. Le ƒe si kplɔe ɖo me la, wowu nɔvinyenyɔnu si nye Yehowa Mawu subɔla wɔnuteƒe la hã le nudzɔdzɔ bubu aɖe me. Esia hã gagbã dzi na nye ƒometɔwo ŋutɔ. Míate ŋu agblɔ ale si gbegbe ƒonyemeawo kple xɔlɔ̃wo se veve helé blanui le nudzɔdzɔ siawo ŋu la wòade edeƒe o. Le nudzɔdzɔ gbãdziname siawo katã me la, meɖo ŋu ɖe Yehowa ŋu bliboe heƒoa koko nɛ madzudzɔmadzudzɔe be wòado ŋusẽm.

Le ƒe 1985 me la, mekpɔ gome le ŋkeke etɔ̃ ƒe hehe aɖe si wona Kristotɔ hamemetsitsiwo le dukɔa ƒe fiadu, San José me la me. Esi míewu sukua nu la, mekpɔe be megaxɔ tutuɖo geɖe le gbɔgbɔ me ŋutɔ. Dzoɖagbe ŋdi kanya la, medze mɔ yina ʋu ɖo ge ayi aƒe me. Esi menɔ zɔzɔm ɖo ta ʋuɖoƒea la, adzogli aɖewo va dze dzinye; wolé ve nam hexɔ nuwo le asinye. Nu siawo katã dzɔ kpata ale gbegbe be nyemete ŋu kpɔ ameawo dze sii o. Nudzɔdzɔ sia wɔe be nyemegate ŋu ƒoa nu abe ale si Costa Rica tɔwo ƒoa nu le dzɔdzɔme nu la ene o. Le Guanacaste nutoa me afi sia la, ne ŋutsuwo do go wo nɔewo la, wokɔa gbe dzi doa ɣli tsɔ doa gbe na wo nɔewo alo tsɔ naa amewo nyana be yewova ɖo. Do ŋgɔ la, mete ŋu doa ɣli nyuie, gake le nudzɔdzɔ sia megbe la, nyemegate ŋu wɔnɛ o.

Le ƒe 1979 me la, meva ɖe Celia, si hã nye Ðasefo le hame aɖe si le nutoa me la me. Celia melɔ̃a nu le Biblia gbɔ kura o. Míexlẽa Biblia hesrɔ̃nɛ ɖekae gbe sia gbe. Nublanuitɔe la, kansadɔ va wui le July 2001 me. Ɣeaɖewoɣi la, meléa blanui vevie, gake tsitretsitsimɔkpɔkpɔa doa ŋusẽm.—Yohanes 5:28, 29.

Dzi Dzɔam Togbɔ Be Nɔnɔme Sesẽwo Ðe Kpe Nam Hã

Togbɔ be nɔnɔme sesẽwo ɖi kpem le agbe me wu ame geɖewo hã la, mebu wo be wonye mɔnukpɔkpɔ nam be matsɔ aɖe nye xɔse kple nuteƒewɔwɔ na Yehowa afia. (Yakobo 1:13) Be nukpɔsusu nyui nanɔ asinye ɖe nɔnɔme sesẽ siwo me tom menɔ ŋu la, meɖoa ŋku edzi na ɖokuinye be “azãgbe kple nuɖiɖeame” li na mí katã. (Nyagblɔla 9:11) Meɖoa ŋku edzi hã be esiawo nye “ɣeyiɣi sesẽ siwo me nɔnɔ sesẽ,” elabena amewo nye ame wɔadãwo, ŋutasẽlawo kple ame siwo meɖua wo ɖokuiwo dzi o. (2 Timoteo 3:1-5) Hiob ƒe kpɔɖeŋua hã nɔa susu me nam. Togbɔ be Hiob kpe fu geɖe—viawo katã ku, eƒe nunɔamesiwo katã dome gblẽ, eye dɔ vɔ̃ɖi aɖe dze eya ŋutɔ dzi—hã la, egblɔ nuteƒewɔwɔtɔe be: “Woakafu Yehowa ŋkɔ!” Eye Yehowa ɖo eteƒe na Hiob geɖe ŋutɔ le eƒe fɔmaɖimaɖi ta. (Hiob 1:13-22; 42:12-15) Ŋkuɖoɖo Biblia me nya siawo katã dzi kpe ɖe ŋunye mekpɔa dzidzɔ togbɔ be nɔnɔme sesẽwo ɖi kpem hã.

Yehowa kpe ɖe ŋunye ɣeawokatãɣi be meyi edzi tsɔa eƒe lɔlɔ̃nu wɔwɔ ɖoa nɔƒe gbãtɔ le nye agbe me. Biblia xexlẽ gbe sia gbe na akɔfafa geɖem eye wòdoa ŋusẽm mete ŋu doa dzi. Gbedodoɖa na Yehowa kpe ɖe ŋunye mete ŋu kpɔ “Mawu ƒe ŋutifafa, si ƒoa susu ɖe sia ɖe ta.” (Filipitɔwo 4:6, 7) Esia na mekpɔ susu me ƒe akɔdzeanyi. Kristotɔwo ƒe kpekpewo dede kple gomekpɔkpɔ le wo me hã doa ŋusẽ nye xɔse ŋutɔ.—Hebritɔwo 10:24, 25.

Togbɔ be metsi fifia ŋutɔ hã la, medaa akpe na Yehowa be ŋusẽ aɖe sinu gale asinye mete ŋu wɔa dɔ ɖekae kple hati Kristotɔwo, srɔ̃a Biblia kple amewo hekpɔa gome le gbeƒãɖeɖedɔa me. Kpekpe ɖe amewo ŋu alea doa ŋusẽm mete ŋu nɔa te ɖe nye dzimaɖitsitsiwo nu. Medaa akpe na Yehowa tso nye dzi ƒe gogloeaƒe ke ɣesiaɣi togbɔ be dzigbãnya geɖewo ɖe kpe nam le agbe me hã.a

[Etenuŋɔŋlɔ]

[Nya si ɖe dzesi si le axa 20]

Biblia xexlẽ gbe sia gbe na akɔfafa geɖem eye wòdoa ŋusẽm mete ŋu doa dzi

[Nɔnɔmetata si le axa 19]

Agbagba siwo medze le gɔmedzedzea me le Biblia me nuƒowo ƒoƒo me

[Nɔnɔmetata si le axa 20]

Gbeƒãɖeɖedɔa wɔwɔ le nye ɖekakpui me