Kpe Ðe Viwòwo Ŋu Woanɔ Te Ðe Woƒe Kuxi Gbogboawo Nu

MÍA viwo le go dom nyaƒoɖeamenu sesẽwo. Wole nuɖoanyi si me Satana ƒe xexe vɔ̃ɖia ƒe gbɔgbɔ xɔ aƒe ɖo la me, eye wòle na wo be woanɔ akɔ kpem kple “sɔhɛmenɔɣi ƒe nudzodzrowo.” (2 Tim. 2:22; 1 Yoh. 5:19) Azɔ hã, esi wònye be wodzea agbagba be ‘yewoaɖo ŋku yewo Wɔla Gã la dzi’ ta la, ele na wo be woanɔ te nɔm ɖe ame siwo tsia tsitre ɖe woƒe dzixɔse ŋu la ƒe fewuɖuɖu kple fuɖenamewo hã nu. (Nyagb. 12:1) Nɔviŋutsu aɖe si ŋkɔe nye Vincent gblɔ tso eƒe ɖevimenɔɣi ŋu be: “Ɣesiaɣi la, ame aɖe nɔa fu ɖem nam, nɔa ŋutasẽnu wɔm ɖe ŋunye, alo nɔa ge dim le ŋunye le esi menye Ðasefo ta. Ɣeaɖewoɣi la, etena ɖe dzinye ale gbegbe be nyemedina be mayi suku o.”a

Hekpe ɖe xexea me ƒe nyaƒoɖeamenuwo ŋu la, ɖewohĩ mía viwo anɔ avu wɔm kple didi si le wo me be yewoanɔ abe yewo hatiwo ene. Cathleen, si nye nɔvinyɔnu aɖe si xɔ ƒe 16 gblɔ be: “Menɔa bɔbɔe be nàto vovo o.” Alan, si nye nɔviŋutsu ɖekakpui aɖe hã gblɔ be: “Nye sukuhatiwo kpeam enuenu be mado go kple yewo le kwasiɖanuwuwuwo, eye edzroam vevie be mayi kpli wo.” Azɔ hã, didi si nɔa sɔhɛwo me be yewoakpɔ gome le suku kamedefefewɔna siwo ate ŋu akplɔ ame ade hadede vɔ̃wo me bɔbɔe me la, nu te ŋu sẽna ŋutɔ. Nɔvinyɔnu ɖetugbui aɖe si ŋkɔe nye Tanya, gblɔ be: “Kamedefefewo doa dzidzɔ nam ŋutɔ. Sukua ƒe kamedefefedzikpɔlawo ƒonɛ ɖe nunye ɣesiaɣi be manye sukua ƒe kamedefefewɔlawo dometɔ ɖeka, eye esesẽna nam be magbe.”

Alekee nàte ŋu akpe ɖe viwòwo ŋu woakpe akɔ kple woƒe kuxi gbogboawo? Yehowa bia tso dzilawo si be woana mɔfiame wo viwo. (Lod. 22:6; Ef. 6:4) Dzila mawuvɔ̃lawo ƒe taɖodzinue nye be, yewoaƒã toɖoɖo Yehowa ɖe wo viwo ƒe dzi me. (Lod. 6:20-23) Esia wɔwɔ ado ŋusẽ ɖeviawo be woanɔ te ɖe xexea me ƒe nyaƒoɖeamenuwo nu ne wo dzilawo mele wo gbɔ o gɔ̃ hã.

Menɔa bɔbɔe kura na dzilawo be woawɔ dɔ, akpɔ ɖeviwo dzi, ahakpɔ hamea ƒe dɔwo gbɔ le ɣeyiɣi ɖeka ma ke me o. Le ame aɖewo gome la, wonye dzilaɖekɛwo, alo nɔa akɔ kpem kple wo srɔ̃ ƒe tsitretsiɖeŋu hafi ganɔa agbanɔamedzi mawo gbɔ kpɔm. Ke hã, Yehowa di tso dzilawo si be woadi ɣeyiɣi atsɔ afia nu wo viwo ahana kpekpeɖeŋu wo. Eya ta nu kae nàte ŋu awɔ atsɔ akpe ɖe viwòwo ŋu woakpɔ wo ɖokuiwo ta tso hatiwo ƒe nyaƒoɖeamenu, tetekpɔwo, kple fuɖename siwo wodoa goe gbe sia gbe la me?

Ƒomedodomenɔnɔ Kple Yehowa

Gbã la, ehiã be mía viwo nabu Yehowa be enye Ame ŋutɔŋutɔ. Ele be woakpe ɖe wo ŋu be ‘woanɔ Ame si womekpɔna o la kpɔm.’ (Heb. 11:27) Vincent, si ŋu míeƒo nu tsoe va yi la, ɖo ŋku ale si edzilawo kpe ɖe eŋu woa kple Yehowa dome va le kplikplikpli la dzi. Egblɔ be: “Wofiam vevienyenye si le gbedodoɖa ŋu. Meɖo ŋku edzi be tso nye ɖevime ke la, medoa gbe ɖa na Yehowa zã sia zã hafi mlɔa anyi. Mebua Yehowa ame ŋutɔŋutɔe.” Èdoa gbe ɖa kple viwòwo ɖekaea? Ðe manyo be nàɖo to nya siwo wogblɔna na Yehowa le woƒe gbedodoɖawo me oa? Nya ɖeka mawo ke koe wonɔa gbɔgblɔm edziedzia? Alo ale si tututu wosena le wo ɖokuiwo me ɖe Yehowa ŋue wogblɔna le woƒe gbedodoɖawo mea? Ne èɖoa to woƒe gbedodoɖawo la, àte ŋu anya gbɔgbɔmeŋgɔyiyi si wɔm wole.

Mɔ vevi bubu si dzi ɖeviwo ato ate ɖe Yehowa ŋu kplikplikplie nye Mawu ƒe Nya la xexlẽ le wo ɖokui si. Cathleen, si ŋu míeƒo nu tsoe va yi la gblɔ be: “Biblia bliboa xexlẽ esime menɔ ɖevime la kpe ɖe ŋunye ŋutɔ. Ena dzi ɖo ƒonye be ne amewo tsi tsitre ɖe ŋunye gɔ̃ hã la, Yehowa li ado ŋusẽm.” Ðe Biblia xexlẽ ƒe ɖoɖo le viwòwo ŋutɔ sia?—Ps. 1:1-3; 77:13.

Enye nyateƒe be ale si ɖeviwo wɔa nu ɖe wo dzilawo ƒe amehehe ŋu la toa vovo. Azɔ hã, woƒe gbɔgbɔmeŋgɔyiyiwɔwɔ nɔa te ɖe ƒe si woxɔ la dzi. Ke hã, dzilawo ƒe mɔfiame manɔmee la, asesẽ ŋutɔ be ɖeviwo nabu Yehowa Ame ŋutɔŋutɔe. Ele be dzilawo naku Mawu ƒe nyawo ɖe to me na wo viwo bene woate ŋu anɔ Yehowa ƒe gbe sem, le kpɔɖeŋunyagbɔgblɔ nu, afi ka kee woɖale o. (5 Mose 6:6-9) Ele be viwòwo naka ɖe edzi be Yehowa tsɔa ɖe le eme na yewo.

Ale Si Miaɖo Dze Tuameɖowo

Dzeɖoɖo nye mɔ vevi bubu aɖe si dzi nàto akpe ɖe viwòwo ŋu. Dzeɖoɖo nyui lɔ nu geɖe ɖe eme wu nuƒoƒo na viwòwo ko. Elɔ nyawo biabia kple toɖoɖo woƒe nyaŋuɖoɖowo dzigbɔɖitɔe ɖe eme, ne nya ŋuɖoɖo mawo mewɔ ɖeka kple esiwo nèle mɔ kpɔm na o gɔ̃ hã. Anne, si si viŋutsuvi eve le la gblɔ be: “Mebiaa nya wo va se ɖe esime menyana nu siwo ŋu bum wole kple nu siwo me tom wole le agbe me.” Ðe viwòwo sena le wo ɖokui me be èɖoa to yewoa? Ðetugbui si ŋkɔe nye Tanya, si ŋu míeƒo nu tso va yi la gblɔ be: “Dzinyelawo ɖoa tom nyuie, eye woɖoa ŋku dze siwo míeɖo va yi la dzi. Wonya nye sukuhatiwo ƒe ŋkɔwo. Wobiaa wo ta hebiaa nya ku ɖe nu siwo ŋu míeɖo dze tsoe va yi la ŋu.” Toɖoɖo kple ŋkuɖoɖo nyawo dzi le vevie hafi dzeɖoɖo nanye esi atu ame ɖo.

Ƒome geɖewo kpɔe be nuɖuɣiwo nye ɣeyiɣi nyuiwo na dze tuameɖowo ɖoɖo. Vincent gblɔ be: “Nuɖuɖu ɖekae nɔ vevie na míaƒe ƒomea ŋutɔ. Wokpɔa mɔ be ƒome bliboa naɖu nu ɖekae ɣesiaɣi si wòanya wɔ. Womeɖe mɔ ɖe televisionkpɔkpɔ, toɖoɖo radio, alo agbalẽxexlẽ ŋu le nuɖuɣiwo o. Esi wònye be míeɖoa dze siawo le dziɖeɖi me ta la, enana nye susu dzea akɔ anyi gbe sia gbe, si kpe ɖe ŋunye be mete ŋu nɔa te ɖe kuxi kple nyaƒoɖeamenu siwo medoa goe le suku la nu.” Egblɔ kpee be: “Dzeɖoɖo kple dzinyelawo le nuɖuɣiwo ɣesiaɣi wɔe be mete ŋu ƒoa nu tso nu siwo ɖea fu nam la ŋu na wo tso dzi me faa be woakpe ɖe ŋunye.”

Bia ɖokuiwò be, ‘Zi nenie míeɖua nu ɖekae abe ƒome ene le kwasiɖa ɖe sia ɖe me?’ Ðe wòahiã be nàwɔ asitɔtrɔ aɖewo le go sia me, si ana mɔnukpɔkpɔ wò be nàte ŋu aɖo dze tuameɖowo kple viwòwo geɖe wua?

Nu Si Ta Wɔwɔfiawo Le Vevie

Kwasiɖa sia kwasiɖa ƒe Ƒometadedeagu fiẽsi la naa mɔnukpɔkpɔ ƒomea me tɔwo be woaɖo dze tuameɖo siwo akpe ɖe ɖeviawo ŋu be woate ŋu anɔ te ɖe woƒe kuxiwo nu. Alan, si ŋu míeƒo nu tsoe va yi la gblɔ be: “Dzinyelawo biaa nyawo mí le ƒomenusɔsrɔ̃a me tsɔ nana míegblɔa míaƒe dzimenyawo. Wonana míedzroa nyati siwo ku ɖe nu siwo tututu me tom míele la ŋu me.” Alan dada gblɔ be: “Míetsɔa ɣeyiɣia ƒe akpa ɖe wɔa wɔwɔfiawoe. Wɔwɔfia siawo kpena ɖe mía viwo ŋu wosrɔ̃a ale si woaʋli woƒe xɔse ta ahaɖo kpe edzi be nu si dzi woxɔ se la nye nyateƒe. Esia na dzi te ŋu nɔa wo ƒo wonɔa te ɖe kuxi siwo wodoa goe la nu.”

Le nyateƒe me la, zi geɖe ne hatiwo ƒe nyaƒoɖeamenu dze ŋgɔ ɖeviwo la, ehiã be woawɔ nu geɖe wu gbɔgblɔ ko be, yewomedina nu ma o, ko ahadzo. Ele be woasu te ate ŋu aɖo nyabiase si nye nu ka tae la ŋu. Ele be woakpɔ kakaɖedzi le nu si woawɔ ne woɖu fewu le wo ŋu le woƒe xɔse ta la ŋu. Ne womete ŋu ʋlia woƒe xɔse ta o la, asesẽ na wo be woanɔ tadedeagu vavãtɔ la ƒe akpa dzi sesĩe. Wɔwɔfiawo ate ŋu akpe ɖe wo ŋu be dzi nanɔ wo ƒo le esia wɔwɔ me.

Nu siwo ŋu woate ŋu awɔ wɔwɔfia le le Ƒometadedeagu fiẽsiwo la dometɔ aɖewo dze le aɖaka si le axa 18 me. Na wɔwɔfia siawo nadze nu ŋutɔŋutɔ to ale si nàtɔ gbe ŋuɖoɖo siwo viwòwo ana la dzi. Tsɔ kpe ɖe wɔwɔfia siawo ŋu la, midzro nu siwo miate ŋu asrɔ̃ tso kpɔɖeŋu nyui siwo amewo ɖo le Biblia me la hã me. Ðikeke mele eme o be, hehenana viwòwo le aƒe me alea akpe ɖe wo ŋu be woate ŋu anɔ te ɖe kuxi siwo wodoa goe le suku kple teƒe bubuwo la nu.

Ðe Tomefafa Kple Dziɖeɖi Le Aƒewò Mea?

Ðe wò aƒe me nye afi si viwòwo dina vevie be yewoatrɔ ava ne wokpã le suku gbe sia gbea? Ne enye afi si viwòwo kpɔa dzidzeme le la, ana be woate ŋu anɔ te nɔm ɖe kuxi siwo wodoa goe gbe sia gbe la nu. Nɔvinyɔnu aɖe si nye Betel ƒome aɖe me tɔ fifia la, gblɔ be: “Esi menɔ tsitsim la, nu siwo nɔ vevie nam wu dometɔ ɖekae nye ale si míaƒe aƒe me nye dedienɔƒe. Aleke kee nɔnɔmea ɖasesẽ le suku o, menyae be ne meɖo aƒe me la, nye dzi adze eme.” Alekee nɔnɔmea le le aƒewò me? Ðe wònye afi si “dɔmedzoedodowo, nyahehewo, [kple] mamawo” xɔ aƒe ɖo loo alo enye afi si “lɔlɔ̃, dzidzɔ, [kple] ŋutifafa” lea? (Gal. 5:19-23) Ne ŋutifafa menɔa aƒea me zi geɖe o la, ɖe nèdzea agbagba vevie be yeakpɔe ɖa be tɔtrɔ kawo wɔwɔe ahiã bene wò aƒe me nanye dziɖeɖiteƒe na viwòwoa?

Mɔ bubu si dzi nàto akpe ɖe viwòwo ŋu be woanɔ te ɖe kuxiwo nu lae nye be nàwɔ ɖoɖo ɖe ha tuameɖowo dede ŋu na wo. Le kpɔɖeŋu me, ɖe nàte ŋu akpe nɔvi siwo léa fɔ ɖe gbɔgbɔmenuwo ŋu tso hamea me be woawɔ ɖeka kple miaƒe ƒomea le modzakaɖewɔnawo mea? Alo ɖe nàte ŋu akpe dzikpɔla mɔzɔla alo ɣeyiɣiawo katã ƒe subɔla aɖe be wòava ɖu nu kple miaƒe ƒomea ɖekaea? Ðe nènya dutanyanyuigblɔla alo Betel ƒomea me tɔ aɖewo siwo viwò ate ŋu adze xɔlɔ̃e, eɖanye to lɛtaŋɔŋlɔ, e-mail, alo telefon dzia? Hadede mawo ate ŋu akpe ɖe viwòwo ŋu be woaɖe toƒe dzɔdzɔewo na woƒe afɔwo ahaɖo gbɔgbɔmetaɖodzinuwo na wo ɖokuiwo. Bu ŋusẽ nyui si apostolo Paulo kpɔ ɖe sɔhɛ Timoteo dzi la ŋu kpɔ. (2 Tim. 1:13; 3:10) Timoteo ƒe hadede kplikplikpli kple Paulo kpe ɖe eŋu wòtsɔ eƒe susu ɖo gbɔgbɔmetaɖodzinuwo ŋu.—1 Kor. 4:17.

Nɔ Viwòwo Kafum

Edzɔa dzi na Yehowa be wòakpɔ be sɔhɛwo lé nu dzɔdzɔe wɔwɔ me ɖe asi sesĩe, togbɔ be Satana ƒe xexea ƒoa nya ɖe wo nu gɔ̃ hã. (Ps. 147:11; Lod. 27:11) Ðikeke mele eme o be, edzɔa dzi na wò hã be nàkpɔe be viwòwo le nu wɔm le nunya me. (Lod. 10:1) Na viwòwo nanya ale si nèsena le ɖokuiwò me ɖe wo ŋu, eye nànɔ wo kafum lɔlɔ̃tɔe edziedzi. Yehowa ɖo esia ƒe kpɔɖeŋu nyui aɖe ɖi na dzilawo. Le Yesu ƒe nyɔnyrɔxɔɣi la, Yehowa gblɔ be: “Wòe nye Vinye, si gbɔ nyemelɔ̃a nu le o; mekpɔ ŋudzedze ɖe ŋuwò.” (Mar. 1:11) Aleke gbegbee kakaɖedzinamenya siawo si Fofoa gblɔ nɛ la anya do ŋusẽe be wòkpe akɔ kple nɔnɔme sesẽ siwo dze ŋgɔe lae nye esi! Eya ta wò hã na viwòwo naka ɖe edzi be èlɔ̃ yewo, eye nàɖe ŋudzedzekpɔkpɔ afia ɖe nu siwo wote ŋu wɔna la ŋu.

Enye nyateƒe be màte ŋu akpɔ viwòwo ta tso nyaƒoɖeamenuwo, fuɖenamewo, kple fewuɖuɖuwo me keŋkeŋ ya o. Ke hã, àte ŋu awɔ nu geɖe atsɔ akpe ɖe wo ŋu. Alekee? Kpe ɖe wo ŋu woana ƒomedodo kplikplikpli nanɔ wo kple Yehowa dome. Na dzeɖoɖo tuameɖowo ƒe mɔnukpɔkpɔwo nanɔ ʋuʋu ɖi. Na Ƒometadedeagu fiẽsi wɔnawo nasɔ ɖe nɔnɔme siwo viwòwo doa goe la nu, eye nàna wò aƒe me nanye dedienɔƒe. Ðikeke mele eme o be esia wɔwɔ akpe ɖe viwòwo ŋu be woate ŋu akpe akɔ kple kuxi gbogbo siwo wodoa goe la.

[Etenuŋɔŋlɔ]

[Aɖaka/Nɔnɔmetata si le axa 18]

WƆWƆFIAWO ATE ŊU AÐE VI

Nɔnɔme siwo me mía viwo tona la ƒe kpɔɖeŋu aɖewoe nye esiwo gbɔna. Ðe manyo be miawɔ nu siawo dometɔ aɖewo ƒe wɔwɔfia le miaƒe Ƒometadedeagu fiẽsiwo me oa?

▸ Kamedefefedzikpɔla bia tso viwònyɔnuvi si be wòanɔ sukua ƒe kamedefefewɔlawo dome.

▸ Wobia tso viwòŋutsuvi si be wòano sigaret esi wòkpã tso suku gbɔna aƒe me.

▸ Ŋutsuvi aɖewo gblɔ na viwòŋutsuvi be ne yewogakpɔe wòle gbeƒã ɖem la, yewoaƒoe.

▸ Viwònyɔnuvi do go eƒe sukuhati aɖe esime wònɔ tso aƒe me yi aƒe me subɔsubɔdɔa wɔm.

▸ Wona viwònyɔnuvi va tsi tsitre ɖe sukuviawo ŋgɔ le sukuxɔa me, eye wobia tso esi be wòagblɔ nu si tae medoa gbe na aflaga o.

▸ Ŋutsuvi aɖe nɔa fewu ɖum le viwò ŋu edziedzi le esi wònye Ðasefo ta.

[Nɔnɔmetata si le axa 17]

Ðe Biblia xexlẽ ƒe ɖoɖo le viwòwo ŋutɔ sia?

[Nɔnɔmetata si le axa 19]

Ðe nèkpea ame siwo léa fɔ ɖe gbɔgbɔmenuwo ŋu be woawɔ ɖeka kpli mi le modzakaɖewɔnawo mea?