Exlẽlawo Bia Be . . .

Ðe Anyigba La Ayi Edzi Alé Agbe Ðe Tea?

▪ Ŋutete wɔnuku aɖe le míaƒe Anyigba nyui sia ŋu be wòalé agbe ɖe te. Ke hã, ale si anyigbadzinɔlawo le dzidzim ɖe edzi kabakaba kple ale si wole anyigbadzinuwo dome gblẽm la ate ŋu ana nàbia be: ‘Ðe nu si vɔ̃m míele la ava dzɔa? Ðe anyigbaa ayi edzi ana nuɖuɖu kple nu bubu siwo léa agbe ɖe te la mía?’

Ne míele ŋugble dem tso biabia sia ŋu la, míate ŋu aka ɖe ŋugbe si Mawu do na ameƒomea ƒe 4,000 kple edzivɔwoe nye esia la dzi be: “Ŋkeke ale si anyigba li la, nuƒaƒã kple nuŋeŋe, vuvɔ kple fifia, dzomeŋɔli kple pepi, ŋkeke kple zã nu matsi o.” (1 Mose 8:22) Eya ta abe ale si ko míeka ɖe edzi be ɣe adze gbe sia gbee ene la, nenema kee míate ŋu aka ɖe edzi be anyigbaa madzudzɔ nu siwo hiã hena agbe léle ɖe te la nana gbeɖe o.

Anyigbadzinuwo ŋuti numekula Alex Kirby gblɔ le nyatakaka aɖe si wòŋlɔ le ƒe 2004 me, si wòna tanyae be “Ðe Anyigbaa Ayi Edzi Ana Nuɖuɖu Mía?” me be: “Anyigbaa naa nuɖuɖu si asu na ame sia ame hafi. Gake ame ʋɛ aɖewo koe zia edzi, alo ame aɖewo mete ŋu ƒlenɛ o, alo amewo menya ale si woakpɔ eta eteƒe nadidi o. Eya ta nuwo dzi makpɔmakpɔ nyuie gbɔe wòtso be ame geɖe mekpɔa nu ɖuna o, ke menye anyigbae menaa nuɖuɖu si asu amewo o.” Ne wolé be na anyigbaa hekpɔ edzinuwo ta nyuie la, vɔvɔ̃ aɖeke manɔ anyi be ate ŋu ava dzɔ be anyigba mana nu si asu mí la mí o. Le kpɔɖeŋu me, le blema Israel la, Mawu na mɔfiame nyuiwo ku ɖe ale si woawɔ anyigbaa ŋu dɔ nyuie la ŋu. Abe ale si wòdze le 3 Mose 25:4 ene la, Mawu gblɔ na Israel viwo be: “Le ƒe adrelia me la anyigba la nagbɔ ɖe me . . . màƒã nu ɖe wò agble me o.” Togbɔ be womade agble le ƒe adrelia ɖe sia ɖe me o hã la, Mawu do ŋugbe be yeakpɔ egbɔ be nu nyui geɖewo nasu dukɔa si, eye womatsi dzi be nuɖuɖu ave o.—3 Mose 26:3-5.

Togbɔ be amewo le agbagba geɖe dzem egbea be yewoawɔ nane tso ale si wole anyigbaa kple edzinuwo dome gblẽm ŋu hã la, ame geɖe sena le wo ɖokui me be agbagbadzedze mawo made edeƒe o, alo be wotsi megbe akpa. Nyaɖeɖefia 11:18 ƒo nu tso egbɔkpɔnu ɖeka kolia si li la ŋu. Biblia gblɔ le afi ma be Yehowa ahe “gbegblẽ ava ame siwo le anyigba la gblẽm la dzi.” Menye ɖeko Yehowa akpɔ ale si womete ŋu le be lém na anyigbaa kple edzinuwo o la ƒe kuxia gbɔ ko o, ke boŋ akpɔ egbɔ hã be anyigbaa nana nu si asu na edzinɔlawo katã. Mawu aɖe ame siwo medea bubu eƒe tameɖoɖo na anyigbaa ŋu o kple ɖokuitɔdila siwo le edzinuwo dome gblẽm le woawo ŋutɔ ƒe viɖe ko ta la katã ɖa. Le go bubu me la, ame siwo katã lɔ̃na faa be yewoade Yehowa ƒe dziɖulanyenye dzi la akpɔ nya siawo siwo dze le Psalmo 72:16 la ƒe emevava be: “Bli ado kpekpekpe le anyigba dzi kple towo tame.”

Le eƒe lɔlɔ̃ kple nunya deŋgɔ me la, Yehowa ɖo tame be amegbetɔwo nanɔ anyigba si azu paradiso la dzi ahalé be nɛ. (1 Mose 1:28) Le eƒe dziɖuɖua te la, ameƒomea me tɔ toɖolawo anya ale si woalé be na anyigbadzinu gbogboawo nyuie, eye womagblẽ wo dome gbeɖe o. Aleke gbegbe míada akpe na Nunala lɔ̃ame sia si aɖi ƒo na nu gbagbewo katã lae nye esi!—Psalmo 145:16.

[Nya si ɖe dzesi si le axa 22]

“Nuwo dzi makpɔmakpɔ nyuie gbɔe wòtso be ame geɖe mekpɔa nu ɖuna o, ke menye anyigbae menaa nuɖuɖu si asu amewo o”