Zɔ Le Gbɔgbɔ La Nu, Be Nàkpɔ Agbe Kple Ŋutifafa
“Ame siwo le zɔzɔm, menye le ŋutilã la nu o, ke boŋ le gbɔgbɔ la nu.”—ROM. 8:4.
1, 2. (a) Ne ame aɖe le ʋu kum eye eƒe susu mele ʋukukua ŋu o la, afɔku kae dona tso eme? (b) Ne ame aɖe mele ŋudzɔ le gbɔgbɔ me o la, afɔku kae dona tso eme?
“KUXI siwo dona tso eme ne ʋukulawo ƒe susu mele ʋu si kum wole ŋu o la le dzidzim ɖe edzi ƒe sia ƒe.” Nya mae United States ʋukunyawo gbɔ kpɔha ƒe agbalẽŋlɔla gblɔ le numekuku aɖe megbe. Nu siwo hea ʋukulawo ƒe susu ɖa tso ʋukukua ŋu la dometɔ ɖekae nye asitelefon. Le numekuku aɖe si wowɔ me la, ame siwo katã wobia gbee la dometɔ ɖeka le etɔ̃ me gblɔ be, edzɔ kpɔ be ʋukula aɖe lɔ yewo alo esusɔ vie wòalɔ yewo esime wòle nu ƒom le asitelefon dzi. Amewo ate ŋu asusu be ne yewole nu ƒom le asitelefon dzi esime yewole ʋu kum la, efia be yewole ɣeyiɣia ŋu dɔ wɔm nyuie, gake afɔku le esia wɔwɔ me.
2 Nu ma tɔgbi ate ŋu adzɔ ɖe mía dzi le gbɔgbɔ me gome. Abe ale si ko ʋukula si ƒe susu mele ʋu si kum wòle la ŋu o medea dzesi afɔku siwo le mɔa dzi o ene la, nenema kee ame si mele ŋudzɔ le gbɔgbɔ me o la ate ŋu age ɖe afɔku me bɔbɔe. Ne míeɖe mɔ míaƒe susu tra ɖa tso míaƒe Kristotɔwo ƒe agbenɔnɔ kple teokrasidɔwɔnawo ŋu la, emetsonua ate ŋu ana míaƒe xɔse dome nagblẽ abe tɔdziʋu si gbã ene. (1 Tim. 1:18, 19) Apostolo Paulo ƒo nu tso afɔku sia ŋu esime wòxlɔ̃ nu ehati Kristotɔ siwo nɔ Roma be: “Ŋutilã la ŋu bubu hea ku vanɛ, gake gbɔgbɔ la ŋu bubu hea agbe kple ŋutifafa vanɛ.” (Rom. 8:6) Paulo ƒe nya siawo gɔme ɖe? Aleke míate ŋu aƒo asa na “ŋutilã la ŋu bubu” eye míalé fɔ ɖe “gbɔgbɔ la ŋu bubu” ŋu?
“Fɔbubu Aɖeke Meli Na” Wo O
3, 4. (a) Avu si Paulo ŋutɔ wɔ ka ŋue wòƒo nu tso? (b) Nu ka tae wòle be míatsɔ ɖe le Paulo ƒe nya sia me?
3 Le lɛta si Paulo ŋlɔ na Romatɔwo me la, eƒo nu tso avuwɔwɔ aɖe si yi edzi le eƒe ŋutilã kple eƒe susu dome la ŋu. (Mixlẽ Romatɔwo 7:21-23.) Menye ɖe Paulo nɔ eɖokui nu ɖem alo ɖe eƒe nu le nublanui wɔm na eɖokui, abe ɖe eya mate ŋu awɔ nu nyui gbeɖe o ene o. Le nyateƒe me la, Kristotɔ amesiamina si tsi le gbɔgbɔ me, si wotia be wòanye ‘apostolo na dukɔwo’ lae wònye. (Rom. 1:1; 11:13) Ke nu ka tae Paulo ŋlɔ nu tso avu si eya ŋutɔ wɔ la ŋu ɖo?
4 Esi Paulo gblɔ nya ma la, ɖe wònɔ lɔlɔ̃m ɖe edzi anukwaretɔe be yemate ŋu awɔ Mawu ƒe lɔlɔ̃nu bliboe abe ale si yedi be yeawɔe ene la le ye ɖokui si o. Nu ka tae? Egblɔ be: “[Amewo] katã wɔ nu vɔ̃, eye womete ŋu ɖoa Mawu ƒe ŋutikɔkɔe la gbɔ o.” (Rom. 3:23) Esi Paulo nye Adam ƒe dzidzimevi ta la, mede blibo o, eye dzodzro vɔ̃wo ɖea fu na eya hã. Míate ŋu ase eƒe nɔnɔmea gɔme, elabena mí katã míede blibo o, eye ele be míawɔ avu mawo ke gbe sia gbe. Gawu la, susuhenu geɖewo li siwo ate ŋu ahe míaƒe susu eye woana míatra ɖa tso ‘mɔ xaxɛ si kplɔa ame yia agbe me’ la dzi. (Mat. 7:14) Ke hã mefia be mɔkpɔkpɔ aɖeke menɔ Paulo si o, eye nenema kee wòle le míawo hã gome.
5. Afi kae Paulo kpɔ kpekpeɖeŋu kple akɔfafa tsoe?
5 Paulo ŋlɔ bena: “Ame kae aɖem . . . ? Akpe na Mawu to Yesu Kristo, mía Aƒetɔ, la dzi!” (Rom. 7:24, 25) Eyome etrɔ susu ɖe “ame siwo le ƒomedodo me kple Kristo Yesu,” siwo nye Kristotɔ amesiaminawo la ŋu. (Mixlẽ Romatɔwo 8:1, 2.) Yehowa to eƒe gbɔgbɔ kɔkɔea dzi xɔ wo abe viawo ene hena mɔnukpɔkpɔ wo be woanye “Kristo ƒe hati domenyilawo.” (Rom. 8:14-17) Mawu ƒe gbɔgbɔ la kpakple Kristo ƒe tafevɔsa la dzi xɔxɔ se kpe ɖe wo ŋu woɖu dzi le avuwɔwɔ si ŋu Paulo ƒo nu tsoe la me, eye esia wɔe be “fɔbubu aɖeke meli na” wo o. Woɖe wo “tso nu vɔ̃ kple ku ƒe se la me.”
6. Nu ka tae wòle be Mawu subɔlawo katã natsɔ ɖe le nya siwo Paulo ŋlɔ la me?
6 Togbɔ be Kristotɔ amesiaminawoe Paulo gblɔ nya siawo na hã la, nya si wògblɔ tso Mawu ƒe gbɔgbɔa kple Kristo ƒe tafevɔsaa ŋu la ate ŋu aɖe vi na Yehowa subɔlawo katã, mɔkpɔkpɔ ka kee ɖale wo si o. Ele eme be Kristotɔ amesiaminawoe gbɔgbɔa ʋã Paulo wòɖo aɖaŋu ma na, ke hã ele vevie be Mawu subɔlawo katã nase nya si wògblɔ la gɔme, eye woadze agbagba awɔ edzi be wòaɖe vi na wo.
Ale Si Mawu “Bu Fɔ Nu Vɔ̃ Le Ŋutilã Me”
7, 8. (a) Gɔmesese ka nue Se la “[gbɔdzɔ] to ŋutilã me” le? (b) Nu kae Mawu wɔ to eƒe gbɔgbɔa kpakple tafevɔsa la dzi?
7 Le Romatɔwo ta 7 lia me la, Paulo lɔ̃ ɖe edzi be nu vɔ̃ kpɔ ŋusẽ ɖe ŋutilã madebliboa dzi. Le ta 8 lia me la, eƒo nu tso gbɔgbɔ kɔkɔea ƒe ŋusẽ ŋu. Apostoloa ɖe ale si Mawu ƒe gbɔgbɔa ate ŋu akpe ɖe Kristotɔwo ŋu le avu si wɔm wole kple nu vɔ̃ ƒe ŋusẽa me la me, ale be woate ŋu anɔ agbe le ɖekawɔwɔ me kple Yehowa ƒe lɔlɔ̃nu be wòakpɔ ŋudzedze ɖe wo ŋu. Paulo ɖee fia be Mawu to eƒe gbɔgbɔ kɔkɔea kple Via ƒe tafevɔsaa dzi wɔ nane si Mose ƒe Sea mete ŋu wɔ o.
8 Se la kpakple eme sedede gbogboawo bu fɔ nu vɔ̃ wɔlawo. Gawu la, nunɔlagã siwo subɔ le Israel le Sea te la mede blibo o eye womate ŋu asa vɔ siwo ate ŋu aɖe nu vɔ̃ ɖa o. Eya ta Se la “[gbɔdzɔ] to ŋutilã me.” Gake “Mawu to ale si wòdɔ ye ŋutɔ Via ɖa le nu vɔ̃ ŋutilã ƒe nɔnɔme me” kple Via tsɔtsɔ na abe tafe ene dzi “bu fɔ nu vɔ̃ le ŋutilã me,” eye wòto esia me ‘wɔ nu si Se la mete ŋu wɔ o’ la. Esia wɔe be wobu Kristotɔ amesiaminawo ame dzɔdzɔewoe le esi woxɔ Yesu ƒe tafevɔsaa dzi se ta. Wode dzi ƒo na wo be ‘woazɔ le gbɔgbɔ la nu ke menye le ŋutilã nu o.’ (Mixlẽ Romatɔwo 8:3, 4.) Ɛ̃, ele be woawɔ esia nuteƒewɔwɔtɔe va se ɖe woƒe anyigbadzigbenɔnɔ ƒe nuwuwu hafi axɔ “agbefiakuku” la.—Nyaɖ. 2:10.
9. Gɔmesese kae le nya “se” si dze le Romatɔwo 8:2 la ŋu?
9 Hekpe ɖe Mose ƒe “Se la” ŋu la, Paulo gaƒo nu tso ‘gbɔgbɔ la ƒe se’ kpakple “nu vɔ̃ kple ku ƒe se” hã ŋu. (Rom. 8:2) Nu kawoe se siawo nye? Nya “se” si wozã le afi sia mefia sededewo abe esiwo nɔ Mose ƒe Se la me ene o. Numekugbalẽ aɖe gblɔ be, Helagbe me nya si gɔme woɖe be “se” le kpukpui sia me la fia nu nyui alo nu vɔ̃ siwo amewo wɔna, siwo kpɔa ŋusẽ ɖe wo dzi abe se ene la. Egblɔ hã be: “Nya ma ate ŋu afia dzidzenu siwo nu wotiae be yewoanɔ agbe ɖo hã.”
10. Aleke nu vɔ̃ kple ku ƒe se kpɔ ŋusẽ ɖe mía dzi?
10 Apostolo Paulo ŋlɔ bena: “To ame ɖeka dzi nu vɔ̃ ge ɖe xexea me, eye to nu vɔ̃ me ku la va, eye ale ku la kaka ɖe amewo katã dome, esi wo katã wɔ nu vɔ̃ ŋuti la.” (Rom. 5:12) Esi míenye Adam ƒe dzidzimeviwo ta la, nu vɔ̃ kple ku kpɔ ŋusẽ ɖe mí katã dzi. Míaƒe nu vɔ̃ ŋutilã ƒonɛ ɖe mía nu atraɖii be míawɔ nu siwo medze Mawu ŋu o, eye ku me koe esia akplɔ mí ayii. Le lɛta si Paulo ŋlɔ na Galatiatɔwo me la, eyɔ nuwɔna kple nɔnɔme mawo be “ŋutilã ƒe dɔwɔwɔwo.” Eyome egblɔ kpee be: “Ame siwo wɔa nu siawo la, womanyi Mawu ƒe fiaɖuƒe la dome o.” (Gal. 5:19-21) Ame siawo ƒomevi sɔ kple ame siwo zɔna le ŋutilã la nu. (Rom. 8:4) Woƒe nuwɔna siwo kpɔa ŋusẽ ɖe wo dzi kpakple “dzidzenu siwo nu wonɔa agbe ɖo” la siaa tsoa ŋutilã madebliboa gbɔ. Gake ɖe esia fia be matrewɔlawo, ahasiwɔlawo, gbɔgbɔyɔlawo, alo ame siwo wɔa nu vɔ̃ gã ƒomevi bubuwo la ɖeɖe koe zɔna le ŋutilã nua? Ao, elabena ŋutilã ƒe dɔwɔwɔwo lɔ nu siwo ame aɖewo abu be wonye ame ŋutɔ ƒe gbɔdzɔgbɔdzɔwo ko, abe ŋuʋaʋã, dɔmedzoedodo, nyahehe, kple ŋubiabiã ene, ɖe eme. Ke ame kae ate ŋu agblɔ be ye ya yemezɔna le ŋutilã nu gbeɖegbeɖe o?
11, 12. Ðoɖo kae Yehowa wɔ be wòakpe ɖe mía ŋu míavo tso nu vɔ̃ kple ku ƒe se la me, eye nu kae míawɔ be Mawu nakpɔ ŋudzedze ɖe mía ŋu?
11 Dzidzɔ ka gbegbee nye esi wònye na mí be Yehowa wɔ ɖoɖo be míate ŋu avo tso nu vɔ̃ kple ku ƒe se ƒe ŋusẽkpɔɖeamedzi la me! Yesu gblɔ be: “Mawu lɔ̃ xexea ale gbegbe be wòtsɔ eƒe Tenuvi la na, bene ame sia ame si ɖenɛ fiana be yexɔ edzi se la nagatsrɔ̃ o, ke boŋ wòakpɔ agbe mavɔ.” Ne míekpɔ ŋudzedze ɖe lɔlɔ̃ si Mawu ɖe fia mí ŋu eye míexɔ Yesu Kristo ƒe tafevɔsaa dzi se la, míate ŋu avo tso fɔbubu si tso nu vɔ̃ si ƒe dome míenyi gbɔ la me. (Yoh. 3:16-18) Esia awɔe be míase le mía ɖokui me abe ale si Paulo se le eɖokui me ene, esi wògblɔ be: “Akpe na Mawu to Yesu Kristo, mía Aƒetɔ, la dzi!”
12 Ðeko míaƒe nɔnɔmea le abe ɖe míele dɔ sesẽ aɖe lém eye wodae na mí ene. Ne míedi be míahaya keŋkeŋ la, ele be míawɔ ɖe aɖaŋu siwo atikewɔlaa ɖo na mí la dzi. Togbɔ be tafevɔsa la dzi xɔxɔ se ate ŋu aɖe mí tso nu vɔ̃ kple ku si me hã la, míegakpɔtɔ nye ame madeblibowo. Gake ne míedi be míanɔ gbɔgbɔmelãmesẽ nyui me eye Mawu nakpɔ ŋudzedze ɖe mía ŋu ahayra mí la, ele be míawɔ nu si yi ŋgɔ wu ema. Eya ta be “Se la ƒe nudidi dzɔdzɔe la” nava eme na mí la, Paulo gblɔ be ele be míazɔ le gbɔgbɔ la nu.
Aleke Míate Ŋu Azɔ Le Gbɔgbɔ La Nu?
13. Nu kae zɔzɔ le gbɔgbɔ la nu fia?
13 Ne míele azɔli zɔm la, míeyia azɔlia dzi vivivi va se ɖe esime míeɖo teƒe si yim míele alo ɖo míaƒe taɖodzinua gbɔ. Eya ta zɔzɔ le gbɔgbɔ la nu bia be míayi edzi anɔ gbɔgbɔmeŋgɔyiyi wɔm ɖaa—mefia blibodede o. (1 Tim. 4:15) Gbe sia gbe la, ele be míawɔ míaƒe ŋutete ɖe sia ɖe adze agbagba azɔ, alo anɔ agbe, le ɖekawɔwɔ me kple gbɔgbɔ la ƒe mɔfiafia. ‘Zɔzɔ le gbɔgbɔ me’ nana Mawu kpɔa ŋudzedze ɖe mía ŋu.—Gal. 5:16.
14. Aleke ame siwo ‘zɔna le ŋutilã nu’ la wɔa nue?
14 Eyome la, Paulo ƒo nu tso ame ƒomevi eve siwo ƒe susu le nu siwo to vovo ŋu la ŋu le lɛta si wòŋlɔ na Romatɔwo la me. (Mixlẽ Romatɔwo 8:5.) Ŋutilã si woyɔ le kpukpui sia me la mefia amegbetɔŋutilã kokoko o. Le Biblia me la, wozãa nya “ŋutilã” ɣeaɖewoɣi wòfiaa amegbetɔwo ƒe nuvɔ̃menyenye alo blibomademade. Míaƒe blibomademadea gbɔe ŋutilã la kple susua ƒe avuwɔwɔ si ŋu Paulo ƒo nu tsoe do ŋgɔ la tsona. Gake ame siwo ‘zɔna le ŋutilã nu’ ya mewɔa avu aɖeke kura kple woƒe blibomademadea abe ale si Paulo wɔe ene o. Le esi woabu nu siwo Mawu bia tso wo si ŋu ahalɔ̃ be wòakpe ɖe yewo ŋu teƒe la, “[wotsɔa] woƒe susuwo ɖoa ŋutilã la ƒe nuwo ŋu.” Zi geɖe la, woƒe susu nɔa ale si woaɖi kɔ na woƒe ŋutilã ƒe nudzodzrowo la ŋu. To vovo na wo la, ame siwo ‘zɔna le gbɔgbɔ la nu’ la tsɔa woƒe susu ɖoa “gbɔgbɔ la ƒe nuwo” ŋu—woawoe nye nu siwo Yehowa na mí be míate ŋu anɔ ƒomedodo nyui me kpli ye kpakple gbɔgbɔmedɔwo.
15, 16. (a) Ne ame aɖe tsɔa eƒe susu ɖoa nane ŋu la, aleke esia kpɔa ŋusẽ ɖe edzii? (b) Nya kae míate ŋu agblɔ tso nu siwo ŋu ame akpa gãtɔ tsɔa woƒe susu ɖona egbea la ŋu?
15 Xlẽ Romatɔwo 8:6. Hafi ame nawɔ nu sia nu—eɖanye nyui alo vɔ̃ o—etsɔa eƒe susu ɖoa eŋu. Ne amewo tsɔa woƒe susu ɖoa ŋutilã ƒe nuwo ŋu ɣeawokatãɣi la, eteƒe medidina hafi wova dina be yewoawɔ ŋutilã ƒe nudzodzrowo dzi o. Woƒe susu, seselelãme, kple didi katã va kuna ɖe nu mawo ŋu.
16 Nu kawo ŋue ame akpa gãtɔ ƒe susu kuna ɖo egbea? Apostolo Yohanes ŋlɔ bena: “Nu sia nu si le xexea me—ŋutilã ƒe nudzodzro kple ŋkuwo ƒe nudzodzro kple ame ƒe nunɔamesiwo fiafia adegbeƒoƒotɔe be woakpɔ—la metso Fofo la gbɔ o, ke boŋ xexea me wotso.” (1 Yoh. 2:16) Nudzodzro mawo dometɔ aɖewoe nye matrewɔwɔ kple ahasiwɔwɔ, ŋkɔxɔxɔ, kple nunɔamesi geɖe didi. Nu mawo sɔŋ koe yɔ agbalẽwo, magazinewo, nyadzɔdzɔgbalẽwo, videowo, filmwo, television dzi wɔnawo, kple Internet dzi, elabena nu mawo ŋue ame akpa gãtɔ tsɔa woƒe susu ɖona, eye nu mawo koŋ ye wodina. Ke hã “ŋutilã la ŋu bubu hea ku vanɛ”—woaku le gbɔgbɔ me fifia, eye woava ku ŋutɔŋutɔ le etsɔme. Nu ka tae? “Elabena ŋutilã la ŋu bubu fia Mawu ƒe futɔ nyenye, elabena ŋutilã la mebɔbɔna ɖe Mawu ƒe se la te o, eye le nyateƒe me la, mate ŋui hã o. Eya ta ame siwo nɔa agbe ɖe ŋutilã nu la mate ŋu adze Mawu ŋu o.”—Rom. 8:7, 8.
17, 18. Aleke míawɔ ayi edzi anɔ ‘gbɔgbɔ la ŋu bum,’ eye nu kae ado tso eme ne míewɔe alea?
17 Le go bubu me la, “gbɔgbɔ la ŋu bubu hea agbe kple ŋutifafa vanɛ”—efia be, dzidzeme asu mía si eye míanɔ ŋutifafa me kple Mawu fifia, eye agbe mavɔ ava su mía si le etsɔme. Aleke míawɔ ayi edzi anɔ ‘gbɔgbɔ la ŋu bum’? Míawɔ esia ne míeyi edzi tsɔa míaƒe susu ɖoa gbɔgbɔ la ƒe nuwo ŋu eye míeɖea mɔ gbɔgbɔa fiaa mɔ míaƒe nuwɔna kple tamebubu. Esia wɔwɔ ana be ‘Mawu ƒe se la’ nafia mɔ míaƒe tamebubu eye míaƒe tamebubu ‘awɔ ɖeka kple’ Mawu ƒe tamesusuwo. Ne tetekpɔ aɖe va mía dzi la, míatsi evedomesi le nu si míawɔ gome o. Aʋã mí hã be míawɔ nyametsotso nyuitɔ, si le ɖekawɔwɔ me kple gbɔgbɔ la ƒe mɔfiafia.
18 Eya ta ele vevie be míatsɔ míaƒe susu aɖo gbɔgbɔ la ƒe nuwo ŋu. Míewɔa esia ne ‘míedzraa míaƒe susuwo ɖo hena dɔ geɖe wɔwɔ,’ eye míenaa gbɔgbɔmenuwo, siwo nye gbedodoɖa edziedzi, Biblia xexlẽ kple esɔsrɔ̃, kpekpewo dede, kple Kristotɔwo ƒe gbeƒãɖeɖedɔa, nyea nu vevitɔ na mí le agbe me. (1 Pet. 1:13) Mele be míaɖe mɔ ŋutilã la ƒe nuwo nahe míaƒe susu o, ke boŋ mina míatsɔ míaƒe susu aɖo gbɔgbɔ la ƒe nuwo ŋu. To esia wɔwɔ me la, míayi edzi anɔ zɔzɔm le gbɔgbɔ la nu. Eye esia ahe yayra geɖe avae na mí, elabena gbɔgbɔ la ŋu bubu nye agbe kple ŋutifafa.—Gal. 6:7, 8.
Àte Ŋu Aɖe Wo Mea?
• Nu kae Mose ƒe ‘Se la mete ŋu wɔ o,’ eye aleke Mawu ya wɔe?
• Nu kae nye “nu vɔ̃ kple ku ƒe se” la, eye aleke míate ŋu avo tso eme?
• Nu kae míawɔ be míayi edzi ‘anɔ gbɔgbɔ la ŋu bum’?
[Nɔnɔmetata siwo le axa 12, 13]
Ŋutilã nue nèzɔna ɖo loo, alo gbɔgbɔ la nue nèzɔna ɖoa?