Ale Si Nàwɔ Wò Nusɔsrɔ̃ Navivi Nuwò Ahaɖe Vi Na Wò Wu

Aleke míawɔ be Biblia sɔsrɔ̃ navivi mía nu geɖe wu? Nu kae míate ŋu awɔ be ɣeyiɣi siwo míetsɔ srɔ̃a nu la naɖe vi na mí geɖe wu? Mina míalé ŋku ɖe afɔ vevi etɔ̃ aɖewo siwo míaɖe be Biblia sɔsrɔ̃ le mía ɖokui si naɖe vi gbogbotɔ na mí ŋu.

1 DO GBE ÐA: Afɔ gbãtɔ si wòle be míaɖe ye nye be míado gbe ɖa. (Ps. 42:9) Nu ka tae? Ele be míabu Mawu ƒe Nya la sɔsrɔ̃ be enye míaƒe tadedeagu ƒe akpa aɖe. Eya ta ehiã be míabia Yehowa be wòadzra míaƒe tamesusu kple dzi ɖo ɖe nusɔsrɔ̃a ŋu eye wòana eƒe gbɔgbɔ kɔkɔea mí. (Luka 11:13) Barbara si nye dutanyanyuigblɔla ɣeyiɣi didi aɖee nye esia la gblɔ be: “Ɣesiaɣi la, medoa gbe ɖa hafi xlẽa Biblia alo srɔ̃nɛ. Ne medo gbe ɖa vɔ la, mesena le ɖokuinye me be Yehowa li kplim eye wòkpɔ ŋudzedze ɖe nye nusɔsrɔ̃a ŋu.” Gbedodoɖa hafi adze nusɔsrɔ̃ gɔme ʋua míaƒe susu kple dzi ale be míalɔ̃ faa axɔ gbɔgbɔmenu gbogbo si srɔ̃ ge míala la.

2 DE ŊUGBLE: Esi ɣeyiɣi megava le ame sum o ta la, ɖeko ame aɖewo xlẽa Mawu ƒe Nya la ko. Ke hã viɖe siwo sua ame si ne esrɔ̃ Biblia la toa wo ŋu. Carlos si le Yehowa subɔm ƒe 50 kple edzivɔe nye esia la va kpɔ ale si gbegbe wòle vevie be wòadi ɣeyiɣi hena ŋugbledede ale be nu siwo wòsrɔ̃na la naɖe vi geɖe wu nɛ la dze sii. Egblɔ be: “Fifia la, mexlẽa Biblia ƒe axa ʋɛ aɖewo ko gbe sia gbe—mexlẽna abe axa eve pɛ ko ene. Esia wɔnɛ be metea ŋu kpɔa ɣeyiɣi dea ŋugble tso nu si mexlẽ la ŋu ale be masrɔ̃ nu veviwo tso eme.” (Ps. 77:13) Ne míedi ɣeyiɣi de ŋugble la, míegava nyaa Mawu ƒe lɔlɔ̃nu geɖe wu eye míesea egɔme nyuie wu.—Kol. 1:9-11.

3 ZÃ WO: Ne míewɔ nane si míesrɔ̃ ŋu dɔ la, eɖea vi na mí geɖe wu. Alea tututu wòle le Biblia sɔsrɔ̃ hã gome. Gabriel si nye nɔviŋutsu sɔhɛ aɖe si Biblia sɔsrɔ̃ edziedzi nye numame na la gblɔ be: “Nusɔsrɔ̃ kpena ɖe ŋunye meɖua kuxi siwo medoa goe gbe sia gbe la dzi, eye wòdzraam ɖo hã be makpe ɖe ame bubuwo ŋu.” Egblɔ kpee be: “Medzea agbagba wɔa nu sia nu si mesrɔ̃ la ŋu dɔ le nye agbenɔnɔ me.” (5 Mose 11:18; Yos. 1:8) Ɛ̃, mawumenunya gbogbo aɖe li si ŋu míate ŋu ake ɖo ahanɔ agbe ɖe wo nu.—Lod. 2:1-5.

WƆ NUMETOTO: Mɔnukpɔkpɔ ka gbegbee nye esi wònye be míadzro nunya si tsoa Yehowa, si nye nunyawo katã Dzɔtsoƒe, gbɔ la me tsitotsito! (Rom. 11:33) Eya ta ne ègale nu srɔ̃ ge ake la, kpɔ egbɔ be èdo gbe ɖa na Yehowa gbã eye nàbiae be wòadzra yeƒe tamesusu ɖo, eye wòana eƒe gbɔgbɔ kɔkɔe la ye. Emegbe la, sẽ kple sẽ la, tɔ nàde ŋugble le nu si nèxlẽ ŋu. Tsɔ kpe ɖe eŋu la, ɖo ŋku nu siwo nèsrɔ̃ la dzi eye nàzã wo le wò gbe sia gbe gbenɔnɔ me. Ne èɖe afɔ vevi siawo la, àkpɔe be wò Biblia sɔsrɔ̃ ava nɔ nuwò vivim geɖe wu eye wòaɖe vi gbogbotɔ na wò.