Nu Ka Tae Amewo Ðua Kristmas?
“Ele bɔbɔe be ame nava nɔ hloloe tsom le nu siwo azãa ɖuɖu bia ta. Nu siwo me amewo ƒoa wo ɖokui ɖo le azãa ɖuɖu me la va zu kɔnu dzro aɖe ko, hloloetsotsowo wɔnɛ be amewo metea ŋu kpɔa vovo ɖe woƒe ƒometɔwo kple xɔlɔ̃wo ŋu o. Eye ɣeaɖewoɣi la, nutikɔname va xɔna ɖe dzidzɔ si wòle be míakpɔ la teƒe.”—OKLAHOMA [U.S.A.] ƑE NUTOMEDZIÐULA TSÃTƆ BRAD HENRY, DECEMBER 23, 2008.
NE Kristmas ɖuɣi le aƒe tum la, hadzidziwo, videowo kple television dzi wɔnawo nana amewo tsɔa dzidzɔ nɔa mɔ kpɔm na azã sia ɖuɖu. Nu kae nèsusu be eyae wòle be wòanye taɖodzinu vevitɔ na azã sia ɖuɖu? Ðe wòle be wòanye
Ŋkuɖoɖo Yesu Kristo dzia?
Dzidzɔ Si Tsoa Nunana Mea?
Kpekpeɖeŋunana ame siwo hiã tua?
Nuwɔwɔ ɖekae kple ƒometɔwoa?
Ŋutifafawɔwɔa?
Nutomedziɖula Henry ƒe nya siwo dze le miame la ɖee fia be esesẽna na ame geɖe siwo ɖua Kristmas la be woaɖo taɖodzinu siawo gbɔ le azãa ɖuɣi. Nu si koŋ va ɖe dzesi le Kristmas ɖuɣia ŋue nye asitsatsa, hloloetsotsowo kple dagbadagbawo. Ðe taɖodzinu si koŋ tae amewo ɖua Kristmas ɖo la zu dze bu ɖe ama mea?
Biblia de dzi ƒo na mí katã be míaɖo ŋku Yesu Kristo dzi, míalɔ̃ faa ana nu ame, míakpe ɖe amewo ŋu, eye míakpɔ vovo ɖe míaƒe ƒometɔwo ŋu. Efia mí hã be míanye ŋutifafamewo. Eya ta le esi míaƒo nu tso nu si tae ame aɖewo meɖua Kristmasa o ŋu teƒe la, míadzro biabia siawo ƒe ŋuɖoɖowo me le nyati siwo kplɔ esia ɖo me:
Nu kae ame aɖewo gblɔna be eyae nye taɖodzinu si tae wòle be woaɖu Kristmas?
Nu ka tae wòsesẽna be woaɖo taɖodzinu siawo gbɔ le Kristmas ɖuɣia?
Biblia me gɔmeɖose kawoe na ame miliɔn geɖe ke ɖe nane si nyo wu Kristmas ŋu?
a Ne èdi be yeaxlẽ nu tso nu si Ŋɔŋlɔawo gblɔ si tae ame aɖewo meɖua Kristmas o ŋu la, kpɔ nyati si nye “Exlẽlawo Bia Be—Nu Ka Tae Ame Aɖewo Meɖua Kristmas O?”