BIBLIA ME BIABIAWO ƑE ŊUÐOÐOWO
Nu kae nye Ʋɔnudrɔ̃gbe la?
Nu ka tae ʋɔnudrɔ̃gbea anye dzidzɔɣi ɖo?
Le Biblia-ŋlɔɣiwo la, Mawu zã ʋɔnudrɔ̃lawo tsɔ ɖe eƒe amewo tso ame siwo nɔ nu madzɔmadzɔ wɔm ɖe wo ŋu la si me. (Ʋɔnudrɔ̃lawo 2:18) Biblia gblɔ be dzidzɔɣie Ʋɔnudrɔ̃gbe si gbɔna la anye. Ɣemaɣi la, Yehowa, anyigba bliboa ƒe Ʋɔnudrɔ̃laa, aɖe ameƒomea tso nu madzɔmadzɔ siwo me tom wole la me.—Xlẽ Psalmo 96:12, 13; Yesaya 26:9.
Mawu ɖo Yesu agbagbeawo kple kukuawo siaa ƒe ʋɔnudrɔ̃lae. (Dɔwɔwɔwo 10:42; 17:31) Ame gbogbo aɖewo ku evɔ womenya naneke tso Mawu ŋu o. Le Ʋɔnudrɔ̃gbea la, Yesu afɔ ame mawo ɖe tsitre ale be woate ŋu anya Mawu vavã la ahalɔ̃e.—Xlẽ Dɔwɔwɔwo 24:15.
Nu ka tae Ʋɔnudrɔ̃gbea axɔ ƒe akpe ɖeka?
Woafɔ ame kukuwo ɖe tsitre le ƒe akpe ɖeka la me. (Nyaɖeɖefia 20:4, 12) Woahiã ɣeyiɣi be woatsɔ asrɔ̃ nu tso Mawu ƒe mɔwo ŋu ahaɖo to eyama. Biblia gblɔ be nu siwo amewo awɔ le woƒe tsitretsitsia megbe la nue woadrɔ̃ ʋɔnu wo ɖo, ke menye ɖe nu si wowɔ hafi ku la nu, abe ale si ame geɖe susuna ene o.—Xlẽ Romatɔwo 6:7.
Biblia gaƒo nu tso ʋɔnudrɔ̃ŋkeke aɖe si ava le vo me hafi ƒe akpe ɖekaa nadze egɔme la hã ŋu. Wogayɔa ŋkeke ma be nuwuwu la, abe ale si wodzro emee le magazine sia ƒe nyati gbãtɔwo me ene. Le ŋkeke ma dzi la, Mawu atsrɔ̃ ame vɔ̃ɖi, siwo mevɔ̃a Mawu o la ɖa. (2 Petro 3:7) Esia tae wòle vevie be míaɖee afia be míelɔ̃ Mawu.—Xlẽ 2 Petro 3:9, 13.