Dɔ Wɔwɔ Aduadu Kple Míaƒe Hame ƒe Agbalẽ me Nusɔsrɔ̃dzikpɔla La
1 Hame ƒe Agbalẽ me Nusɔsrɔ̃a wɔa akpa vevi aɖe le nyanyuia ƒe subɔlawo nyenye ƒe ŋutete siwo le mía si la tutu ɖo me. Woɖonɛ koŋ naa ƒuƒoƒoawo nɔa sue ale be vividoɖeameŋu ƒe nɔnɔme si le abe ƒome tɔ ene nanɔ anyi hena Biblia la kple Habɔbɔa ƒe agbalẽwo dometɔ ɖeka sɔsrɔ̃. Ƒuƒoƒo sue siawo nyea nɔnɔme nyuitɔwo hã siwo me míaxɔ hehe le be míabi ɖe edzi le gbeadzisubɔsubɔdɔa me. Amesiame te ŋu kpɔa tutuɖo kple kpekpeɖeŋu bɔbɔe le agbalẽ me nusɔsrɔ̃ ƒe ɖoɖoa me. Aleke míate ŋu awɔ dɔ aduadu kple nusɔsrɔ̃dzikpɔla la bliboe eye ɖoɖo nyui sia naɖe vi na mí?
2 Gbeadzisubɔsubɔdɔa Wɔwɔ Dzonɔamemetɔe: Agbalẽ me nusɔsrɔ̃dzikpɔla la ƒe agbanɔamedzi vevitɔwo dometɔ ɖekae nye be wòakpe ɖe ƒuƒoƒoa me tɔ ɖesiaɖe ŋu wòakpɔ gome le subɔsubɔdɔa me dzonɔamemetɔe. Le esia gome la, Míaƒe Subɔsubɔdɔa ƒe agbalẽa ɖoa ŋku edzi na mí le axa 44 be “dzonɔameme kple veviedodo si wòaɖe afia ɖe gbeadziyiyi edziedzi ŋu la adze le gbeƒãɖelawo ŋu.” Ɣeaɖewoɣi la, nusɔsrɔ̃dzikpɔla la awɔ dɔ kple ye ŋutɔ ƒe ƒomea me tɔwo le gbeadzi, gake adzɔ dzi nɛ hã be yeazɔ kple ame bubuwo le subɔsubɔdɔa ƒe akpa vovovowo wɔwɔ me ɖe alesi nɔnɔmeawo aɖe mɔ nɛ nu. Àte ŋu anɔ gbeadziyiyi ƒe kpekpewo yim edziedzia? Miaƒe agbalẽ me nusɔsrɔ̃dzikpɔla kple gbeƒãɖela bubuwo akpɔ ŋudzedze ɖe nu ma si nawɔ ŋu ŋutɔ.
3 Wowɔa ɖoɖo be woawɔ gbeadziyiyi ƒe kpekpewo le teƒe siwo sɔ ale be amesiame nate ŋu akpɔ gome le gbeƒãɖeɖedɔa me dzonɔamemetɔe. Togbɔ be ƒuƒoƒo ɖesiaɖe abu nutoa ƒe nɔnɔmewo ŋu hã la, anyo be woadze subɔsubɔdɔa gɔme kaba. Nu dzea dzi na gbeƒãɖela kple mɔɖela geɖe ne woyi subɔsubɔdɔa wɔwɔ dzi ʋuu ŋdɔ ga wuieve ƒo to ŋu le kwasiɖaa ƒe nuwuwu.
4 Àdi be woakpe ɖe ye ŋu le subɔsubɔdɔa ƒe akpa aɖe wɔwɔ mea? Ðewohĩ miaƒe agbalẽ me nusɔsrɔ̃dzikpɔla ate ŋu awɔ ɖoɖo be gbeƒãɖela bibi aɖe si le ƒuƒoƒoa me nawɔ dɔ kpli wò. Le ɣletia ƒe nuwuwu la, tsɔ wò gbeadziyiyi ƒe akɔntabubua na kaba. Agbalẽ me nusɔsrɔ̃dzikpɔla la kple agbalẽŋlɔla la siaa woakpɔ ŋudzedze ɖe kpekpeɖeŋu si nana wo le akpa vevi sia hã me la ŋu.—Tsɔe sɔ kple Luka 16:10.
5 Ne Subɔsubɔdɔdzikpɔla Va Srã Ƒuƒoƒoa Kpɔ: Zi geɖe la subɔsubɔdɔdzikpɔla la srãa agbalẽ me nusɔsrɔ̃ ƒe ƒuƒoƒo ɖeka ɣleti ɖesiaɖe be yeade dzi ƒo na wo woakpɔ gome le gbeadzisubɔsubɔdɔa me geɖe wu eye wòatse ku wu. Lé to ɖe aɖabaƒoƒo 15 ƒe nuƒo si wòƒona le agbalẽ me nusɔsrɔ̃a ƒe nuwuwu la ŋu nyuie elabena aɖo aɖaŋu tẽ si akpe ɖe ƒuƒoƒoa ŋu be woayi ŋgɔ le gbeƒãɖeɖedɔa ƒe akpa vovovowo me. Subɔsubɔdɔdzikpɔla la dina vevie hã be yeawɔ dɔ kple agbalẽ me nusɔsrɔ̃ ƒe ƒuƒoƒoa me tɔ vovovowo le kwasiɖaa ƒe nuwuwu. Kpɔ egbɔ be yewɔ ɖoɖo tɔxɛ sia ŋudɔ ale be nàte ŋu akpɔ viɖe tso eƒe nuteƒekpɔkpɔ kple ŋutete le gbeadziyiyi me la me.
6 Mía ŋutɔwo míaƒe nu wɔwɔ aduadu kple míaƒe lɔlɔ̃ faa be míakpe ɖe amesiwo ƒe nuteƒekpɔkpɔ mede mía tɔ nu o ŋu la ana vividoɖeameŋu kple xɔlɔ̃wɔwɔ nanɔ Hame ƒe Agbalẽ me Nusɔsrɔ̃a me esime míele “nu nyui [wɔm] na amesiame, ke vevietɔ na haxɔsetɔwo.”—Gal. 6:10.