Egbɔgblɔ Bɔbɔe Ye Wɔa Dɔ Wu
1 Nukatae gbeƒãɖela siwo nye ɖeviwo hea amesiwo wogblɔa Fiaɖuƒegbedasia na ƒe susu zi geɖe? Susuawo dometɔ ɖekae nye be woƒe nyawo le bɔbɔe. Gbeƒãɖela aɖewo ase le wo ɖokui me be ɖaseɖiɖi dzidzedzetɔe bia be yewoƒe nume nabi. Gake nuteƒekpɔkpɔ ɖee fia be nyawo gbɔgblɔ le mɔ bɔbɔe si me kɔ nue nye nyuitɔ kekeake.
2 Yesu ɖe gbeƒã Mawu ƒe Fiaɖuƒea le mɔ bɔbɔe si le tẽ nu, eye wòhe eƒe nusrɔ̃lawo be woawo hã nawɔe nenema ke. (Mat. 4:17; 10:5-7; Luka 10:1, 9) Ezã ŋgɔdonya, biabia, kple kpɔɖeŋu siwo le bɔbɔe tsɔ he eƒe nyaselawo ƒe susu heɖo woƒe dzi gbɔ. (Yoh. 4:7-14) Anyo be míasrɔ̃ eƒe kpɔɖeŋua eye míagblɔ nya siwo gɔme nya sena bɔbɔe.
3 “Fiaɖuƒeŋutinya nyui” lae nye gbedasi si wòle be míaɖe gbeƒãe. (Mat. 24:14) Fiaɖuƒea zazã wòanye wò tanya vevitɔ akpe ɖe ŋuwò be wò nyawo nanɔ bɔbɔe. Ƒo nu tso nusiwo ka wò nyaselawo ŋu. Nyɔnuwo tsɔa ɖe le woƒe ƒomea ƒe nyawo me zi geɖe wu nyati siwo ku ɖe dunyahehe ŋu. Nusiwo ka vifofo wue nye eƒe dɔwɔɖui kple eƒe ƒomea ƒe dedienɔnɔ. Sɔhɛwo tsɔa ɖe le woƒe etsɔme me; eye ame tsitsiwo tsɔa ɖe le woƒe lãmesẽ kple dedienɔnɔ me. Amewo tsɔa ɖe le wo gbɔ nyadzɔdzɔwo me tsɔ wu nusiwo le dzɔdzɔm le dukɔ siwo le adzɔge me. Le dzeɖoɖo tso nya siwo ka amea ŋu vɔ megbe la, he eƒe susu yi yayra siwo ameƒomea me tɔ toɖolawo akpɔ le Mawu ƒe Fiaɖuƒedziɖuɖua te dzi. Nya bɔbɔe ʋɛ siwo nàtia nyuie hekpe ɖe ŋɔŋlɔ aɖe ŋu anye mɔ nyuitɔ kekeake si dzi nàto anyɔ wò nyaselawo ƒe ɖetsɔleme.
4 Àte ŋu adze dzeɖoɖo gɔme be:
◼ “Ðikekemanɔmee la, àlɔ̃ ɖe edzi kplim be dɔvɔ̃ geɖewo xɔ aƒe ɖe ameƒomea me. Gake ènya be Mawu do ŋugbe be yeaɖe dɔléle ƒomevi ɖesiaɖe kple ku hã ɖa kpuiea?” Na wòaɖo eŋu, eye emegbe nàxlẽ Nyaɖeɖefia 21:3, 4.
5 Neva eme be to nya siwo me kɔ hele bɔbɔe zazã me la, nàɖo wò anyigbamama me tɔ bubu geɖe ƒe susu kple dzi gbɔ ahakpe ɖe wo ŋu woasrɔ̃ nu tso Yehowa kple agbe mavɔ si woava nɔ ƒe mɔkpɔkpɔa ŋu.—Yoh. 17:3.