Nyabiaɖaka

◼ Mɔ kae nye nyuitɔ kekeake si dzi míato adzɔ ga be woatsɔ akpe ɖe nɔvi siwo hiã tu le dukɔ bubuwo me ŋu?

Ɣeaɖewoɣi la míesea nyatakakawo tsoa dukɔ bubuwo me be nɔviwo hiã ŋutilãmekpekpeɖeŋu le yometiti, afɔkuwo, alo nɔnɔme sesẽ bubuwo ta. Nyatakaka siawo ʋãa nɔvi aɖewo woɖoa ga ɖe dukɔ mawo ƒe alɔdzedɔwɔƒea tẽ hebiana be woatsɔe akpe ɖe nɔvi aɖe koŋ, hame aɖe koŋ, alo xɔtutudɔ aɖe koŋ wɔwɔ ŋu.—Kor. II, 8:1-4.

Togbɔ be ɖetsɔtsɔ le haxɔsetɔwo me alea dze kafukafu hã, zi geɖe la, hiahiã bubuwo te ŋu nɔa anyi siwo gbɔ kpɔkpɔ hiã vevie wu esiwo le susu me na nunalaa. Le go aɖewo me la, wokpɔa hiahiã si le susu me na nunalaa gbɔ xoxo hafi kpekpeɖeŋununana la ɖoa alɔdzedɔwɔƒea. Ke hã, míate ŋu aka edzi be ne míeɖo nudzɔdzɔwo ɖe alɔdzedɔwɔƒe si le mía gbɔ hena xexeame katã ƒe dɔa, Fiaɖuƒe Akpata Tuga, alo kpekpeɖeŋunana amesiwo dzi afɔku dzɔ ɖo la, woazã wo abe alesi nudzɔla la dii ene.

Wona hehe nɔvi siwo le alɔdzedɔwɔƒewo katã nyuie be woakpɔ nuhiahiã siwo ava tu nɔviwo le dukɔ aɖe me kpata la gbɔ na wo enumake. Ɣesiaɣi la, alɔdzedɔwɔƒea ɖoa nusi dzɔ ŋuti nyatakaka ɖe Dziɖuha la. Ne kpekpeɖeŋu bubu gahiã la, Dziɖuha la ate ŋu abia tso alɔdzedɔwɔƒe siwo tsɔ ɖe afima si be woana kpekpeɖeŋu alo woaɖo nudzɔdzɔwo ɖa tẽ tso xexeame katã ƒe dɔwɔƒe gã.—Kor. II, 8:14, 15.

Eyata ne èdi be yeaɖo nudzɔdzɔ ɖa hena xexeame katã ƒe dɔa, na xɔtudɔwo le dukɔ bubuwo me, alo hena kpekpeɖeŋu nana amesiwo dzi afɔku dzɔ ɖo la, ele be nàɖoe ɖe alɔdzedɔwɔƒe si le dukɔ si me nèle, to wò hamea dzi loo alo wò ŋutɔ nàtsɔe ayii. Ne míewɔe alea la, “dɔla nuteƒewɔla kple aɖaŋudzela” la ato ɖoɖo si Dziɖuha la wɔ dzi akpɔ xexeame katã ƒe nɔviwo ƒe habɔbɔa me tɔwo ƒe nuhiahiãwo gbɔ le ɖoɖo nu nyuie.—Mat. 24:45-47; Kor. I, 14:33, 40.