‘Mègavɔ̃ O’
1. Kuxi siwo ɖi Yeremiya tɔ kawoe ate ŋu aɖe fu na mí?
1 Esi wode dɔ asi na Yeremiya be wòazu nyagblɔɖila la, ese le eɖokui me be yemedze o. Gake Yehowa ka ɖe edzi nɛ be, ‘mègavɔ̃ o,’ eye wòdo ŋusẽe dɔmenyotɔe wòte ŋu wɔ eƒe dɔdeasia de goe. (Yer. 1:6-10) Le míaƒe ŋkekea me la, ŋukpe kple kakaɖedzimanɔamesi ate ŋu akpɔ ŋusẽ ɖe ale si míewɔa subɔsubɔdɔae dzi. Vɔvɔ̃ na ale si amewo awɔ nu ɖe gbedeasia ŋu alo ale si woabu míi ate ŋu ana míahe ɖe megbe ɣeaɖewoɣi. Alekee míawɔ aɖu vɔvɔ̃ mawo dzi? Eye yayra kawoe ado tso eme na mí?
2. Aleke dzadzraɖo ate ŋu akpe mía ŋu míaɖu vɔvɔ̃ siwo le mía me ku ɖe gbeadzisubɔsubɔdɔa ŋu dzi?
2 Dzra Ðo Do Ŋgɔ: Dzadzraɖo nyuie ate ŋu akpe mía ŋu míaɖu míaƒe vɔvɔ̃awo dzi. Le kpɔɖeŋu me, ne míeto dzeɖonyanutsinya siwo míate ŋu ado goe la me do ŋgɔ la, míanɔ dzadzraɖoɖi be míaɖo dzeɖonyanutsinya siwo bɔ ɖe míaƒe anyigbamamaa me la ŋu. (Lod. 15:28) Ðe manyo be miawɔ ale si mianɔ te ɖe kuxi vovovowo nu le suku kple gbeadzisubɔsubɔdɔa me la ƒe wɔwɔfiawo le miaƒe Ƒometadedeagu me atsɔ adzra ɖo ɖe wo ŋu oa?—1 Pet. 3:15.
3. Alekee ŋuɖoɖo ɖe Yehowa ŋu kpena ɖe mía ŋu míeɖua vɔvɔ̃ dzi?
3 Ðo Ŋu Ðe Yehowa Ŋu: Nu si akpe ɖe mía ŋu míaɖu vɔvɔ̃ dzie nye ŋuɖoɖo ɖe mía Mawu la ŋu. Yehowa na kakaɖedzi mí be yeakpe ɖe mía ŋu. (Yes. 41:10-13) Esiae nye takpɔkpɔ gãtɔ kekeake si míate ŋu akpɔ. Tsɔ kpe ɖe eŋu la, Yesu ka ɖe edzi na mí be, ne nɔnɔme siwo míele mɔ kpɔm na o do mo ɖa gɔ̃ hã la, Mawu ƒe gbɔgbɔ kɔkɔea akpe ɖe mía ŋu míaɖi ɖase le mɔ nyui aɖe nu. (Mar. 13:11) Eya ta, ƒo koko na Yehowa edziedzi nàbia eƒe gbɔgbɔ kɔkɔe lae.—Luka 11:13.
4. Ne míekua kutri le subɔsubɔdɔa me togbɔ be míele kuxiwo me tom hã la, yayra kawoe dona tsoa eme?
4 Yayrawo: Esi míele kutri kum le subɔsubɔdɔa me togbɔ be míele kuxi geɖewo me tom hã la, esia doa ŋusẽ mí be míate ŋu akpe akɔ kple dodokpɔ siwo míado go le etsɔme la dzidzedzetɔe. Míetua dzinɔameƒo kple kalẽwɔwɔ, siwo nye nɔnɔme siwo dea dzesi ame siwo gbɔgbɔ kɔkɔea yɔ fũu la, ɖo. (Dɔw. 4:31) Gakpe ɖe eŋu la, esi míele míaƒe vɔvɔ̃wo dzi ɖum le Yehowa ƒe kpekpeɖeŋu me la, míetoa esia dzi doa ŋusẽ míaƒe xɔse kple ŋuɖoɖo ɖe eƒe xɔname ŋu. (Yes. 33:2) Dzidzɔ kple dzidzeme si dona tso nyanya be míele mía Fofo si le dziƒo ƒe lɔlɔ̃nu wɔ me la sua mía si. (1 Pet. 4:13, 14) Eya ta, migana míavɔ̃ o, ke boŋ mina míaɖe gbeƒã Fiaɖuƒegbedeasia kple dzideƒo ahaka ɖe edzi be Yehowa le megbe na mí ɣesiaɣi!